Matthew 25

Imet itiwik 10 nunga den ira

“Tom mu te duruk wonong ko kingdom mu imet itiwik 10 nunga galep giman, ale kari bo imet taukko tairukko wore aringimonko namakasan wore turan. Se imet itiwik 5 mu nunga ikia me terong, se 5 tala mu nunga ikia ningo nuam. Se nunga ikia sinar mena mu nunga galep giman, bare yu sang galep te kani se lagurukko mu sang ago langiman ale me giman. Se nunga saki ikia ningo nuam mu nunga galep giman, ale nunga yu sang ago langi gilingiman, ale giman ago namaman. Bare kari imet taukko nukung mu tairate me taikaso, se nuna kimi bita laga nomotam anirukko kaeram se animan kueman.

“Se uriluan aira bo tairam balukaso, ‘Kari imet taukko mu tai aratam iweya! Tai aratal arigalko!’ makaso. Se imet itiwik 10 mu suen la barasaman nunga galep giman ale nunguru burangikasan. Se 5 ikia mena mu 5 tala ikia karogo mu nunga isarman, ‘Nengete yu sang nangaralko,’ maman. ‘Anananga galep irisan pa!’ maman. Bare 5 ikia ningo karogo mu balman, ‘Mena,’ maman. ‘Yu imi ana sang ningarnakko me terong, anananga galep ko la terong mam. Nina diara kawam te namaral ale nemeke kala ninga galep ko yu diaralko.’

10 “Se imet itiwik sinar mena mu yu diamonko nama gilingiman, se kari imet taukko mu tai aratam. Se imet itiwik nunga galep yu langiman se kaniwaram mu imet kari numi giokko na yu beteman mu te ilak kasu naguman. Se songkuring baguman.

11 “Se udagi imet itiwik sinar mena mu taiman ale aikasan, ‘Kari Biya! Kari Biya!’ makasan. ‘Ana songkuring kagaru nangaruko!’ makasan. 12 Bare nu nunga maonam, ‘Ani nunguningta ninga manorsam, ani nina me ninga ikisam,’ mam.”

13 Jesus balam, “Butatala, nina tom ani te tairikko, se kowar motam awilaya mu te tairikko, mu nina me ko ikisan. Buta se nina sinar ago bagaralko.”
Mat 25:1-13 Sipsip Gotek imet taukko ko den: Rev 19:6-19.


Kari biya bo ko ura kari ilagala suwan nuguting te manga beteram wore ko den ira

(Luke 19:11-27)

14 “Se aking duruk wonong ko kingdom mu imi turantala. Kari biya bo wonong bo awar mu te namurukko, se nu ko ura kari nunga auram se taiman, se ko manga melmasak bitarmonko se tuteram ale nungaru karogo namaram. 15 Nu ura kari suwan suwan nunga ikia nunga nosokel te iki iki manga bataguru nungarukaso. Bo mu nu 5000 kina tuam, se bo mu 2000 kina, se bo mu 1000 kina. Asele nu barasam namakaso.

16 “Se ura kari 5000 kina tam, mu nu tairate namaram ale manga mu ura te beteram, se 5000 kina tala aratam. 17 Se koma suwantala ura kari 2000 kina tam mu nu ura te tala beteram, se 2000 kina te aratam. 18 Bare ura kari 1000 kina tam, mu eng karogo namaram mutim bo iram, ale ko kari biya ko manga mu ningi kaluwu beteram.

19 “Se tom maiyam se kari biya mu peleram tairam, ale manga nungaram mu aguwaya ura te beteman wore ko nunga isarukaso. 20 Se ura kari 5000 kina tam mu nu tairam, ale 5000 kina bo tala tam mu ko kari biya te kausam ale balam, ‘Kari Biya, arikko,' mam. 'Ni ani 5000 kina aisem mu ani ura te beterem, ale 5000 kina bo tala aratam se taem, ale biguwurem 10,000 e ta imitang.’

21 “Se ko kari biya nu maonam, ‘Ni ura kari ningo,’ mam. ‘Ni yawarakala nunguningkiri beterem pa!’ mam. ‘Ni ura gotek imi gemang ningi nunguningkiri te ko sinar taem. Se ani ura biya mu te ka bitirik se ko sinar to se bagerko. Buta se ni tair ale ani agarak amilmilerko.’

22 “Asele kari 2000 kina tam mu betelatala tairam ale balam, ‘Kari biya,' mam, 'ni 2000 kina ani aisem mu ani ura te beterem, ale 2000 kina bo tala te aratam se taem ale biguwurem 4000 kina mu iweya.’

23 “Se ko kari biya nu maonam, ‘Ni ura kari ningo,’ mam, ‘Ni yawarakala nunguningkiri beterem pa!’ mam. ‘Ni ura gotek imi gemang ningi nunguningkiri te ko sinar taem. Se ani ura biya mu te ka bitirik se ko sinar to se bagerko. Buta se ni tair ale ani agarak amilmilerko.’

24 “Asele ura kari 1000 kina tam mu nu tairam ale balam, ‘Kari biya,’ mam, ‘ani ikisam mu ni ka ikia aora biya. Ni kari sang ningam te inang asursan bare ni am sang gi nasam. Se kari sang inang muguri ningam ningi agusan mu betelatala ni ko nunguning am gisam tala. 25 Se ani nguangerem, ale manga 1000 kina ni ani aisem mu karogo namerem mutim irem, ale ningi kaluwurem. Se nika manga mu diram la karogo tairem iweya.’

26 “Se ko kari biya iwita nu maonam, ‘Ni ura kari memek, gagor kuruwim! Ni aga balsam ani kari sang ningam te na asursan mu ani ko nunguning gisam, ma iwita balsam e? Aking kari sang ningam te na muguri agusan mu ani tala ko nunguning gisam ma balsam e? 27 Ni buta ikiem agi mu, awuk se ni aninga manga bank te me beterem a? Ni uwuta beterem ale mu, ani pelerem tairem ale manga mu to se ko daula manga karogo taem ale.’

28 “Buta balam, asele ko ura kari sang nunga maonam, ‘Aria,' mam, 'manga noko kuting te aniso mu tal ale kari manga 10,000 kina karogo bagoso wore tualko. 29 Mu awuk, awiriya nukote mel karogo, mu nuna sang karogotala tumon se nu mel terong ma la ago bagurukko. Bare awiriya nukote mel mena, katirta gotek, mu mel katirta nukote mu nuna tamon se mel mena biya bagurukko. 30 Butata se kari memek imi mu tal ale matangi sor tiromorom ningi saparal se mu te baga se, mo nia se, kore gik gek ma se bagurukko.’

Kari ko Kuriang nu ali lilim la ko kariimet nunga tuterukko

31 “Tom Kari ko Kuriang mu king iwita ko engel alo arungak tairuk, mu nu ko daiga kuwim nup ago nikinang kapawara mu te daigokko. 32 Se ali sor suen biya ko kariimet nu koma dugu te bolala awumon, se nu sipsip belelek bolala anisan se nunga kotam nunga pagarso kirker nunga awuso wore iwitatala, kariimet nunga pagaru motam ilagala nunga awurokko. 33 Ale sipsip mu ko kuting sengam mu te nunga awurok, se belelek mu kuting ngas mu te nunga awurokko.

34 “Asele nu kariimet ko kuting sengam mu te anisan mu iwita nunga manuk, ‘Nina kariimet Kaem gomang lila marak ningaram, mu tairal ale aninga kingdom ningi agarak bagaralko. Tom Kaem ali imi bita se nu nina nego ko butata balam. 35 Mu awuk, ani na ko kuakasam mu nina ani na aisukasan. Se ani yu ko kuakasam mu nina yu aisukasan. Se ani kari iwareng ko iwita taikasam mu nina tairate aga arukasan ale agarak ninga kawam te namakasan. 36 Se ani nunguning la guang mena bagakasam, mu nina guang ani aisukasan. Se ani kuera karogo bagakasam, mu nina aninga sinar tokasan. Se aking ani talipara ningi bagakasam mu nina agate taikasan.’

37 “King mu uwuta baluk se kariimet diram mu iwita nu isarmon, ‘Kari Biya,’ mamon, ‘tom awuk bore te ni na ko kuakasam se ana karkaman ale na ni kisukasan? Se yu ko kuakasam mu yu kisukasan? 38 Se ana tom awuk bore te ni kari iwareng ko iwita taikasam se kerak anananga kawam ningi namakasan? Ale ni nunguning la guang mena bagakasam se guang kataruko mu kisukasan? 39 Se aking tom awuk bore te ana ni kuera karogo bagakasam mu karkikasan? Agi talipara kawam ningi bagakasam se ana kete namakasan?’

40 “Se King mu iwita baluk, ‘Ani nunguningta ninga manorsam, nina amaruya aninga launuria kituwura bo aguwaya ilak bitakasan, mu nina ani agarak betera iwita bitakasan,’ ma balukko.
Mat 25:40 Saonga ningo saki alo nungumik te betera: Pro 19:17; Mat 10:42; Heb 6:10.


41 “Asele nu kariimet kuting ngas mu te anisan mu iwita nunga manuk, ‘Nina kariimet memek alo mu ani amakete tagi tal, ale tama pempem la kani lagoso, Kaem Satan se ko engel alo nunga nunguru beteram se aniso, wore ningi namaralko! 42 Mu awuk, ani na ko kuakasam, bare nina ani na me aisukasan, yu ko kuakasam mu yu me aisukasan. 43 Ani kari iwareng ko iwita taikasam, bare nina aga tokasan ale agarak ninga kawam te me namakasan. Ani nunguning la guang mena bagakasam, mu nina guang bo katirikko me aisukasan. Se aking kuera karogo bagakasam agi talipara kawam ningi bagakasam mu nina tai me agarkikasan.’

44 “King mu buta baluk se nuna betela iwita balmon, ‘Kari Biya,’ mamon, ‘ni amaru na inang ko kuakasam agi yu ko kuakasam? Ale amaru kari iwareng ko iwita taikasam? Ale amaru kuera karogo bagakasam agi talipara kawam ningi bagakasam se ana me tai karkikasan a?’

45 “Se King mu iwita baluk, ‘Ani nunguningta ninga manorsam, nina amaruya aninga launuria kituwura bo saongalko miakasan, mu nina ani karogotala aga saongalko miakasan.’ Nu uwutata nunga manukko.

“Se kariimet motam imitang mu namomon ale koma memek tom suen biya to se bagomonko. Bare kariimet ningo diram mu namomon ale marak yawara tom suen biya te bagara ko mu tamonko.”
Mat 25:46 John 5:28-29 ago arikko.


46 

Copyright information for `WSK