Mark 9

Ale nu nunga maonam, “Ani nunguningta ninga manorsam, nina sanamiwasan imi saki me kueral baga Kaem ko kingdom sokel ago tairuk se arigalko.”

Jesus ko kumik lilim la nikim biya pagam

(Mat 17:1-13; Luke 9:28-36)

Nuna tom 6 beteman, asele Jesus nu Peter James John mu la nunga giam, ale arungu duruk bo kalel biya wore te tarigiman. Se olekem mu Jesus ariwaman se nu kumik koma ko ariga geragam ale nikim biyala kapakaso. Se noko guang nikim pagam ale siraram nunguningkiri. Ali imi te imet bo guang anuwok se buta nikim pagukko me terong. Se Elijah Moses ilak taiman Jesus ilak munakawaman se olekem alo nungarkaman, ale biyala nguangaman. Ale Peter den bo balukko mena se nu Jesus maonam, “Kari Biya, ana imi te taiman bagasan mu yawarakala. Se ana kawam sasal ilagala suwan kalonakko, bo nika, bo Moses ko, se bo Elijah ko.”

Nu baluwaram se taiti nuwi bo tairam nunga iram, se kuring bo taiti nuwi mu ningi iwita balam, “Imi aninga Kuriang, ani tawun biya ko kuesam. Nina noko kuring karo tualko.” Se aking olekem loagaman guruguman mu kari bo ta me aringiman, Jesus kota nongorak bagaram se aringiman.

Nuna Jesus ilak duruk te aolak iluman kapawa se nu nunga maonam, “Nina mel aringiman mu saki alo me nunga maonalko,” mam. “Kari ko Kuriang, tom nu kueruk ale barasuk mu te asele nina mel aringiman mu balalko.”

10 Se nuna kuring karo tuman, bare nongota nunumi isarukasan, “Mu anape den nu balso, kueruk ale barasukko maso?” 11 Ale nuna Jesus isarman, “Bare awuk se Law Den ko kausa kari balsan Elijah girok tairuk asele Kari ko Kuriang tairukko ma balsan a?”

12 Se Jesus nunga maonam, “Elijah nu girok tairuk mel suen biya nungokko den mu nunguningta. Bare ani isa bo ningarikko: Awuk se den batoga bo iwita baluwoso / balso, Kari ko Kuriang yaman biyala giokko balso, aking nubiring tumonko baluwoso / balso? 13 Bare ani ninga manorsam, Elijah maingkala tairam. Se kari nuna nongota nunga ikia karo tuman ale moman se kueram
Mark 9:12-13 Mu Anuwa Kari John: Matthew 11:14; 17:13.
, Kaem ko batoga te giram noko balam se aniso butata.”

Jesus kuriang bo bur memek karogo wore nungam

(Mat 17:14-21; Luke 9:37-43)

14 Nuna olekem sang nongote peleman tai se nungarkaman mu kariimet motam biya olekem nunga taluru guruguman se Law Den ko kausa kari nongorak den tagikasan. 15 Se kariimet Jesus aringiman mu nuna ninguru biririkiman ale ilak amilmilomonko naguman namaman.

16 Se Jesus nunga isuam, “Nina anape mel ko den te tagi gurugumu lagaman a?”

17 Se kariimet mu ningi kari bo Jesus ko den koma balam, “Kari biya, aninga kuriang amu gotek bur memek moram se kuring sisiram, se ilak kete tairem. 18 Tom suen biya bur memek nu kumik ningi mu sail te nu iluso usagoso se aliti daguloso. Ale kuating ngisuk kuring ko aratoso, kore gik gek gik gek maso, kumik sail ningi aratoso se kumik titimaso. Se ani nika olekem bur memek mu karomonko balem, se karogo kaeman bare nuna me terong.”

19 Se Jesus den mu ikiam ale nunga maonam, “Nina tom imi ko kariimet nina nengemang ningi nunguning mu mena! Ani tom awila nina nengerak bagirik se nina nengemang ningi nunguning arukko ya? Ani tom awila nenenga ikup giekko? Aria, kuriang diruwural ilak aningate tairalko!”

20 Se nuna kuriang mu diruwuman se Jesus kote tairam. Se bur memek Jesus arigam mu tairate kuriang mu sisupu saparam se dagulam, ale ali te iri kututumukaso ale ngisuk kuring ko aratukaso.

21 Se Jesus kuriang mu ko nuet isuam, “Tom amaru nu kilek imi duap beteram a?” mam.

Se nuet balam, “Tom nu gotektir la duap beteram.
22 Tom kasik biya bur memek nu moruk se kuerukko sapakaso, se tama ningi dagulukaso, yu ningi dagulukaso. Bare ni terong agi mu gemang ana nangaru ale nanga sangaruko!”

23 Se Jesus nu maonam, “Ni awuk se balsam ‘ni terong agi’ masam? Kari gomang ningi nunguning mu nu mel suen biya bitirukko terong mam.”

24 Se kuriang mu ko nuet tairate balam, “Ani angamang ningi nunguning,” mam. “Bare angamang ningi nunguning sokel ago nunguning mena. Ni aninga sangaru ale sokel aisuko!”

25 Se Jesus kariimet suen biya tai ira kalomonko negeman, se nungarkam ale den aora biya bur memek mu maonam, “Ni kuring dogowa kaola ko bur memek, ani ka manorsam, ni tagi to ale kuriang sumu bitarko! Udagi kote me pilerko!” 26 Se bur memek mu biyala airam ale kuriang mu itam bilam sisupuram ale aratam namaram. Se kuriang mu kumik kueram se kuera iwita. Se kariimet suen biya balukasan, “Nu kueram,” makasan. 27 Bare Jesus kuriang kuting iluwam saongam, se barasam sanamaram.

28 Udagi Jesus kawam te namaram, se ko olekem nongota ilak baga isarman, “Awuk se ana bur memek owore karonakko me terong?” 29 Se Jesus nunga maonam, “Bur memek uwuta mu ngatang te la nunga kaoralko, lage bo kilimik mena.”

Jesus kueruk ale barasukko den akingtala balam

(Mat 17:22-23; Luke 9:43-45)

30 Nuna koma mu beteman ale Galilee ningi aolak iluman namakasan. Se Jesus ko gomang kariimet nu koma mu te bagakaso mu ikimonko me kuakaso. 31 Mu awuk, nu ko olekem alo den nunga kasuruwakaso. Nu nunga maonam, “Nuna Kari ko Kuriang ilumon ale kari sang nuguting te betemon se momon se kuerukko. Ale tom ilagala suwan mu te aking barasukko,” mam. 32 Bare ko olekem alo den mu ko nunguning me ikiman, ale Jesus isarmonko wore nguangakasan.

Kari numi ira kutuwuso mu nu gira bagoso ko den

(Mat 18:1-5; Luke 9:46-48)

33 Nuna nama Capernaum arataman. Ale kawam ningi kasu naguman mu Jesus ko olekem nunga isuam, “Nina anape den lage te balukasan a?”

34 Bare nuna am kutek maman. Mu awuk, nuna tai se, awiriya olekem nunga gira bagoso wore ko den tagi lagakasan.

35 Se Jesus daigam ale olekem 12 mu nunga auram ale nunga maonam, “Kari bo gira bagurukko kueruk, mu nu kota numi ira kutuwurok ale kari suen biya nobowa ningi nunga ura kari bagurukko.” 36 Ale nu kuriang gotek bo tam ale nomokete beteram se sanamaram, se ilak tai yasaram ale iwita balam: 37 “Awiriya aninga aip te kuriang gotek bo es iwita gomang tuso ale aru taso, mu nu ani agotala gomang aisiso ale aga? aru taso. Bare ani la mena. Nu Kari aga beteram se tairem mu agotala gomang tuso ale aru taso.”

Kari ana nangarak me kagerso mu anananga bo

(Luke 9:49-50)

38 John nu Jesus maonam, “Kari biya, ana kari bo nika nip te bur memek nunga karokaso se aringiman. Bare kari mu anananga bo mena, se ana nu manorman nu ura sumu me bitirukko maman.”

39 Bare Jesus nunga maonam, “Me koma kaolalko. Kari bo aninga aip te kilek kilek beteso, mu kari mu tairate ani aip me balu maguwurokko. 40 Mu awuk, kari awiriya ana nangarak me kagerso, mu nu anananga bo.
Mark 9:40 Kariimet Jesus me kowom karosan mu nuna noko sikisaki mena: Luke 11:23.
41 Ani nunguningta ninga manorsam, kari awiriya ningarkuk ale baluk mu Kristus ko ura kari alo mauk ale mu ko ninga sanguk, ale yu agi ningaruk, mu kari mu maingte koma yawara taukkowo.”

Ikia / Kilek memek mu kariimet nunga nongomang ningi nunguning maguwuso

(Mat 18:6-9; Luke 17:1-2)

42 “Bare kari awiriya kuriang gotektek ani ago ko nongomang ningi nunguning wore nunga ningi bo ikia memek kausok se kilek memek te dagulok, mu kari sang am ngual kari umutang ilumon, ale manga bo ikup biya mu dogotak karogo kalomon, ale gagi ningi sapomon se sarenga namurukko mu asele terong!

43 “Nika kiting bo memek lage te ka beteso agi mu, kiting mu am bataguru saparko. Mu awuk, ni kiting suwanta agi bare marak yawara pempem la te lagerko mu to mu ningo. Bare ni kiting ilagala karogo baga se tama tom suen biya kaniwoso mu ningi ka sapomonko mu memek biya.
Mark 9:44,46 Batoga saki girakala batagorman mu te verse 44, 46 me aniso. Den verse 44 se 46 te aniso mu verse 48 te arikko. / Verse umutang mu ko den mu verse 48 mu te karogo aniso.
45 Se aking nika deleng bo memek lage te ka beteso agi mu, deleng mu am bataguru saparko. Mu awuk, ni deleng suwanta agi bare marak yawara pempem la te lagerko mu to mu ningo. Bare ni deleng ilagala karogo baga se tama tom suen biya kaniwoso mu ningi ka sapomonko mu memek biya. 47 Se aking nika motam bo lage memek te ka beteso agi mu, motam mu am galuwu saparko. Mu awuk, ni motam suwanta bare Kaem ko kingdom ningi kasu nagurko mu ningo. Bare ni motam ilagala karogo baga se tama tom suen biya kaniwoso mu ningi ka sapomonko mu memek biya. 48 Kuwim memek mu te ‘yes malolok mel iwiwara naso mu pempem aniso; se tama me iriso, tom suen biya kaniwoso, mu am aniso tala.’

49 “Nina suen la ira ariga nengete aratukko, tama iwita. Se ira ariga mu ningi sail ago bagaralko.

“Gagi na inang te kamara mu mel yawara, bare ko seselak menaruk mu awuk ta nungurmon se aking seselak gemuruk? Mena. Se nina sinar talko, ninimi nengemang tua ko munan gagi ningo iwita wore saparal bore ko, nengemang suwanta bagaralko.”
Mark 9:50 Juda alo nunga munan bo mu iwita: Nuna nongomang suwanta agi mu dagikasan bread salt karogo nokasan ale mu te nunumi wetang te bitakasan nuna nongomang suwanta bagakasan.


50 

Copyright information for `WSK