Matthew 11

Anuwa Kari John Jesus ko isa beteram

(Luke 7:18-35)

Jesus ko olekem 12 den imi nunga manaru saparam mu nu barasam ale Galilee wonong saki pingi mu te geragawa se den nunga kasuru se nunga manarukaso.

Se Anuwa Kari John nu talipara kawam ningi baga se Kristus ura bitakaso mu ko ikiam, ale ko olekem sang nunga maonam se Jesus kote taiman, ale iwita isarman, “Kari tairukko balukasan ale ko kimi bita lagakasan borta ni ye, agi kari bo kigilik ko kimi betenakko ye?”
Mat 11:3 Juda kariimet ikikasan Kristus tairuk ale kilek bibiya bitirukko balu se ko kimi bitakasan.


Se Jesus iwita nunga maonam, “Peleral namaral ale den nina ikiman ale kilek kilek nina aringiman mu John maonal se ikiokko: Kariimet nomotam mena mu aitak loagasan, se kariimet nusuwik tilital mu aolak ilusan. Se kariimet nungumik laera posara mu aitak nungumik yawarakala geragasan, se kariimet nodogowa mena mu aitak den ikisan. Se kariimet kuesan mu aking maraga gilingisan, se den gilalong yawara mu kariimet nungumik mel mena nunga manorsan se iki gilingisan. Se kari ani ago ko gomang ningi nunguning me namoso taiso, mu nu amilmilurukko.”

Se John ko olekem namangaman se Jesus John ko dugu duap kariimet nunga manarukaso, ale balam, “Tom John nu ali sor garagarayam te bagakaso mu nina anape mel arigalko sor umutang te namakasan a? Agi ara duap suwanta daula sisiwuwakaso wore arigalko namakasan e? Mena. Agi kari bo guang yawara yawara kataram ale karogo bagakaso wore arigalko namakasan e? Mena tala! Kari guang uwuta katasan mu king nunga kawam bibiya mu ningi ani gilingisan.

“Se nina anape mel arigalko namakasan? Agi prophet bo e? Se ani ninga manorsam, prophet umutang mu prophet suen la nunga kia saparam. 10 Mu prophet borta nukung ko Kaem ko batoga te iwita balam se aniso:

  • ‘Ani aga kari bo bitirik se aninga den karogo girok namuruk ale ka lage nunguru burangi sagurukko.’
11 “Ani nunguningta ninga manorsam, Anuwa Kari John kariimet ali imi te bagasan mu suen la nunga kia saparam. Bare kariimet duruk wonong ko kingdom ningi anisan, mu nunga ningi bo kituwura nup mena agi wore, nu mu John kiaram.

12 “Tom John ura duap beteram eng tai aitak imi te mu, duruk wonong ko kingdom ko ura sokel ago naguwakaso. Bare kari memek kingdom mu ko den biriruwukasan tala.
Mat 11:12 Bala bo mu iwita: “Se kariimet kingdom mu ningi kasu nagumonko ninguru sail tagikasan.”
13 Mu awuk, Law Den te, se prophet alo nunga den te, duruk wonong ko kingdom tairukko mu ko den baluwaman la, eng John tai aratam. 14 Se nina nunga den ko nengemang ningi nunguning agi mu, nina iwita ikialko: John mu Elijah. Nu mu kari tairuk ale kari biya ko lage nunguru sagurukko baluwaman borta tairam.
Mat 11:14
15 Se nina nedegewa ago agi mu, den imi ninguru ikialko.

Jesus kariimet nunga kilek ko nunga maonam

(Luke 7:31-35)

16 “Ani kariimet tom imi ko mu anape te nunga iwita balikko? Mu nunga ariga mu iwita: kuriang gotektek iwitata wonong tuagu te dagisan ale nunga sikisaki nunga manorsan, 17 'Ana bawe eleman wur amilmil ago iluman, bare nina me taiman iruman! Aking ana nangamang bataga ko wur iluman, bare betelatala nina me taiman nangarak niaman!' 18 Mu awuk, John tairam ale yu waen me nokaso, ale tom sang na yu naukko kuring kalokaso, se suen la aringiman ale balman, ‘Nu bur memek kumik ningi aniso!’ maman. 19 Se aking Kari ko Kuriang tairam ale kuring me kaolam, na yu waen am nowoso, se suen la noko balsan, ‘Kari ewere arigalko!’ masan. ‘Nu na biyala naso ale waen biyala naso tala.’ Ale ‘imi takis tata kari se memek betera ko kari alo nunga geraga suwan tala!’ ma balsan.
Mat 11:19 Kariimet John ko munan meman, aking Jesus ko munan agotala meman, bare nononga ura mu ura nunguning.
Bare iwita ikialko. Kaem ko ura kari alo nu kota ikia nunguning nungarso se te ura betesan, mu ura mu ko nunguning aratoso mu te arigal ale ko ikialko.”

Wonong saki me giris palagaman mu ikup aringimonko

(Luke 10:13-15)

20 Jesus wonong saki te kilek bibiya duap duap suen biya nunguningkiri beteram, bare nuna me ko giris palagaman. Buta se nu ining nungaram, ale iwita nunga maonam, 21 “O Chorazin kariimet alo, ikup ninguru ninga ira murokkowo! Se Bethsaida kariimet alo, nina betelatala ikup ninguru ninga ira murokkowo! Mu awuk, ani ninga ningi kilek bibiya sokel ago beterem se aringiman, bare nina me ko giris palagaman. E kari bo Tyre se Sidon wonong te kilek uwutata beteram ale mu, nuna maingkala giris palagaman, ale ko kausa nuna maingkala la mugum lilis giman ale magi kutuwa se nonoman maga se baga gilingisan ale. 22 Buta se ani ninga manorsam, tom Kaem kariimet nunga tuterukko tom mu te, ikup nina gialko mu Tyre se Sidon nunga ikup gimonko mu kiaruk ale ikup gotek am mena nunguningkiri gialkowo!

23 “Se nina Capernaum kariimet alo, ninga patawomon duruk wonong te ninga awumon i? Mena. Ninga sapomon se tama ningi nama kaparalkowo! Mu awuk, ani kilek yawara yawara ninga ningi beterem se aringiman, bare nina me ko giris palagaman. Kari bo girakala Sodom wonong te kilek uwutata beteram ale mu, Sodom kariimet giris palagaman se nunga wonong aitak am bagoso ale. 24 Buta se ani ninga manorsam, tom Kaem kariimet nunga tuterukko tom mu te, ikup nina gialko mu Sodom alo ikup gimonko mu kiaruk ale ikup gotek am mena nunguningkiri gialkowo!”

Jesus kariimet nonoman sapara nungarukko mam

25 Tom mu te Jesus iwita ko Nuet aru maonam, “O Ba, ni duruk ali ko Kari Biya. Ani nip patowasam. Mu awuk, ni kariimet ikia bibiya wore mel suen la imi me nunga kausem se me ikisan. Bare ni kuriang gotektek wore nunga kausem se ikisan. 26 Se Ba, ni ka gemang uwutata aniram se te beterem.”

27 Jesus buta ko Nuet aru maonam asele nu kariimet nunga maonam, “Aninga Ait mel suen la ani agiting te bita saparam.
Mat 11:27 Jesus mel suen biya iluwoso: Mat 28:18; Phil 2:9.
Kari bo ta Kuriang me ko ikiso. Mu Nuet kota suwanta ko Namar ko ikiso. Se betela kari bo ta Nuet ko me ikiso. Mu ko Namar kota Nuet ko ikiso. Se arikaya Namar kota nunga atumukiram ale Nuet nunga kausam umutang te asele nongota Nuet ko iki gilingisan. Bare kari bo bo mena.

28 “Nina arikaya mel ikup gi lagaman ale ningimik titimam mu, aningate tairal ale neneman saparalko.
Mat 11:28-30 Pharisee alo mel ikup kariimet gimonko nungarman, umutang mu munan aora biya karo tumonko balman: Mat 23:2-4; Acts 15:10. Jesus ko munan ana karo tunakko mu ikup mena: 1 John 5:3.
Ani mel gialko ningarik mu ikup biya mena, am guyak gotek. Se sumutang gial, ale aningate ikia talko. Mu awuk, aninga munan mu lila nunguningkiri, se aimi aip patowara ko munan mu aningate me aniso, se nenenga nengemang lila te bagaralko.”

29 

Copyright information for `WSK