Matthew 23

Pharisee se Law Den ko kausa kari alo nunga munan

(Mark 12:38-40; Luke 11:39-52; 20:45-47)

Se Jesus kariimet motam biya se ko olekem alo den nunga manarukaso. Nu balam, “Law Den ko kausa kari se Pharisee alo mu nuna Moses ko kuwim te den ninga kasursan. Buta se nononga den suen la ikial ale te beteralko. Bare kilek nuna betesan mu nina me beteralko! Mu awuk, nuna den kasik biya balsan bare nongota me karo tusan. Ale nuna munan den sengenang ikup bibiya iwita kalosan ale saki alo nubiwinang te ituwusan. Bare nuna nongota nuguting patowasan ale peperek bo ta sengenang mu me sangorsan.

“Nuna munan kasik biya betesan mu kariimet te aringimonko la betesan. Singir gotektek Kaem ko den ningi betesan ale nomoke sail te se nuguting karogo kalosan bare nuna mu bibiya nungursan. Ale nunga guang norogen te buranong maiya maiya nungursan se kapa kekeso.
Mat 23:5 Singir gotektek: Exo 13:9; Num 15:38-39.
Se nuna na yu biya betera ko kam te, mu kuwim nup karogo wore te la dagimonko kuesan. Ale synagogue ningi mu kariimet nomokete gira dagimonko kuesan. Nuna biguwura kuwim te kariimet ningi aolak ilumon geragomon se kariimet nunup patawomon amilmil nungarmon, ale nunga arumon ‘Kausa kari’ mamonko ninguru ko kua gilingisan.

“Bare nina mu kariimet ninga arumon kausa kari ko me ninga arumonko. Mena. Mu awuk, kari suwanta diram nenenga Kausa Kari, se nina suen la launuria. Se aking nina ali imi te kari bo aural ale nenenga Nenet ko me balalko. Mu awuk, nenenga Nenet suwanta diram duruk wonong te bagoso. 10 Se aking nuna nenenga arumon ale ‘Kari biya’ ko me ninga arumonko. Mu awuk, nenenga Kari Biya suwanta diram, mu Kristus. 11 Nenenga kari supuling mu nenenga ura kari ko bagurukko. 12 Mu awuk, kari awiriya kota ko nup patawoso, mu Kaem nu ira kutuwurok se kapurukko. Se aking kari awiriya kota numi ira kutuwuso ale nup mena iwita lagoso, mu Kaem nu patawuruk ale nup biya tuokko.

13 “Nina Law Den ko kausa kari se Pharisee alo, nina sinar talko! Nina kawel kuruwim! Nina sumu kariimet duruk wonong ko kingdom ningi kasu nagumonko wore nomoke kalosan. Ale nina nengeta mu me ningi kasu nagusan. Bare mu la mena, kariimet kasu nagumonko negesan wore nina nomoke kalosan. 14 
Mat 23:14 Batoga saki girakala batagorman mu te den imi ago aniso: “Nina Law Den ko kausa kari se Pharisee alo, nina sinar talko! Nina kawel kuruwim! Nina sumu imet nugari kueman wore nunga kulursan ale ninga kawel te nunga kawam melmasak tere gisan. Ale kariimet te ningarkomonko ngatangara kopa maiya biya betesan. Umutang ko nina memek biyala talko!”


15 “Nina Law Den ko kausa kari se Pharisee alo, nina sinar talko! Nina kawel kuruwim! Nina kari bo arigal ale tal ninga olekem ko beteralko gagi batagorsan awar namasan geragasan. Se tom nama kari bo nenenga olekem ko tasan, mu nina ikia memek kasursan, se kilek memek kasik biya te nenenga kiaso ale nenenga turan tala tama ningi namara ko lage te bagoso.

16 “Nina kausa kari alo, nina sinar talko! Nina kari sang lage nunga kasursan, bare nina nengeta mu nemetam mena! Nina balsan, ‘Kari bo temple ko nup te ko den balam mu sokel tuso ale nunguningta nunguning maso, mu ko den balam mu am kuamili sapurukko,’ masan. ‘Bare kari bo temple ko gold nup te ko den sokel tuso, mu nu mel bitirukko balam mu am bita sapurukko,’ ma iwita balsan. 17 Bare ikia sumu am ngualara! Nina nemetam mena alo! Nina awuk ikisan? Mel awuk bore gira biya aniso? Gold mel gira biya agi, temple gold kako awuso wore gira biya e? Mu temple mu asele gira biya!

18 “Se aking nina iwita balsan, ‘Kari bo altar nup te ko den balam mu sokel tuso, mu nu ko den balam mu am kuamili sapurukko,’ masan. ‘Bare kari bo bulamu na mel altar te aniso mu nup te ko den sokel tuso, mu nu mel bitirukko balam mu am bita sapurukko,’ masan. 19 Nina nemetam mena alo! Nina awuk ikisan? Mel awuk bore gira biya aniso? Bulamu na mel altar awete aniso mu gira biya agi, altar bulamu na mel kako awuso wore gira biya e? Mu altar bare asele biya!

20 “Ikialko. Awiriya altar nup te ko den balam mu sokel tuso, mu nu altar se bulamu na mel altar awete aniso mu karogo la nup te balso. 21 Se aking awiriya temple nup te ko den balam mu sokel tuso, mu nu temple se Kaem temple te bagoso mu karogo tala nup te balso. 22 Se aking awiriya duruk wonong nup te ko den balam mu sokel tuso, mu nu Kaem ko daiga kuwim biya mu karogo tala nup te balso, ale nu Awiriya daiga kuwim nukung te dagiwoso mu karogo nup te tala balso.

23 “Nina Law Den ko kausa kari se Pharisee alo, nina sinar talko! Nina kawel kuruwim! Nina tuwer sinam se meltutuk gotektek gisan ale motam 10 bolala awusan ale suwanta Kaem tusan. Se mu terong. Bare nina munan den bibiya ningamili saparam, mu iwita: munan diram te la saki arungu bagara, kariimet gemang tua, se gemang ningi nunguning te mel betera, mu munan bibiya umutang mu karo tualko nunguningkiri. 24 Nina sinar talko! Nina kariimet saki lage nunga kasursan, bare nina nengeta mu nemetam mena! Nina kuwuling kumin ningi tagoso mu ganap te wota sapasan, bare mel biya camel mu nina me arigisan ale am kumin karogo no lakusan.
Mat 23:28 Juda alo kuwuling se camel nunguning me ta namonko: Lev 11:4,23.


25 “Nina Law Den ko kausa kari se Pharisee alo, sinar talko! Nina kawel kari! Nina taiwir bagun ko kumik guang la anusan, bare ko naung ningi mu tere daong kilek, se nengeta ninga ikia karo tua ko munan mu kuring aratam. 26 Ni Pharisee, ni metam mena! Gir ale bagun ko naung ningi anup se nikitang paguk umutang mu ko kumik guang mu karogotala nikinang pagukko!

27 “Nina Law Den ko kausa kari se Pharisee alo, sinar talko! Nina kawel kuruwim! Nina sumu kari kuera nunga ali motam awete bala siraram te iluman se ko ariga yawarakala aniso wore turan. Bare ko ningi mu kari kuera nunga nosokel se karur aromemek te aniso. 28 Se nenenga bagara mu uwutatala. Kariimet ningarkasan mu kari diram ko ninga balsan, bare nenenga nengemang ningi mu kawel aromemek se kilek memek ninguru nunguningkiri karogo aniso.

29 “Nina Law Den ko kausa kari se Pharisee alo, sinar talko! Nina kawel kari! Nina sumu prophet alo kueman wore nunga ali motam ninguru nunguru gilingisan. Ale kari diram alo mu nunga ali motam mu bala tusan. 30 Ale balsan, ‘Nanga taleng girigir alo prophet alo nunga moakasan se kuakasan. Bare ana tom mu te karogo bagaman ale mu, ana arungak uwutata me bitakasan ale.’ 31 Nina uwuta balsan. Bare den umutang te tala nina ninimi wetang te balsan, nina kari girakala prophet alo nunga moakasan se kuakasan wore nina nunga kuriang imas bagasan ma balsan. 32 Buta se am namaral ale ninga taleng girigir alo nunga ura bitawa kueman wore ko nukum patowaral ale ago nama menawuralko!
Mat 23:30-32 Stephen taleng girigir alo nunga den sang ago balam: Acts 7:51-52. Kari bibiya maingkala Jesus momon se kuerukko den nungurman: Mat 21:38-39,46.


33 “Nina ma urer! Se ma urer alo nunga gotek alo mu nenengeta! Se nina memek me tal i? Mu Kaem koma memek ningaruk se tama ningi namaralkowo! 34 Umutang ko ani prophet saki, se ikia kari saki, se kausa kari saki nunga awurek se nenengate taimonko. Se nina saki nunga moral se kuemon, saki mu tam kangono te nunga tagiral, se saki mu ninga synagogue ningi nunga lilumaral, ale nunga karo karo arungu wonong wonong geragalko.
Mat 23:34 Jesus ko den balam mu butata aratam: 1 Thes 2:15-16 se den saki agotala.
35 Umutang te nina nigiting gue karogo bagaralko. Se duap te Cain ko uria Abel moram se kueram, eng karo karo prophet nunga moman se namaram, eng tai tai ulengkata Berekiah ko namar Zechariah, nu temple ningi tama betera kuwim se kuwim kako mu ko kusumuri bagaram se nina nengeta moman se kueram, bare kari diram imitang suen la nunga gue mu nina nigiting te aniruk se ko koma memek talko! 36 Ani nunguningta ninga manorsam, nina tom imi ko kariimet mu memek suen la imi ko koma talko.

Jesus Jerusalem ko mam niaram

(Luke 13:34-35)

37 “O Jerusalem, Jerusalem! Nina prophet alo nunga mosan se kuesan, se kari saki tala Kaem nunga beteso se nengete taisan mu manga te nunga usagasan se kuesan! Tarak nuam ko gotek nunga gi luman bowa ningi nunga tuguso ale nunga bitarso iwitatala, ani tom suen biya ninga biguwurek ale angamang ningarikko, bare nina miakasan. 38 Buta se ikialko, nenenga temple mu am ipi anirukko.
Mat 23:38 Kaem Jerusalem alo nunga meruk ale Jerusalem wonong se ko temple karogo bitirukkowo: 1 Kings 9:6-9; Jer 12:7; Matt 24:1-2.
Mu awuk, ani iwita ninga manorsam, nina ani bo karogo me agarkal nama tom udagi nina iwita aga balal, ‘Kaem kari imi marak sokel tuam se nu Kari Biya ko nup te taiwoso,' ma balalko asele.”

39 

Copyright information for `WSK