Mark 8

Jesus kari 4000 na nungaram

(Mat 15:32-39)

Tom maiya mena kariimet motam biya aking tai Jesus kote biguwuman se den nunga manaruwakaso. Tom ilagala suwan se kariimet na menaram, se Jesus ko olekem nunga auram se kote taiman se nunga maonam, “Ani kariimet ewere nunga angamang biyala batagoso. Nuna worem ilagala suwan ani agarak bagaman ale na inang ito namonko wore mena. Se ani na me nungarik, am nunga awurek se nunga wonong wonong namomonko mu nuna lage te dagulomonko. Mu awuk, saki nunga wonong awar biya wore taiman.”

Se olekem alo Jesus manorman, “Awuk ta ana sor ipi ewerete na aringinak ale kariimet biya te nunga sangornakko ya?” Se Jesus nunga isuam, “Nina bread awila aniso?” Se nuna balman, “Ana bread 7 karogo.”

Se Jesus kariimet ali te dagimonko balam. Se nuna dagiman. Asele nu bread 7 mu giam Kaem amilmil tuam, ale pakokaram se kaparam, ko olekem alo nungaram. Se nuna kariimet nungaru guruguman. Ale nuna wal gotektek saki ago Jesus tuman, se tam, Kaem aru maonam ale olekem nungaram se kariimet nungaru guruguman. Se nuna suen la na naman nungumik ago terong ma saparam. Asele olekem alo na nukum wogaram mu bolala awuman ale korokem 7 tuguman se kuring aratu namaram. Kari na naman mu ko tom mu 4000 iwita. Se Jesus nunga awuram se namakasan, 10 asele nu ko olekem arungu dal te aragaman ale Dalmanutha sor te namaman.

Pharisee kari Jesus kilek bo bitiruk se aringimonko isarman

(Mat 16:1-4; Luke 12:54-56)

11 Se Pharisee kari saki Jesus kote taiman ale isaru gilingikasan. Nuna te ilumonko se manorman, “Ni duruk te ko kilek bo bitar se ana aringinakko,” maman.

12 Se Jesus gomang motam batagam ale gomang yukuwaram se balam, “Nina tom imi ko kariimet anape ko kilek biya bo bitirik se arigalko aninga isaru lagasan a? Ani nunguningta ninga manorsam, nina kilek bo bitirik se me arigalko. Mena.” 13 Ale nu nunga beteram ko olekem arungu dal te aragaman ale yu batoga komasang te namakasan.

Jesus olekem alo Pharisee nunga yeast se King Herod ko yeast ko sinar tamonko balam

(Mat 16:5-12)

14 Se olekem nungamili saparam se bread me giman. Nuna bread suwanta taman ale dal te ago namaman. 15 Se Jesus nunga maonam, “Sinar talko! Pharisee kari nunga yeast, se Herod ko yeast karogo ninga ningi aniruk bore ko sinar ago bagaralko!”
Mark 8:15 Matthew 16:12 se Luke 12:1 arikko.


16 Se olekem alo nongota nunumi isaru gurugumukasan, “Ana bread mena bore ko nu buta balso agila,” makasan.

17 Se nuna den baluwakasan mu Jesus maingkala ko ikiam ale ko iwita nunga maonam, “Nina awuk se ana bread mena mu ko ninimi isaru gurugumu lagasan a? Nina arigisan ikisan bare am ninguru me ko ikisan agila pa! Nina nengemang motam sisiram se ikia sinar bo nengete mena agila! 18 Nina nemetam te me arigisan e? Ale nedegewa te me ikisan e? Ale kilek ani beterem mu ko ningamili saparam agila?”

19 Ale nu nunga isuam, “Tom ani bread 5 pakakerem kari 5000 nungarem, mu nina na nukum wogaram mu korokem awila tuguman a?” mam.

Se nuna balman, “Korokem 12 tuguman,” maman.

20 Se aking nunga isuam, “Se tom ani bread 7 mu pakakerem ale kari 4000 nungarem, mu nina na nukum wogaram mu korokem awila tuguman a?” mam.

Se nuna balman, “Korokem 7 tuguman,” maman.

21 Se nu nunga maonam, “Se mu nina me ko sinar woresan e?”

Jesus Bethsaida kari bo motam sisira wore nungam

22 Nuna nama Bethsaida wonong te arataman. Se kariimet saki kari motam sisira bo diruwuman ilak Jesus kote taiman, ale kuting kumik te bitiruk se nungerukko ilak wosengakasan. 23 Se Jesus kari motam sisira mu kuting te iluwam ilak wonong buring ko aratam, ale ko motam te katingiram ale kuting motam te kau tam ale isuam, “Ni mel i arigisam agi mena e?”

24 Se kari mu loagaram gurugam ale balam, “Ani kariimet saki nungarkasam, bare tam iwita aolak iluwasan se nungarkasam.”

25 Se Jesus aking motam te kau tam. Se kari mu motam nikim pagam sokel ago loagaram ale mel suen biya ninguru arikaso.

26 Se Jesus nu maonam, “Ni aking wonong ningi me kasu nagurko,” mam. “Dirme ka kawam te namarko,” mam.

Peter wetang te balam Jesus mu Kristus mam

(Mat 16:13-20; Luke 9:18-21)

27 Jesus ko olekem arungu Galilee sor beteman aolak iluman wonong biya Caesarea Philippi mu duap te, wonong gotektek mu te nama se Jesus ko olekem nunga isuam, “Kariimet pa ani awiri ko aga balsan a?”

28 Se nuna balman, “Saki nika balsan ni Anuwa Kari John masan. Se saki ka balsan ni Elijah masan. Se saki ka balsan ni prophet bo tala wore aking barasem ma balsan.”

29 Se Jesus nunga isuam, “Bare nina nengeta mu ani awiri ko iwita aga balsan a?”

Se Peter nu maonam, “Ni mu ni Kristus.
Mark 8:29 Prophet alo Kristus ko den balu lagaman se Israel alo nu tairuk nunga sangukko ko kimi bitakasan, kari borta Messiah makasan, se Greek den te Kristus makasan.


30 Se Jesus nuguring kaolam, nuna nu mu Kristus mu wetang te me balmonko balam.

Jesus kueruk ale aking barasukko den balam

(Mat 16:21-23; Luke 9:22-27)

31 Asele Jesus nu ikup suen biya maingte nu giokko mu ko olekem nunga maona duap beteram, ale nunga manarukaso, “Kari ko Kuriang nuna ikup yaman suen biya tumon se giokko. Kari bibiya, priest bibiya, se Law Den ko kausa kari bibiya, nuna nubiring tumonko. Kari sang nu momon se kueruk, ale tom ilagala suwan mu te nu aking barasukko.” 32 Jesus mel mu wetang te nunga manarukaso. Se Peter Jesus tam ilak due ko namaram ale ining tuikaso.

33 Bare Jesus koma gurugu ko olekem nungarki se, Peter ining tuam, “Satan, tagi toko!” mam. “Nika ikia balsam sumu mu Kaem ko ikia te mena, mu kari ko ikia te aninga manorsam.”

Jesus kowom kaora ko den balam

(Mat 16:24-28; Luke 9:23-27)

34 Asele Jesus kariimet noko olekem ago nunga auram, se kote taiman, se iwita nunga maonam, “Kari awiriya ani agowom karukko mu nu kota ko ikia, ko gomang mu buring tuok ale kota ko tam kangono giok ale ani agowom karukko. 35 Mu awuk, kari awiriya kuerukko nguanguruk ale ani agowom me karuk, mu nu Kaem ko marak yawara tom suen biya te bagurukko mu me taukko. Bare kari awiriya kuerukko me nguanguruk, am ani agowom karuk, aninga den gilalong yawara baluk, mu kari mu Kaem ko marak yawara tom suen biya te bagurukko mu taukko. 36 Se kari bo ali imi te nu mel singir biya giam, bare mel suwanta Kaem ko marak yawara me tam ale kueram, mu mel gi lagaram mu awuk ta nu sanguk i? Mena. 37 Awuk ta nu marak yawara ningo te bagara ko mu arigok i? Mena. / Nu anape mel te marak ningo yawara te bagara ko mu tauk i? Mena.

“Tom imi te kariimet suen biya Kaem nubiring tusan munan memek memek betesan. Se awiriya aninga den kariimet mu nomokete balukko nguanguruk, ale buring aisuk, mu betelatala Kari ko Kuriang, tom nu Kaem nikim nup biya tuok se ko engel kako alo arungu peleruk tairukko tom mu te, nu kari awiriya buring nu tuam mu betela buring tuokko,” mam.

38 

Copyright information for `WSK