Matthew 19

Jesus nuwus-kuari numi mera ko den balam

(Mark 10:1-12; Luke 16:18)

Jesus den mu balu kutuwuram mu nu Galilee beteram ale Judea sor ningi Yu Jordan komasang te mu te namaram bagakaso. Kariimet suen biya kote namakasan. Se nu sor mu te saki kuera karogo mu nunga nungurukaso.

Se Pharisee kari saki nukote taiman ale ira aringimonko iwita isarman, “Se anananga Law Den awuk balso ya? Kari bo ko nuwus munan gotektek sikina bita paguwurok mu ko nuwus am karuk i?”

Se Jesus nunga den koma balam, “Nina batoga imi me kauman ikiman e? Duap te nunguningkiri, tom Kaem mel suen biya beteram tom mu te, nu ‘kari beteram ale imet beteram’, ale mu ko iwita balam, ‘Se umutang ko kari bo ko nuamnuet nunga awurok, ale ko imet ilak kapeturuk, se nuna ilagala mu suwanta bagomonko.’ Se udagi mu nuna ilagala kirker mena, bare suwanta diram. Buta se Kaem kari imet nunga biguwuram, mu udagi kari bo me nunga batagukko.”

Se Pharisee nu isarman, “Bare awuk se Moses munan ewere nangaram? Kari ko imet karukko mu nu girok tam gawa bilik te iwita bataguk ale baluk, ‘Ani imet imi karosam,’ ma baluk, ale tam gawa mu imet tuok se iluwok ale asele karukko.”

Se Jesus koma balam, “Nina nengemang motam aora biya se mu ko Moses imet kaora ko munan sumu ningaram. Bare duap te nunguningkiri mu munan bo uwuta mena. Ani ninga manorsam, kari awiriya ko nuwus saman katagot me beteram bare am karoso ale imet bo iru taso, mu nu nuwus-kuari ko munan batagarso ale memek beteso.”
Mat 19:9 Nuwus-kuari numi mera ko den: Gen 1:27; 2:24; Mat 5:32; 1 Cor 7:10-11. Kari imet me gisan nunga den: 1 Cor 7:1-2, 7-9.


10 Se ko olekem alo nu manorman, “Nuwus-kuari ko munan uwutata agi mu kariimet nunumi me gimonko mu asele terong!”

11 Bare Jesus nunga maonam, “Kariimet numi me gia ko munan mu kariimet suen biya karo tumonko mena, bare kariimet sang la Kaem munan umu nungaram. 12 Kari saki imet gimonko me terong, mu awuk, nunam tuagu ningi la nunga nungumik uwutata bilangaman. Se aking kari sang mu nunga saki alo nunga maguwuman se imet gimonko me terong. Se aking saki mu duruk wonong ko kingdom ko ura tamonko se imet me gisan. Se kari den imi tamonko terong mam mu tamonko.”

Jesus kuriang gotektek marak nungaram

(Mark 10:13-16; Luke 18:15-17)

13 Se kariimet saki nunga kuriang arungak Jesus kote taiman. Nononga nongomang Jesus ko kuting kuriang nungumik te bitiruk ale nogo ko ngatangurukko. Bare noko olekem alo kariimet ining nungarman.

14 Bare Jesus balam, “Nina kuriang gotektek me nunga kaoralko, am nunga awural se aningate taimonko. Mu awuk, duruk wonong ko kingdom mu kariimet kuriang gotektek es ta imitang iwitata wore nunga.” 15 Uwutata balam ale nu kuting patowaram nungumik te beteram ale marak nungaram. Asele nu aolak iluwam ale namakaso.

Kari kulak bo kumik mel suen biya karogo wore Jesus isa bo tuam

(Mark 10:17-22; Luke 18:18-23)

16 Se tom bo kari kulak bo Jesus kote tairam ale isuam, “Nanga kari biya,” mam, “ani kilek yawara awuk bore bitirik mu marak yawara tom suen biya te bagirikko mu taikko ya?” mam.

17 Se Jesus nu maonam, “Ni anape ko aninga isarsam, mel awuk bore ningo ya masam? Kaem kota suwanta diram yawarakala. Se ni marak yawara te baga lagerko mu munan den suen la karo tuiko.”

18 Se kuring kulak mu balam, “Munan den awuk bore ya?” mam.

Se Jesus nu maonam, “Ni kari bo me moar se kuerukko. Ni saman katagot bitar ale nuwus-kuari ko munan me maguwurko. Ni me tere noko. Ni kari bo kumik te den kawel me baluko.
19 Ni niam niet nuguring karo tui se nunup patawurko. Ale ni keta nimi ko kuesam iwitatala ka bo ko kuarko. Munan den imitang karo tuiko.”

20 Se kari kulak mu balam, “Munan sumu ani suen la karo tui saperem. Se anape mel karogo bitirikko?”

21 Se Jesus nu maonam, “Ni diram nunguningkiri bagerko ko kuar agi mu, namar ale ka melmasak suen la dia sapar ale, ko manga to ale kariimet nungumik mel mena mu nungaruko. Ni uwuta bitar mu nika mel yawara yawara duruk wonong te anirukko. Asele tair ani agowom karoko.”
Mat 19:21 Mel dianak, ko manga tanak ale saki alo nungarnakko: Mat 6:20; Acts 2:45; 4:34-37.


22 Se kari kulak mu den mu ikiam ale noman bataga se namakaso. Mu awuk, nu ko manga mel suen biya karogo se.

Jesus kariimet nungumik mel suen biya ago wore nunga den balam

(Mark 10:23-27; Luke 18:24-27)

23 Se Jesus ko olekem nunga maonam, “Ani nunguningta ninga manorsam, kariimet nungumik mel suen biya ago mu nuna duruk wonong ko kingdom ningi kasu nagumonko mu ura kowar nunguningkiri. 24 Se ani akingtala ninga manorsam, camel mu guang te birira ko nil ko gogong gotek mu ningi kasu nagurokko mu ikup biya. Bare kari ko manga melmasak suen biya mu Kaem ko kingdom ningi kasu nagurokko mu ikup biya nunguningkiri!”

25 Se olekem alo den mu ikiman mu nuna ninguru biririkiman ale nu isarman, “Buta mu arika marak yawara tom suen biya te bagomonko mu tamonko ya?”

26 Se Jesus nungarki se balam, “Kariimet mel imi betemonko me terong. Bare Kaem mu mel suen biya bitirukko terong mam.”

Olekem alo koma yawara tamonko

(Mark 10:28-31; Luke 18:28-30)

27 Se Peter nu maonam, “Ana nanga mel suen la awu beteman ale ni kewom karoman. Se ana anape mel tanakko?”

28 Se Jesus nunga maonam, “Ani nunguningta ninga manorsam, tom mel suen biya iru aratukko tom mu te, Kari ko Kuriang king ko daiga kuwim nikinang kapawara mu te daigok, se nina aninga olekem alo mu king ko daiga kuwim 12 tala mu te daigal, ale Israel kariimet motam 12 mu nunga tuteralko.
Mat 19:28 Mel suen biya iru aratukko tom: Acts 3:21. Tutera ura: Mat 25:31; Luke 22:30; Rev 3:21.
29 Se arikaya ani agowom karomonko mu ko nunga kawam, nunga launuria, korasari, nunam nonet, kuriang alo, se ningam nunga awu beteman ale agowom karoman, mu Kaem mel nuna awuman mu ko koma mel buta buta suen biya nunguningkiri nungarukkowo. Ale marak yawara tom suen biya te bagomonko mu ago nungarukkowo. Bare ikialko. Kariimet suen biya aitak gira motam te anisan, mu nuna udagi te nukum te biya pelemon ale bagomonko. Se kariimet suen biya aitak nukum te biya anisan, mu maingte gira motam te nunguningkiri bagomonko.”

30 

Copyright information for `WSK