Matthew 24

Ikup duap duap aratukko

(Mark 13:1-13; Luke 21:5-19)

Jesus temple beteram ale namakaso se ko olekem alo kote taiman ale temple kawam nu kasurukasan. Se nu balam, “Nina mel imi suen la arigisan e? Ani nunguningta ninga manorsam, maingte manga temple te kaloman imi mu bo ta numi awete me bagomonkowo, mu suen la pakaku warmon se kapa sapurukko.”

Jesus Duruk Olive te nama daigam se ko olekem alo kote taiman, ale nongota diram baga se nu isarman, “Mel mu amaruya te aratukko wore ni nanga manaru se ikinakko. Se anape kilek aratuk se ana te ikinak mu nika taira tom manak se tom nukum aratukko ya?”

Se Jesus nunga maonam, “Nina kari saki ninga kulurmon bore ko ninguru sinar talko! Mu awuk, kawel kari kasik biya taimon ale aninga aip te nunumi balmon, ‘Anigita Kristus,’ mamon ale kariimet suen biya nunga kulurmonko. Nina kager pingi se awar mu ko den nirung ikialko, bare mu ko me biririkiral ale me ko nguangaralko. Mel imitang aratukkowo. Bare tom nukum mu te me tai aratoso, tom nukum mu aitak.

“Wonong sor bo barasuk bo ilak kagerurukko, se king bo barasuk bo ilak butatala numi iluwokko. Karak biya wonong saki nunga morukkowo, wanara bibiya sor saki te kapurukko. Mel suen la imi mu imet kuriang iluwokko se kumik yaman ikia duap beteso wore turan.

“Tom mu te nuna nenenga ilumon ale yaman ikup biyala ningarmon ale ninga momon se kueralko.

Aninga aip nenenga te aniso, se umutang ko ali sor suen biya te kariimet nenenga ko nongomang ninguru magurukkowo.
Mat 24:9 Nuna Jesus ko olekem alo nunga bita maguwumonko: John 15:18-21.
10 Se tom mu te kariimet suen biya nunga nongomang ningi nunguning mu sapomonkowo, ale nunga saki alo nunga nongomang maguruk se kager kari nuguting te nunga betemonko. 11 Se prophet kawel suen biya aratomon ale kariimet suen biya nunga kulurmonko. 12 Se kilek memek memek biyala aratuk se mu te kariimet suen biya nunumi nongomang tuiwara mu mena namurukko. 13 Bare awiriya ani buring me aisuk, am sokel karogo sanamuruk nama tom nukum te, umutang mu Kaem nu sangaru taukko. 14 Se nuna kingdom ko den gilalong yawara imi apumon karogo ali lilim te geragomon se kariimet ikimonko. Asele tom nukum kapurukko.

Ikup aromemek Jerusalem wonong irokko

(Mark 13:14-23; Luke 21:20-24)

15 “Maingte nina mel memek nunguningkiri prophet Daniel ko balam mu temple ningi sanamiwuruk se arigalkowo.
Mat 24:15 Mel Daniel ko balam: 9:27; 11:31-32; 12:11. Den imi ago arigalko: Luke 21:20; 2 Thes 2:3-10; Rev 13:1-10, 14-15.
(Kari den imi kaurok mu ninguru ko ikia taukko.)
16 Se tom mu te nina arikaya Judea sor te bagasan, mu nagural duruk kulupik ningi nama saparalko. 17 Se kari bo ko kawam gul te baguruk agi mu, nu kapuruk ko melmasak kawam ningi aniso mu me ta giokko, nu am diram nagurok namurukko. 18 Se kari bo ko ningam te baguruk agi mu, nu peleruk ko guang bo me ta taukko.

19 “Tom mu te imet nutagu karogo, se imet kuriang amin tui se anira, mu ura kowar betemonkowo! 20 Se nina Kaem aru maonal, ikup imi daula marir tom te se, Sabbath tom te me aratukko, wore ko ngatongalko.
Mat 24:20 Nuna Sabbath kam te awar biya me aolak ilumonko. Betela wonong ko songkuring tairate bagumonko.
21 Mu awuk, tom mu te ko ikup aratukko mu am memek biya nunguningkiri, tom ali lilim la aratam ale eng tai aitak te ikup aratuwoso mu iwita mena. Se udagi te mu iwita mena tala.
Mat 24:21 Tom memek nunguningkiri: Dan 12:1; Joel 2:1-2; Rev 7:14.
22 Se Kari Biya tom memek mu me tukunang awurok, mu kariimet bo marak me bagurukko, suen biya kuemon parangomonko. Bare nu ko kariimet noko ma balam mu nunga ikia tauk, ale tom tukunang awurokkowo.

23 “Se tom mu te kari bo ninga manuk, ‘Arigalko, Kristus bagoso iweya,’ mauk, aking bo ninga manuk, ‘Kristus owore te bagoso,’ ma baluk, bare den mu nina ko me nengemang ningi nunguning arukko. 24 Mu awuk, Kristus kawel se prophet kawel suen biya aratomon, ale kariimet te nongomang kulukurmonko kilek bibiya duap duap betemonko, ale te Kaem ko kariimet noko ma balam mu ago la nunga kulurmonko karogo kaemonko. 25 Ikialko, mel imi me aratam la, ani girem ale ko ninga manaruwasam.

26 “Se nuna ninga manarmon, ‘Ikialko, Kristus sor kariimet mena oworete bagoso,’ mamon, mu nina kuwim mu te me namaralko. Se aking ninga manarmon, ‘Ikialko, nu es ta kawam ningi bagoso iweya,’ mamon, mu nina me ko nengemang ningi nunguning arukko. 27 Mu awuk, Kari ko Kuriang peleruk tairukko mu, pure biliwilik maso se worem koma sing sang te nikim pagoso iwitata, nu wetang te peleruk tairuk se arigalko. 28 Kuwim mel te kuera ale iwiwara umutang te mu inanganang gaogao tai tai kapasan.

Kari ko Kuriang peleruk tairukko

(Mark 13:24-27; Luke 21:25-28)

29 “Tom mu te ko ikup biya menaruk, mu aking tairatela,

'Worem motam tiromorom paguk,
se sige me nikim kapuruk,
se baras mu kutukutuk mamon kapomonko.
Se mel aora aora taiti kuali anisan mu yukumonko.'
Mat 24:29 Worem sige baras: 2 Peter 3:10; Rev 6:12-14.

30 “Se tom mu te mel bo nuna te ikimon ale Kari ko Kuriang tairukko pingi aram mamonko mu taiti kuali aratuk, se ali lilim la ko kariimet aringimon ale mamon niamonko.
Mat 24:30 Kari ko Kuriang: Dan 7:13. Kariimet mamon niamonko: Zech 12:10; Rev 1:7.
Se Kari ko Kuriang sokel karogo se nikinang biya karogo taiti nuwi awete tai kapawuruk se aringimonko.
31 Bugle sail karogo niaruk se nu ko engel alo nunga awurok se ali koma suen biya te namomon geragomon, ale ko kariimet maingkala noko ma nunga balam mu nunga gi gi arungak taimon ale nunga bolala awumonko.
Mat 24:31 Biugel niaruk se Kris alo barasomonko: 1 Cor 15:52; 1 Thes 4:16-17.


Tam fig ko kausa

(Mark 13:28-31; Luke 21:29-33)

32 “Nina tam fig te ikia talko. Tom tam fig ko kower awete gurek gawa iru diruwuso, mu nina umutang te ko ikisan, mu na inang ko nunguning gia ko tom pingi aram masan. 33 Koma suwanta tala, tom nina mel ani ko ninga manem imi suen la aratomon se arigal, mu nina te ikial, tom pingi aram ma balalko.
Mat 24:33 Bala bo mu iwita: “... nu tairam songkuringi pingita sanamiwoso ma balalko.”
34 Ani nunguningta ninga manorsam, tom imi ko kariimet mu me kuemon la, mel imi suen la aratu sapurukko. 35 Taiti ali karogo menarukko, bare aninga den mu me ta menarukkowo.

Sinar ago bagara ko den

(Mark 13:32-37; Luke 17:26-30, 34-36)

36 “Bare tom diram se worem motam awilaya te mel suen la imi aratukko mu kari bo ta me ikiso. Engel alo duruk te me ikisan. Se Namar betela me ikiso tala. Nuet kota diram to mu ko ikiwoso. 37 Munan girakala nuna Noah ko tom te bitakasan umutang turantala bitawomon se Kari ko Kuriang peleruk tairukko. 38 Yu lom biya me taikaso la, kariimet na yu no gi se, kari imet gi se, imet kari gi se, bitawaman la nama Noah dal te aragam ale ningi kasu naguram. 39 Nuna mel aratukko mu me ko ikikasan, eng nama yu lom biya tairam ale nuna suen la nunga mituwuram se menaman.
Mat 24:37-39 Noah ko tom: Gen 6:5-8; 7:21-23. Kariimet saki ikia sinar mena: 1 Thes 5:1-4; 2 Peter 3:6.


“Se Kari ko Kuriang tairukko mu am uwutata.
40 Tom umutang te mu kari ilagala ningam ningi ura iluwomon se bo mu tamon ale ko bo betemon se am bagurukko. 41 Se aking imet ilagala wete na nunguruwomon se bo mu tamon ale bo betemon se am bagurukko. 42 Umutang ko nina sinar ago loaga se bagaralko. Mu awuk, tom nenenga Kari Biya tairukko mu nina me ko ikisan.

43 “Ewere ko ikia talko. Kawam kotam nu turom ningi worem motam awilaya tere kari te tairukko ko ikiok, mu nu loaga se baguruk, se tere kari tairuk mu ko kawam me barukuk ale me ningi kasu nagurokko. 44 Uwutatala, nina betela sinar karogo bagaralko. Mu awuk, Kari ko Kuriang tairukko mu, tom bo nina nu me te tairukko masan umutang te nu tairukko.
Mat 24:40-44, 45-51 Kris alo sinar ago bagomonko: 1 Thes 5:5-9; Rev 3:3; 16:15; 22:12.


Ura kari ningo se ura kari memek nunga den ira

(Luke 12:42-46)

45 “Ura kari ikia ago mu nu ko kari biya ura kuting te beteram mu ninguru bitarso. Se ko kari biya nu manuk, ‘Ni aninga ura kariimet sang nunga bitaru se, nunga na inang ko tom diram te la nungaru se no se bagomonko,’ ma balu se namuruk sor bo te laga, 46 peleruk tairuk, ale ko ura kari mu ura yawarakala towuruk se arigok, umutang mu koma yawara tuok se amilmilurukko. 47 Ani nunguningta ninga manorsam, nu ura kari mu baluk se ko melmasak singir la bitaru se bagurukko.

48 “Bare ura kari ko munan memek agi mu, nu kuamin ningi la iwita baluk, ‘Aninga kari biya mu tom maiya biya lagurukko pa!’ mauk, 49 ale barasuk ura kari saki nunga mora maguwura duap bitiruk, ale yu nana ngualara kari arungak na yu no se bagurukko. 50 Bare tom noko kari biya me te tairukko i maso ale noko me kimi beteso, mu te ko kari biya tai aratukko. 51 Ale iluwok moa maguwurok, ale baluk se kawel kari alo arungu biguwurok se mu te mo nia se, nogore gik gek ma se bagomonko.

Copyright information for `WSK