Mark 5

Jesus kari ngualara bur memek ago wore nungam

(Mat 8:28-34; Luke 8:26-39)

Jesus ko olekem arungu dal te nama yu batoga Galilee norogen komasang te, Gerasa kariimet nunga sor te arataman. Se Jesus dal beteram ale kapawaram se sor mu ko kari ngualara bo nu arigam ale arigokko taikaso. Kari mu bur memek kumik ningi. Se nu garap gogong kari kuera wore ningi tugukasan mu ningi bagakaso. Kari bo nu kalokko me terong, se betela mayang aora te kalomonko me terong tala. Tom suen biya nuna mayang aora nunguningkiri mu te kuting doleng kalokasan, bare nu tairate batutumu warukaso. Nu sokel ago nunguningkiri, se kari bo ta nu iluwok se kutek maukko me terong. Turom woremkalal nu garap gogong mu ningi se duruk kulupik ningi geraga dalela se biyala aikaso, ale kota kumik guang manga te maguwukaso.

Nu Jesus awar nuam bagaram se arigam ale naguram kote tairam ale doleng duap ningi dagulam, ale biyala airam balam, “Jesus, ni Kaem Kualala Biya ko Kuriang, ni awuk aga bitarko? Kaem nup te ani ka manorsam, ni ani yaman me aisuko!” Nu buta balam, mu awuk, Jesus iwita nu manaruwakaso, “Ni bur memek, ni kari sumu bitarko!” makaso.

Se Jesus nu isuam, “Nika nip awiri ya?” mam. Se nu balam, “Ana suen biya kari imi kumik ningi, se aninga aip Kager Motam Biya,” mam. 10 Ale nu tawun biya Jesus ilak wosengakaso, Jesus bur memek nunga karuk kuwim awar me nunga bitirukko.

11 Duruk gotek bo pingita mu te buruk motam biya na no gi se animan. 12 Se bur memek Jesus ilak wosengakasan / sail te Jesus isarman, “Ni anananga awur se namanak buruk mu nungumik ningi kapanakko,” makasan. 13 Se Jesus aing mam. Se bur memek mu kari mu tairate beteman ale suwan suwan buruk nungumik ningi nama kapaman. Se buruk umu suen la sail ago naguman nama gamung bo ita kulukua mu ko norogen la naguman, nama yu ningi kapaman ale kueman. Mu buruk suen biya nunguningkiri, 2000 iwitata.

14 Se buruk bitua kari nuna naguman wonong bibiya wonong gotektek te den balu geragaman. Se kariimet kilek aratam mu aringimonko taiman. 15 Ale tai Jesus kote arataman mu kari ulengkala bur memek ago bagaram bare aitak noko ikia aking nungeram se nu guang kataram daigam kutek mam bagakaso mu arikasan ale nguangakasan. 16 Se kari kilek nomotam te aringiman mu ko dugu duap kariimet nunga manarukasan, kari ngualara mu ko duap, se buruk nunga duap agotala balukasan. 17 Se kariimet sail tagikasan Jesus tairate nononga sor bitiruk sor bo te namurukko balukasan.

18 Se Jesus dal te aragawaram mu kari ulengkala bur memek ago bagaram mu tairam Jesus ilak namurukko wosengakaso. 19 Bare Jesus meram ale balam, “Kari Biya gomang ni kisam ale biyala ka saongam. Se ni am piler namar ale dugu duap imi ka nietniam se ka launuria nunga manaruko,” mam. 20 Se kari mu peleram namaram ale mel suen biya Jesus nu kumik te beteram mu ko dugu duap Decapolis sor te balukaso. Se kariimet suen la den mu ikiman biririkiman ale ikia nunga moakaso.

Jesus imet bo noko guang iluwam mu saongam, ale aking Jairus ko nanawus mumam se barasam

(Mat 9:18-26; Luke 8:40-56)

21 Jesus ko olekem arungu dal te yu komasang te aking peleram namaram. Se kariimet kasik biya tai langi nu kote biguwuman. 22 Se wonong mu te synagogue ko kari supuling bo, ko nup Jairus, nu nama Jesus arigam ale kote tairam ale doleng duap ningi bugura patungam, 23 ale biyala Jesus ilak wosengakaso ale isarukaso, “Aninga kuriang imet gotek wore kuerukko pingi aram. Ni tair kiting ko kumik te bitar se kuera menaruk se yawarakala bagurukko,” makaso. 24 Se Jesus ilak namaram.

Se kariimet suen biya ilak namakasan ale nu kiti tugukasan.
25 Se imet bo yar 12 ningi am gue la sapa lagakaso mu nu ago kariimet ningi bagaram. 26 Nu ko manga doctor nunga diara te menawuram, bare nuna me nungurukasan. Nu yaman tokaso, bare kuera mu am lagara la bagakaso. 27 Se imet mu Jesus ko dugu duap ikiam, ale aolak iluwam kariimet ningi ningi namaram Jesus buring ko noko guang kinikan ilu tam, 28 mu awuk, nu gomang ningi la balam/balukaso, “Ani noko guang la ilu taik mu angimik terong maukko,” mam/makaso. 29 Se noko gue tairatela marakam, se nu numi ikiam ale balam, “Aninga kuera menaram,” mam.

30 Se Jesus numi ikiam mu noko sokel kariimet bo sangukko aratam namaram mu ikiam. Se nu kariimet nunga ningi punga geragam ale isuam, “Awiri kuting aninga guang ilu tam a?” mam. 31 Se noko olekem nu manorman, “Kariimet suen biya nika kiti tugusan bare ni anape ko isesam, ‘Awiri kuting aninga guang ilu tam a?’ masam?”

32 Bare Jesus awiriya butata beteram wore arigokko am loagawakaso. 33 Se imet mu kilek nu kumik te aratam mu ko ikiam, ale nguanga nguanga tairam Jesus suwik duap ningi bugura kulukuam ale noko dugu duap wetang te la balam. 34 Se Jesus nu maonam, “Imet, nika gemang ningi nunguning nika nungam se nungerem. Se ka gemang lila te namarko! Nika kuera mu udagi me peleruk kete tairukkowo, mu menaram ta!” mam.

35 Jesus imet mu manaruwaram, se kari saki Jairus ko kawam te baga taiman ale Jairus manorman, “Nika kuriang maingkala kueram. Se kari biya ura kowar tui se am me namurukko,” ma balman. 36 Bare Jesus nuna den balman se ikiam bare me ikia iwita bagakaso. Nu am Jairus maonam, “Ni me nguangerko, ni gemang ningi nunguning te bagerko!” 37 Ale nu kariimet saki nu ilak me namomonko balam, ale nu Peter, James, se James ko uria John, umutang la nunga giam se nu ilak namaman.

38 Nuna Jairus ko kawam te nama arataman se kariimet nuna niara ma nirung biya bitawaman se Jesus nungarkam. 39 Ale nu kasu naguram ale nunga maonam, “Nina anape ko niara ma nirung biyala bitawasan a? Kuriang imi me kueram, mu am aniwoso,” ma balam. 40 Se kariimet den mu ikiman ale Jesus gusirukasan. Bare nu nunga kaoram se suen la matangi arataman. Asele nu kuriang ko nuet nuam, se ko olekem ilagala suwan mu arungu nunga giam, ale kuwim kuriang te bagakaso mu kote kasu naguman. 41 Ale nu kuriang kuting te iluwam ale maonam, “Talita kumi,” mam. Mu Juda nunga den te, se ana iwita gurugusan, “Kuriang itiwik gotek, ani balsam ni baresko!” 42 Se kuriang itiwik gotek mu tairatela barasam ale aolak ilukaso. Noko yar mu 12. Se nuna kilek mu aringiman ale ninguru tengeman. 43 Bare Jesus den aora biya nunga maonam, “Nina mel imi kari bo me maonal se ikiokko,” mam, ale nu nuam nuet kuriang mu na tumon se naukko balam.

Copyright information for `WSK