Matthew 15

Pharisee alo nuguting anuwa ko munan ko Jesus ilak den tagikasan

(Mark 7:1-13)

Tom mu te Pharisee sang se Law Den ko kausa kari sang Jerusalem beteman ale Jesus kote taiman isarman, “Awuk se nika olekem alo munan anananga taleng girigir alo beteman wore nuna kiasan a? Tom nika olekem na namonko mu nuna girisan nuguting lilim la anusan asele na me nasan!”

Se Jesus nunga maonam, “Se nina awuk se Kaem ko munan den kiasan, ale nengeta ninga munan te namasan a? Kaem iwita balam, ‘Ni niam niet nuguring karo tui se nunup patawurko,’ mam. Ale aking balam, ‘Awiriya ko nuam nuet den memek te nunga manuk, mu moral se kuerukko,’ mam. Bare nina iwita balsan: Kari bo ko nuam nuet nunga manuk, ‘Ani manga bo te ninga sangikko karogo, bare ani maingkala Kaem tuekko bala se me te ninga bituekko,’ ma uwuta baluk, mu nina balsan nu ko nuet me te sanguk mu terong, ma balsan. Ale umutang te nina nengeta ninga munan sokel ago anirukko ago kaesan, ale Kaem ko den mel yam ko betesan.

“Nina sumu kawel kari alo! Prophet Isaiah mu Kaem kuring tam ale diram tala ninga balukaso:

‘Kariimet imi nuguring te aninga aip patowasan,
bare nunga nongomang tuagu ningi mu mena.
Fay Mark Nuna nuguring guang te la aip patowasan se mu me nunga sangukko.
Nunga kausa kariimet nunga kasursan mu kari ko ikia wore la.’
Mat 15:8-9 Isaiah 29:13.

Mel kariimet karur nungarso

(Mark 7:14-23)

10 Se Jesus kariimet motam biya nunga auram se nukote tai biguwuman, se iwita nunga maonam, “Den imi ikial ale ko nunguning ninguru ikialko. 11 Mel kariimet nuguring ningi namoso se nasan mu nongomang karur me nungarso. Mena. Mel kariimet nuguring te aratoso mu asele kariimet karur nungarso.”

12 Uwuta balam se ko olekem alo kote taiman ale isarman, “Pharisee alo ni den balem wore ko nongomang ikuwuram mu ni ikiem e?”

13 Se nu nunga maonam, “Tam mel singir la aninga Ait duruk te bagoso nu me aguwam, mu bila warukkowo. 14 Se Pharisee alo me nunga ikia talko! Nuna nomotam sisira, se nunga saki alo nomotam sisira tala wore lage nunga kasurmonko ago kaesan.
Mat 15:14 Rom 2:19-20 ago arikko.
Bare kari bo motam sisira se ko bo motam sisira tala, wore lage nu kausokko, mu ilagala la nama mutim ningi dagulomonkowo!”

15 Se Peter Jesus maonam, “Den sumu ko nunguning balu se ana ikinakko,” mam.

16 Se Jesus balam, “Nina betela me ikisan e? Mel suen biya kariimet nuguring ningi namoso se nasan mu nama nutagu ningi kaposo, se udagi karogo saraga siwu warsan. 18 Bare mel kariimet nuguring te aratoso mu nongomang ningi wore taiso, se mel borta kariimet karur nungarso. 19 Mu awuk, mel nongomang motam ningi aniso se tai aratoso mu iwita: ikia memek, kari mora se kuera, saman katagot, nongomang barasa, mel tere nana, den kawel, se sang alo nunga balu maguwura. 20 Kilek es imitang kariimet karur nungarso. Bare nagiting me anuwa ale na nana, mu mel sumu karur bo me nangarso.”

Canaan imet bo Jesus ko gomang ningi nunguning aram

(Mark 7:24-30)

21 Asele Jesus wonong mu beteram ale koma Tyre se Sidon wonong namara mu te namaram. 22 Se Canaan imet bo sor mu te bagakaso mu kote tairam ale aikaso ale wosengakaso, “O Kari Biya, David ko Kuriang, ni ani ago ko gemang batagukko! Aninga nanawus bur memek bo kumik ningi se nu memek biya bagoso.”

23 Bare Jesus den bo ta nu kumik te me balam. Se noko olekem alo kote namaman ale manorman, “Imet ewere ai nia nia ana nagowom karo lagoso pa!” maman. “Se ni balu se namurukko,” maman.

24 Se Jesus balam, “Ani Israel kariimet nuna sipsip yumura wore turan mu la nuna nongote tairem.”

25 Se imet mu tairam ale kumik duap te tararam bugura kulukuam ale balam, “Kari Biya, ni aninga sangaruko!” mam.

26 Se Jesus balam, “Kuriang nunga na mu gia ale kausik nungara mu me terong.”
Mat 15:26 Kuriang te balam mu Juda kariimet, se kausik te balam mu sor saki ko kariimet.


27 Se imet mu aking balam, “Kari Biya, ni nunguningta balsam. Bare kausik alo mu nunga kotam kotam nunga na bunetutuk aliti kaposo mu am no gilingisan.”

28 Nu uwuta balam se Jesus noko den koma balu tuam, “O imet,” mam, “ni gemang ningi nunguning biyala. Buta se mel ni ko balem mu kete aratukko.” Se tom umutang te la imet mu ko nanawus kumik terong mam.

Jesus kariimet kuera ikes karogo mu suen biya nunga nungam

29 Jesus sor mu beteram ale yu Galilee norogen la aolak iluwam nama duruk motongar bo te tarigi daigam. 30 Se kariimet suen biya nukote taikasan. Ale nunga saki alo nusuwik memek, nomotam sisira, aolak me iluwa, nuguring sisira, se kuera duap duap karogo mu nunga gikasan arungak taikasan, ale Jesus koma dugu te nunga awukasan, se nu nunga nungurukaso. 31 Se kariimet alo nuguring sisira mu munakakasan, nusuwik memek tilital mu aolak ilukasan, nomotam mena mu sor arikasan. Se kariimet mel mu aringiman ale ninguru tinga gilingiman. Ale Israel ko Kaem nup patawu gilingikasan.

Jesus kari 4000 na nungaram

(Mark 8:1-10)

32 Jesus ko olekem nunga auram se nukote taiman se nunga maonam, “Ani kariimet nunga aeman batagoso. Nuna ani agarak worem ilagala suwan bagaman ale aitak na inang ito namonko wore mena. Se aninga angamang nunga awurek se nuna ipi namomonko me aniso. Mu nuna nunga wonong te namawa lage te nomotam bungiok se dagulomon bore ko.”

33 Se ko olekem alo nu isarman, “Ana sor imi wonong bo ewela me aniso. Se ana aparete na biya nuam aringinak ale kariimet nungarnak se namonko ya?”

34 Se Jesus nunga isuam, “Nina bread awila aniso ya?” mam.

Se nuna balman, “Ana bread 7 se wal gotektek suen mena,” maman.

35 Uwuta balman se Jesus kariimet nunga maonam se dagiman. 36 Asele nu bread 7 wal karogo giam ale Kaem Biya amilmil tuam, ale pakokaram se kaparam, ko olekem alo nungaram, se nuna kariimet nungaru gilingiman. 37 Se nuna suen la na naman nungumik karogo terong ma sapaman. Asele olekem alo na nukum wogaram mu bolala awuman ale korokem 7 tuguman se kuring aratu namaram. 38 Se kari na naman mu ko tom mu 4000, se imet kuriang mu me nunga kauman. Asele Jesus kariimet nunga awuram se namakasan, se nu dal te aragam, ale Magadan sor te namaram.

39 

Copyright information for `WSK