Matthew 3

Anuwa Kari John den apuram

(Mark 1:2-8; Luke 3:1-18; John 1:19-28)

Tom mu te Anuwa Kari John Judea ningi ali sor garagarayam mu te Kaem ko den balukaso, ale iwita kariimet nunga manarukaso, “Giris palagalko! Mu awuk, Kaem ko kingdom tairukko pingi aram.” Prophet Isaiah Anuwa Kari John ko den iwita balam:

“Kari bo sor garagarayam mu te ai baluwoso,
‘Kari Biya ko lage te tairukko mu yawarakala nungal dingumuralko,’ maso.”
Mat 3:3 Isaiah 40:3.

John nu prophet, se ko guang katakaso mu camel ko mone te nungurman, se ko let biling bo mu luan te kalokaso.
Mat 3:4 Prophet Elijah mu guang uwutata katakaso: 2 Kings 1:8.
Se ko inang mu kutuwurek se honey umutang nokaso.
Se Jerusalem kariimet, se Judea sor, se Jordan sor lilim ko kariimet nukote taikasan. Ale nunga memek wetang te balukasan se nu Yu Jordan ningi nunga anukaso.

Bare tom nu Pharisee se Sadducee suen biya nukote nunga anuwokko taikasan se nungarkikaso, mu nu iwita nunga manarukaso, “Nina urer tuguta nunga kuriang agila pa! Awiri ninga maonam se nina Kaem ko gomang magara taiwoso mu ko naguwasan a? Nina giris palagaman agi mu, giris palaga ko munan te diram la bagaralko. Nina ninimi ikial, 'Ana Abraham ko taleng girigir se Kaem ko gomang magara me aringinakko,' ma me balalko. Ani ninga manorsam, Kaem manga imi giok ale Abraham ko taleng girigir ko nunga nungokko terong mam.
Mat 3:9-10 Jesus agotala sinar den Juda alo nunga maonam: John 8:33-41. Paul den sang agotala balam: Rom 2:28-29; 4:12; 11:20,23.
10 Palangis maingkala giram ale tam duap ningi tam kaurokko bagoso. Tam suen biya ningi bo nunguning ninguru me kapuruk, mu kaurok ale tama ningi warukko.

11 “Ani yu te ninga anusam, mu giris palaga ko kausa iwita. Bare kari ani agowom kaoram taiwoso mu noko nup sokel biyala aninga kiaram, se ani ko doleng tuagu giekko me terong. Ani noko bowa ningi aliti biya.

Kari umutang mu nu Korang Bur te se tama te ninga anuwokko.
Mat 3:11 Bala bo mu iwita: “Kari umutang mu nu Korang Bur biyala ningaruk, ale ninga ikia memek tama iwita te kai warukko.”
12 Nu shovel / wheat nunguning te nunga burangara ko mel mu nu iluwam, se nu wheat nunguning ko kawam te awurok, ale ko singi bunetutuk mu tama pempem la kaniwoso mu ningi waruk se kanirukkowo.”

John Jesus anuwam

(Mark 1:9-11; Luke 3:21-22)

13 Tom mu te Jesus John kuting te anuwa taukko se Galilee sor beteram ale kote Yu Jordan te tairam. 14 Bare John nu koma kaola den iwita maonam, “Ni ani ka anuwekko agate tairem, bare ni aninga anupko mu asele terong.” 15 Bare Jesus iwita balam ale maonam, “Am aga anupko,” mam. “Uwutata betenak mu munan diram.” Asele John nu anuwam.

16 Se Jesus yu ningi kaparam ale aratuwaram mu duruk kuring kaigam se Kaem ko Korang Bur inanganang biton iwita nukote tai kapawaram se arigam. 17 Se kuring bo duruk te airam ale balam, “Imi mu aninga Kuriang, ani noko ninguru kuesam. Aninga angamang noko ko amilmiloso.”

Copyright information for `WSK