Mark 7

Pharisee alo nuguting anuwa ko munan ko Jesus ilak tagikasan

(Mat 15:1-9)

Pharisee kari saki, Law Den ko kausa kari saki arungu Jerusalem beteman ale Jesus kote tai biguwuman. Ale Jesus ko olekem alo nuna nuguting lilim la me anuman, am na nowaman se nungarkaman ale nongomang magaram. (Juda nunga ningi Pharisee kari, se Juda suen biya agotala, mu nunga taleng girigir ko munan ninguru karo tusan, ale tom nuna na namonko mu nuguting lilim la anusan. Nuna uwuta nuguting me anumon mu na me namonko, mu nuna nunumi balmon “karur ago se” ma balmonko. Ale aking nuna murum kuwim na mel te diara mu te namomon ale na inang diamon ago taimon, mu ninguru nuguting nungumik anumon ale asele na namonko. Nuna kani taiwir bagun nononga munan gotektek te anusan, ale nunga taleng girigir nunga munan suen biya agotala karo tusan.)

Se Pharisee kari se Law Den ko kausa kari Jesus manorman, “Arikko, nika olekem nuguting me anuman bare na nowasan. Awuk se nuna anananga nanangatak ko munan me karo tuman a?”

Se Jesus nunga den koma iwita balam, “Nina kawel kari! Prophet Isaiah mu Kaem kuring tam ale diram tala ninga balukaso:

‘Kariimet imi nuguring te aninga aip patowasan,
bare nunga nongomang tuagu ningi mu mena.
Mat Nuna aip patowasan mu nunguning mena. / Mark Nuna nuguring guang la aninga aip patowasan se mu me nunga sangukko.
Nunga kausa kariimet nunga kasursan mu kari ko ikia wore la.'
Mark 7:6-7 Isaiah 29:13.

Nina Kaem ko den nubiring tuman ale kari munan ninguru karo tusan.”

Jesus buta balam asele nunga maonam, “Nina Kaem ko munan den biriruwural ale nengeta ninga taleng girigir nunga munan karo tualko lage ninguru ko ikiman! 10 Mu awuk, Moses balam, 'Nina ninam nenet nuguring karo tui se nunup patowaralko,’ mam. Ale aking balam, ‘Bo nuet nuam den memek nunga manuk, mu kari umutang moral se kuerukko,’ mam. 11 Bare nina iwita balsan, kari bo noko nuet nuam nunga manuk, ‘Ani manga bo te ninga sangikko karogo, bare ani maingkala Kaem tuekko bala se me te ninga bituekko,’ iwita baluk, 12 mu nina balsan nu terong beteso masan, ale nu nuet nuam manga mu te me nunga sanguk mu terong ma balsan. 13 Ale umutang te nina nengeta ninga munan sokel ago anirukko karogo kaesan, ale Kaem ko den mel yam ko betesan. Ale nenenga munan saki uwutata mu suen biya tala ago betesan.”

Mel kariimet karur nungarso

(Mat 15:10-20)

14 Jesus aking kariimet motam biya nunga auram se tai bolala awuman se nunga maonam, “Nina suen la den imi ikial ale ko nunguning ninguru ikialko! 15 Mel kariimet nuguring ningi namoso se nasan mu nongomang karur me nungarso. Mena. Mel kariimet nuguring te aratoso mu asele kariimet karur nungarso.
Mark 7:15-16 Batoga sang girakala batagorman mu te den imi agotala aniso: “Nina nedegewa ago agi mu, den imi ninguru ikialko.”


17 Udagi Jesus kariimet motam biya nunga beteram ale olekem arungu kawam te namaram. Se noko olekem den ira mu ko duap ko isarukasan. 18 Se nu nunga maonam, “Nina betela me ikisan e? Mel suen biya kariimet nuguring ningi namoso se nasan mu kariimet me karur nungarso! Mena! 19 Mu awuk, mel mu nongomang ningi me namoso, mu nutagu ningi kaposo, se udagi karogo saraga siwu warsan.” (Den mu te Jesus balam na inang bo kariimet karur me nungarso mam, am nanakko la balam.)

20 Jesus nunga maonam, “Mel kariimet nongomang ningi wore taiso borta karur nungarso. 21 Mu awuk, mel kariimet nongomang ningi aniso ale tai aratoso mu iwita: ikia memek, saman katagot, mel tere na, kari mora se kuera, nuwus-kuari ko munan maguwura, 22 nemetam nengemang barasa, mel suen la ko kaera, kula kawel, kilek memek kariimet nomotam te betera bare dolara mena, bo ko nengemang magara, bo ko nup balu maguwura, ninimi patowara, ikia memek duap duap betera. 23 Kilek memek suen la umutang kariimet nongomang ningi aniso se karo tusan ale aratoso borta kariimet karur nungarso.”

Phoenicia imet Jesus ko gomang ningi nunguning aram

(Mat 15:21-28)

24 Jesus sor mu beteram ale Tyre sor te namaram. Ale kawam bo ningi kasu naguram bagakaso. Mu noko gomang kariimet nu mu te bagoso wore me ko ikimonko. Bare nu yumurokko me terong. 25 Imet bo sor mu te bagaram, noko nanawus gotek bur memek kumik ningi bagakaso, se nu Jesus kawam mu te bagakaso mu ikiam, ale tairatela tairam Jesus ko doleng duap te bugura patungam, 26 ale ilak wosengakaso, “Ni aninga kuriang kumik ningi bur memek aniso wore karoko,” makaso. Bare imet mu Juda imet mena, nu Greek imet, se ko sor duap mu Syria-Phoenicia.

27 Se Jesus den ira bo nu maonam, “Kuriang girimon na namon nama nungumik ago terong mauk asele kausik sang namonko. Bare kuriang na me namon, ani nononga na girek kausik nungarik mu me terong.”
Mark 7:27 Jesus kuriang te balam mu Juda kariimet, se kausik te balam mu ali sor saki ko kariimet.


28 Se imet mu den koma balam, “Kari Biya, ni nunguningta balsam. Bare kausik alo mu tom kuriang na nowasan se bunetutuk kaposo mu nuna am nasan!”

29 Se Jesus nu maonam, “Ni yawarakala balem. Buta se piler namarko. Ani bur memek nika nanawus kumik ningi mu karem.” 30 Se imet mu peleram nama kawam te kuriang mu bur beteram se nu yawarakala barim te aniwaram se arigam.

Jesus kari dogowa kuring mena wore nungam

31 Jesus aking barasam Tyre sor beteram aolak iluwam nama Sidon wonong te, se nama Decapolis sor te, asele nama yu batoga Galilee te aratam. 32 Se kariimet saki kari bo dogowa sisira, munak ko kuring ikup biya, mu diruwuman ale ilak Jesus kote taiman, ale kuting kumik te bitirukko isarman.

33 Se Jesus kari mu tam ale ilak awar nuam nama sanamaram, ale kuting peperek kari mu dogowa ilagala ningi garukuam. Ale aking kota ko kuting te katingiram ale kari mu kuamili te ilu tam. 34 Ale motam taiti kuali loagaram ale gomang batagam se niara den te kari mu maonam, “Epata!” mam. (Mu Aramaic den te, se anananga den te mu “Metam pauk palagukko”.) 35 Se tairate kari mu ko dogowa kuamili nungeram, se den yawarakala ikikaso ale munakakaso.

36 Se Jesus kariimet nunga maonam, “Nina mel imi kari bo me maonal se ikiokko,” mam. Ale nuguring kalomonko den aora biya tala balam. Bare mena. Nuna kilek mu ko dugu duap tawun biya balman ago geragaman. 37 Se kariimet ikiman ninguru biririkiman, ale balman, “Nunguningta nu mel suen biya yawarakala beteso pa!” maman. “Nu kari nodogowa mena nungurso se den ikisan, aking kari nuguring sisira nunga nungurso se munakasan pa!” maman.

Copyright information for `WSK