Matthew 2

Baras tutera kari Jesus aringimonko taiman

Jesus Judea ningi wonong Bethlehem mu te bilangaram. Tom mu te Herod king ko bagakaso. Se kam me maiyam baras tutera kari alo koma worem bausa mu te bagaman mu sor mu beteman ale tai Jerusalem arataman ale iseman, “Kuriang Juda nunga king bagurukko bilangaram mu apoko ya? Ana koma worem bausa owore te baga se ko baras aratam mu aringiman, ale ko nup patowanakko taiman.”

Se Herod den mu ikiam biririkiram ale gomang ikuwuram. Se Jerusalem kariimet suen biya tala ikiman ale tengeman. Se Herod nu priest bibiya se Law Den ko kausa kari bibiya mu nunga bolala awuram ale nunga isuam, “Koma awuk bore te Kristus bilangurukko ya?” mam.

Se nuna balman, “Judea ningi wonong Bethlehem mu te aratukkowo!” ma balman. “Mu prophet den iwita bataguru beteram:

‘Ni Bethlehem, Juda nunga sor te, ni wonong yam bo mena,’ mam,
‘nika ningi kari supuling biya bo tai aratuk
ale aninga kariimet Israel nunga Bitua Kari bagurukko,’ mam.”
Mat 2:6 Micah 5:2.

Se Herod den mu ikiam ale tetela la baras kaura tutera kari nunga auram se taiman se nunga isuam, “Tom amaru baras aratam a?” mam. Se nuna balman se ikiam, ale nunga maonam, “Nina namaral kuriang mu ninguru ko loagaral ale arigalko. Arigal asele tairal aga maonal se ani betela namirik nup patawirikko.”

Se nuna Herod ko den ikiman ale namakasan. Se baras nakanang, nuna koma worem bausa te baga se aringiman, umutang giram namakaso, se nuna kowom karoman namakasan. Se baras nama kawam kuriang te bagaram mu te sanamaram. 10 Se nuna baras aringiman ale nongomang ninguru amilmilaram. 11 Ale kawam ningi kasu naguman ale kuriang nuam Maria ilak nungarkaman, nubugura kulukurman ale nup patowaman. Asele nunga munan mel giman ago taiman, mu gi kuriang awu tuman: gold, se kaur siring yawara (nup frankincense), se yu gureng siring yawara (nup myrrh), mu gi kuriang awu tuman.

12 Se Kaem ipingira te nunga maonam, nuna pelemon Herod kote me namomonko balam. Buta se nuna lage bo kigilik mu te peleman nunga sor te namaman.

Jesus ko nuamnuet giman ilak Egypt namaman

13 Baras kaura tutera kari nama gilingiman, se Kari Biya ko engel bo ipingira te Joseph kote aratam ale maonam, “Herod kuriang kupok arigok ale moruk se kuerukko ikia towoso. Se ni bares ale kuriang nuam ilak nunga gi ale arungak Egypt namarko,” mam. “Ale mu te bagerko. Se agata sor mu bitarko ka manik asele arungu piler tairko.”

14 Se Joseph barasam kuriang ko nuam ilak nunga giam ale turom la sor mu beteram ale arungu Egypt namaman. 15 Ale mu te arungu bagaram se Herod kueram. Mu Kaem ko den prophet kuring te balam mu ko nunguning aratukko se mel mu butata aratam. Kaem prophet kuring te iwita balam, “Aninga kuriang kari Egypt bagaram se aurem se tairam.”
Mat 2:15 Hosea 11:1.


Herod balam se Bethlehem sor te kuriang kari suen biya nunga moman se kueman

16 Se tom Herod ikiam baras tutera kari nu kulurman se ikiam, mu nu ninguru gomang magaram. Se nu den baras tutera kari nu manorman mu ko iki se, kari sang nunga maonam se Bethlehem wonong se, wonong sang Bethlehem duap te mu nunga kuriang kari yar ilagala suwan ko bowa ningi mu suen la nunga moman se kua sapaman.

17 Mu te Kaem ko den prophet Jeremiah kuring te balam mu ko nunguning aratam:

18 “Nuna Ramah wonong te nirung aratukaso mu ikiman,
mu nongomang bataga niara ma nirung.
Rachel ko kuriang nunga nia mokaso,
se kariimet gomang eremonko me terong.
Mu awuk, noko kuriang suen la bo me bagaman.”
Mat 2:18 Jeremiah 31:15. Rachel maso mu Israel imet alo nunga balso.

Jesus ko nuamnuet giman ilak Israel peleman namaman

19 Se Herod kueram, se Joseph Egypt baga aniwaram se Kari Biya ko engel ipingira te kote aratam, 20 ale maonam, “Kari kuriang momon se kuerukko mu kua gilingiman. Se ni bares kuriang nuam ilak nunga gi ale peleral Israel sor te namaralko,” mam.

21 Se Joseph barasam kuriang ko nuam ilak nunga giam ale arungu Israel peleram namaram. 22 Bare nu Archelaus, nuet Herod ko kuwim te Judea sor te king bagoso mu ko den ikiam, ale sor mu te namurukko nguangakaso. Se aking ipingira te Kaem nu maonam, se nu Galilee sor te arungu namaram. 23 Ale wonong Nazareth mu te bagakaso. Se mu te prophet alo girakala Jesus ko den balman, “Nuna nu balmon Nazareth kari mamonko,” mu den mu ko nunguning aratam.

Copyright information for `WSK