Matthew 18

Awiri kingdom ningi nup biya bagoso?

(Mark 9:33-37, 42; Luke 9:46-48; 17:1-2)

Tom mu te olekem alo Jesus kote taiman ale isarman, “Duruk wonong ko kingdom ningi mu awiri nup biya bagoso ya?”

Se Jesus kuriang gotek bo auram se tai nomokete sanamaram, asele nu balam, “Ani nunguningta ninga manorsam, nina geragal ale kuriang gotektek imi nunga tuar me aratal, mu nina duruk wonong ko kingdom ningi me kasu naguralko. Kari awiriya kota numi ira kutuwuso ale kuriang gotek imi ko tuar bagoso, mu nu duruk wonong ko kingdom ningi mu nup biya bagoso.

“Se awiriya aninga aip te kuriang bo es imi iwita gomang tuso ale aru taso, mu nu ani agotala gomang aisiso ale aru taso. Bare awiriya kuriang gotektek ani ago ko nongomang ningi nunguning wore nunga ningi bo ikia memek kausok se kilek memek te dagulok, mu kari sang kari mu am ngual ilumon ale manga bo ikup biya mu dogotak karogo kalomon ale gagi ningi sapomon se sarenga namurukko mu asele terong.

Kilek memek mu kariimet nunga nongomang ningi nunguning maguwuso

(Mark 9:43-47; Luke 17:1-2)

“Ayo, ikup biya ali imi ko kariimet nunga irokkowo! Mu awuk, ikia memek se kilek memek kariimet nunga tagirok se te memek betemonko mu ninguru tala ali imi te aniso. Se ira ariga uwutata aratu aratu namurukkowo! Bare kari nu kilek ikia memek mu saki alo nunga kasurso, mu kari mu koma ikup biya nunguningkiri taukkowo!

“Se nika deleng agi, kiting agi memek lage te ka beteso agi mu, am bataguru saparko. Mu awuk, ni kiting suwanta agi, deleng suwanta agi, bare marak yawara pempem la te lagerko mu to mu ningo. Bare ni siwik ilagala se kiting ilagala karogo baga se tama pempem la kaniwoso mu ningi ka sapomonko, mu memek biya. Se aking ka motam lage memek te ka beteso agi mu, ni am galuwu saparko. Mu awuk, ni motam suwanta bare marak yawara pempem te lagerko mu to mu ningo. Bare ni motam ilagala karogo baga se ni tama pempem la kaniwoso mu ningi ka sapomonko, mu memek biya.

Sipsip yumuram ko den ira

(Luke 15:3-7)

10 “Nina ninguru sinar talko! Nina kuriang gotektek imi nunga ningi bo mel yam ko iwita me nungarki pateralko. Mu awuk, ani ninga manorsam, duruk wonong te nononga engel alo aninga Ait wore ko koma motam pempem la ari lagasan. 11 
Mat 18:11 Batoga sang girakala Greek den te batagorman mu te den imi ago aniso: “Ani Kari ko Kuriang kariimet sarenga namara ko lage te bagasan mu nunga sangaru taikko tairem.” Den imi Luke 19:10 mu te ago aniso.


12 “Nina awuk ikisan? Kari bo ko sipsip 100 karogo se bo yumuram, mu nu awuk mauk i? Mu nu saki 99 nunga awurok se duruk luan te no gi se bagomon se nu namuruk bo yumuram mu ko loagurukko. 13 Ani nunguningta ninga manorsam, nu sipsip umutang arigok, mu nu ko ninguru amilmilurukko. Se ko amilmil umutang mu sipsip 99 me yumuman mu ko amilmil nogo ko mu kiarukko. 14 Koma suwanta tala, nenenga Nenet duruk te bagoso mu kuriang gotektek imi nunga ningi bo yumurokko me kueso.”

Ka bo kimik te memek betera se aking ilak nengemang motam nunga ko munan

15 Jesus ko olekem alo nunga maonam, “Se ka bo memek kimik te bitiruk, mu ni kote namar ale nina ilagala nengeta diram baga se, ko memek ni kimik te beteram mu manaru se ikiokko. Se nu nika den ikiok, mu nina launuria yawara bagaralko.

16 “Bare ka den me ikiok, mu kari suwanta agi ilagala iwita nunga gi arungak kote namarko. Se nu den aguwaya baluk, mu nina suen la ikialko. Kaem ko batoga te balso iwitata, kari ilagala agi ilagala suwan iwita kari aguwaya beteram wore ko dugu duap balmon se den koma suwanta iwita ikial, mu asele nononga den mu nunguningta malko. 17 Se butata beteralko. Bare aking nu nononga den betela me ikiok agi mu, namaral Kaem ko kariimet nunga bolala awural ale den nunga maonal se ikimon ale ilak munakomonko. Se nu nunga den betelatala me ikiok, mu nina nu kari Kaem ko me ikia agi, takis tata kari iwitata ko beteral ale nibiring tualko.
Mat 18:15-17 Ikup bo ilak nunga ko den: Gal 6:1; 1 Cor 6:6,10.


18 “Ani nunguningta ninga manorsam, nina ali imi te anapeya ko lage kalosan, mu duruk wonong te agotala ZZZ kalokko. Aking nina ali imi te anapeya ko lage kuring kagorsan, mu duruk wonong te agotala kagukko.

19 “Se ani aking bo agotala ninga manorsam, nina ningi ilagala agi, ali imi te mel bo ko nengemang suwan awural ale ko ngatangaral, mu aninga Ait duruk te bagoso mu ningarukko. 20 Mu awuk, ilagala agi, ilagala suwan agi, aninga aip te bolala awumon agi, bare mu ani nongorak la bagirikko.”

King bo ko ura kari, nu ko ura suwan ko ikup me kutuwuram, wore ko den ira

21 Se Peter Jesus kote tairam ale maonam, “Kari Biya, tom awila ko aninga bo memek ani angimik te beteso mu ko koma siwu sapirikko ya? Agi tom seven iwita mu terong i?”

22 Se Jesus nu maonam, “Ani tom 7 iwita mu te la memek siwurko ani me balsam. Mena. Bare ani iwita balsam, nu tom suen biya nunguningkiri ni kimik te memek bitiruk agi, bare ni am ko memek siwu saparko.
Mat 18:22 Memek siwura ko munan: Psalm 103:12; Eph 4:32; Col 3:13.


23 “Ikialko. Duruk wonong ko kingdom mu king bo ko gomang motam ko ura kari kote ikup beteman wore taimon ale ilak nungurmonko iwita. 24 Se king mu ura duap beteram, se ko ura kari bo 10 million kina ko ikup nukote aniram mu diruwuman ilak nukote taiman. 25 Bare ura kari mu money bo ikup mu te kutuwurokko mu mena. Se king mu balam, kari mu ko imet kuriang arungu, se nunga meltutuk suen la karogo nunga diamon ale ko koma money tamon ale ikup mu te kutuwumonko mam. 26 Se ura kari mu king koma dugu te bugura kulukuam ale ilak wosengam, ‘Ni ani ago ko neman bataguk se am aga kimi bita sager se aninga ikup nikate aniso mu kutuwu sapirikko,’ mam. 27 Se king ko ura kari mu ko noman batagam se ikup mu am menawuram ale balam, ‘Am namarko,’ mam.

28 “Bare ura kari mu aratam ale aking ko ura suwan bo noko ikup 100 kina nukote aniram mu arigam, ale kote namaram ale dogotak te iluwam ale ituwam ale maonam, ‘Aninga ikup nikete aniso mu kutuwu saparko!’ mam.

29 “Se ko ura suwan mu nu koma te bugura kulukuam ale ilak wosengam, ‘Ni ani ago ko neman bataguk se am aga kimi bita sager se ani ikup mu kutuwurikko,’ mam. 30 Bare ura kari mu meram. Ale ko ura suwan mu am talipara ningi beteram, nu mu te baga se la nama ko ikup kutuwu sapuruk, mu asele aratukko uwutata beteram.

31 “Se ura kari saki munan nu beteram mu aringiman ale nongomang ninguru magaram. Ale namaman kilek nu beteram mu king manorman. 32 Se king ura kari mu auram se tairam se iwita maonam, ‘Ni ura kari memek!’ mam. ‘Ni girem aningate niarem se ani angamang kisem ale nika ikup suen la menawu saperem! 33 Se ni awuk se ka ura suwan me gemang tuem?’ 34 Ale king mu gomang ninguru magaram se ura kari mu talipara ningi beteram, nu mu te yaman to se baga laga, nama ikup mu suen la kutuwu sapuruk umutang mu asele aratukko.”

Jesus den ira imi ko olekem nunga maonam, asele balam, “Mu turantala, nina ninga sikisaki memek ningimik te betemon se me siwu saparal nunguningkiri, mu Kaem nina betesan turantala bitiruk, ale ninga memek me siwurokko.”

35 

Copyright information for `WSK