Mark 6

Nazareth alo Jesus nubiring tuman

(Mat 13:53-58; Luke 4:16-30)

Jesus wonong mu beteram ale ko wonong duap te Nazareth namaram. Se ko olekem alo nu ilak namaman. Se Sabbath tom te nu synagogue ningi namaram kariimet den nunga manarukaso. Se suen biya noko den ikiman biririkiman ale balukasan, “Kari ewere ikia yawara yawara imi aparete tam a?” makasan. “Noko den am ningo la. Se sokel awuk bore te nu kilek kasa bibiya beteso? Kari imi nu kamda kari agila, Maria ko kuriang. Noko uria mitak mu James, Joseph, Judas, se Simon. Ko korasari ana arungu bagasan.” Nuna butata balukasan ale Jesus ko nongomang magakaso.
Mark 6:2-3 Nuna ali imi ko munan te Jesus tutiakasan: John 6:42; 7:15; 2 Cor 5:16.


Se Jesus nunga maonam, “Prophet mu nu wonong suen biya te nup ago, bare tai kota ko wonong duap te, ko gue suwan ningi mu nu nup mena.” Ale Jesus kilek bibiya noko wonong duap te bitirukko me terong, nu kari suwan suwan mu la nunga sangarukaso kuting nungumik te bitakaso se nungumik nungiakaso. Se nu kariimet suen biya nungarkam, nuna nongomang ningi nunguning mena, se ikia ninguru moakaso.

Jesus ko olekem 12 ura nungaram

(Mat 10:5-15; Luke 9:1-6)

Se Jesus koma mu te wonong suen biya te geragakaso ale Kaem den kariimet nunga manarukaso.
Nu ko olekem 12 nunga auram se tai bolala awuman. Se nu ilagala ilagala nunga awukaso se namakasan.

Bare giram sokel bur memek te nunga karomonko mu nungaram,
ale nunga maonam, “Nenenga tam sikir la iluwal, ale mel bo bo, na daro, karar suwali, manga mel bo me gialko. Ninga su tugumal ale guang suwanta naguralko, bare guang bo ago me talko. 10 Se nina wonong bo te namaral mu kawam kirker te me aniralko. Kawam suwanta tasan mu te la aniwa wonong mu beteralko. 11 Se wonong bo nina nego ko me kuemon, nenenga den ikimonko me kuemon, mu nina wonong mu beteralko nega se nedeleng gege siwural, se wonong mu ko kariimet te ikimonko Kaem nononga munan mu ko gomang magoso.”

12 Buta se olekem alo wonong wonong namaman ale kariimet giris palagomonko den balukasan. 13 Ale bur memek suen biya nunga karokasan. Ale yu wel kariimet kuera ago mu nungumik te ilukasan se nungiakasan.
Mark 6:13 Yu wel: James 5:14.


Anuwa Kari John kueram

(Mat 14:1-12; Luke 3:19-20; Luke 9:7-9)

14 Jesus ura bitakaso se ko nup wonong suen biya te geragam se King Herod mu nu ago ikiam.
Mark 6:14 Herod imitang mu Herod Antipas, Herod Biya (Luke 1:5) wore ko namar bo.
Kariimet saki Jesus balukasan, “Mu Anuwa Kari John, nu kueram ale aking barasam,” makasan. “Uwutata se nu kilek bibiya sokel ago ewere beteso,” makasan.
15 Se kariimet saki noko balukasan, “Mu prophet Elijah,” makasan. Se saki balukasan, “Mena, mu prophet bo, prophet girakala wore nunga tuar,” makasan. 16 Bare Herod den nirung mu ikiam ale balam, “Mu Anuwa Kari John. Ani agata balem se dogotak batagorman se kueram, bare aking barasam!” mam.

17 Herod buta balukaso mu ko duap iwita: Ulengkala John marak bagakaso ko tom te nu iwita Herod manarukaso, “Ni awuk se nika uria Philip ko imet Herodias taem ale nika imet ko awurem? Munan sumu me terong,” makaso. Se umutang ko Herodias mu John ko gomang biyala magaram se nu Herod gomang atumam, se nu kari bo beteram se namaram John kuting mayang te kaolam ale talipara ningi beteram se bagakaso.

19 Herodias John ko gomang ninguru magakaso. Se nu John moruk se kuerukko ko gomang biyala anikaso, bare lage mena. 20 Mu awuk, Herod nu John ko nguangakaso, ale ninguru bitarukaso. Mu nu ikiam John mu kari diram, Kaem ko ura kari, umutang ikiam, ale nu John ko kuring ikiokko kuakaso. Bare tom nu noko den ikikaso mu nu ikia moakaso se gomang nguangara taikaso.

21 Bare udagi Herodias John te momon se kuerukko lage bo iwita arigam: Herod noko nuam te iluwam ko tom te nama aratam, ale ko na biya bo beteram, ale ali sor bitaru se anira ko kari bibiya, se kager kari nunga supuling, se Galilee ningi wonong wonong ko kari bibiya suen biya nunga auram se taiman. 22 Se Herodias ko nanawus tairam irukaso. Se Herod ko sikisaki arungu ninguru ko kuakasan. Se king imet itiwik mu maonam, “Ni anapeya mel ko kuar, mu balu se ani kisekko.” mam. 23 Ale nu balam, “Nunguningta nunguning, ni ani ali sor mel suen biya bitaruwasam mu sang ko balu, mu ani kusumuri pagik sang kisekkowo,” mam.

24 Se imet itiwik mu aratam namaram ale nuam isuam, “Ani anape mel balik se Herod aisukko ya?” mam. Se nuam balam, “Ni Anuwa Kari John dogotak batagarmon ale ko supuling taiwir tatam te betemon ale kisimonko baluko,” mam.

25 Se imet itiwik mu tairate peleram king kote nama kasu naguram ale balam, “Aninga angamang ni aitakta Anuwa Kari John dogotak bataguru ale ko supuling taiwir tatam mu te bitar ale aisuko!” mam.

26 Se king Herod den mu ikiam ale gomang biyala ikuwuram. Bare nu maingkala ko saki alo taiman mu nomokete nu den nunguningta nunguning balam, ale udagi gurugok balukko meram. 27 Buta se nu tairate kager kari bo maonam se namaram talipara kawam ningi John dogotak batogam ale supuling giam ago tairam. 28 Ale taiwir tatam mu te beteram imet itiwik mu tuam, se giam ale ago namaram ko nuam tuam.

29 Se John ko olekem nuna den ikiman ale taiman John ko kumik guang giman karogo nama mutim tuguman.

Jesus kari 5000 na nungaram

(Mat 14:13-21; Luke 9:10-17; John 6:1-13)

30 Se olekem 12 Jesus nunga balam se nuna ilagala ilagala wonong wonong namaman umutang peleman taiman, Jesus ilak biguwuman, ale ura mel suen biya bitakasan ale kariimet den nunga manarukasan, mu ko duap balman.

31 Se Jesus nunga maonam, “Tairal se sor bo ipi wore te namanak ale nina neneman saparalko,” mam. Mu awuk, kariimet kasik biya nama taikasan, se nu ko olekem arungu na namon nonoman sapomonko tom mena se ko nu buta nunga maonam. 32 Se nuna ilak dal te aragaman kuwim te nonoman sapomonko mu te namakasan.

33 Bare kariimet suen biya nuna wonong beteman namakasan mu nungarkaman ko ikiman. Ale nuna naguman wonong bita bita namaman ale lang kuring Jesus te aratukko mu te giriman nama biguwuman bagakasan.

34 Se Jesus dal te nama kapa kariimet suen biya nungarkam, ale gomang biyala batagam. Mu awuk, nu sipsip nungumik bitua kari mena iwita nungarkam. Ale umutang ko aking den nunga kausa duap beteram, ale den suen biya nungarukaso.

35 Se worem kaparam se olekem taiman Jesus manorman, “Sor baingam, se kuwim imi te betela wonong bo mena. 36 Se ni kariimet nunga awur se wonong wonong namomon ale na diamonko,” maman.

37 Bare Jesus nunga maonam, “Mu nina nengeta na sang nungaral se namonko,” mam. Se nuna biririkiman ale balman, “Agi ana manga silver 200 iwita tanak ale inang te dianak se nuna namonko e?”

38 Se Jesus nunga isuam, “Nenenga na awila bola aniso? Namaral ale arigalko!” Se namaman aringiman, ale taiman nu manorman, “Ana bread 5, se wal ilagala ago aniso,” maman.

39 Se Jesus ko olekem nunga maonam, nuna kariimet nunga manarmon se ali sirsir yawarakala wore te dagimonko balam. 40 Se olekem alo kariimet nunga manorman se dagi namaman, motam saki kariimet 100, motam saki kariimet 50. 41 Se Jesus bread 5 wal ilagala mu ago giam, koma taiti kuali loaga se Kaem aru maonam. Ale bread wal ago mu pakokaram se kaparam se ko olekem alo nungaram, se giman ago nama kariimet nungarman. 42 Se kariimet na naman nungumik ago terong ma muruwuram. 43 Asele olekem na nukum wogaram mu korokem 12 tuguman se kuring aratu namaram. 44 Kari Jesus kuting te na naman mu nunga tom 5000.

Jesus yu guang awete aolak iluwam

(Mat 14:22-33; John 6:15-21)

45 Se Jesus ko olekem tairate nunga diruwuram ale nunga maonam, “Nina tairate dal te aragal ale giral yu batoga komasang te Bethsaida wonong te namaralko” mam, “se ani kariimet nunga awurek se namomon asele udagi tairikko,” mam. 46 Se nu kariimet nunga awuram se nama kutuwuman, asele nu kota Kaem aru manukko duruk motongar bo te nama tarigiram.

47 Se turom noko olekem dal te yu batoga luan te bagaman se Jesus. 48 Se nuna wos ilukasan ura kowar bitakasan. Se nungarkam, ale uriluan, tarak niarukko tom ago, mu nu yu guang awete aolak iluwam nama nongote pingi aratam, ale nunga kiarukko negeram. 49 Bare nuna suen la nu yu guang te aolak iluwaram se aringiman, ale wit mairap ko balman, ale nodora namaram se nguangakasan ale biyala ai niakasan.

Bare Jesus tairate nunga maonam, “Sokel ago bagaralko! Imi anigita! Me nguangaralko!” ma balam.
51 Ale dal te aragam se daula tairate kueram. Se nuna biririkiman ale nungamin yenakaso. 52 Mu awuk, Jesus bread 5 se wal ilagala mu te kariimet inang nungaram se nuna mel mu aringiman bare me ko nungamin kiti sinar uriam. Nunga ikia, nunga nongomang ningi sisira biya anikaso se.

Jesus Gennesaret kariimet suen biya nunga nungam

(Mat 14:34-36)

53 Se nuna nama yu Galilee komasang te Gennesaret arataman ale dal kalo beteman. 54 Ale nuna dal bitawaman la mu sor mu ko kariimet Jesus ko ikiman. 55 Ale tairate namaman sor mu te kariimet kuera ago ani se animan mu pakapang te nunga gi gi arungu taikasan, koma aguwaya nu te namaram bagakaso se ko den ikikasan mu te kote taikasan. 56 Se Jesus koma suen biya te geragakaso, wonong gotektek, wonong bibiya, se kariimet nunga saki alo kuera ago anira mu nunga gi gi arungu nama murum kuwim te la nunga awukasan, ale Jesus isarukasan, nu nongote pingi tairuk se nuna noko guang kinikan la ilu tamonko ilak wosengakasan. Se arikaya noko guang norogen la ilu taman, mu nuna nungumik nungeram.

Copyright information for `WSK