Matthew 4

Satan Jesus ira arigam

(Mark 1:12-13; Luke 4:1-13)

Udagi te Korang Bur Jesus diruwuram ilak sor garagarayam mu te ilak namaram, se sor mu te Satan Jesus ira arigokko.
Mat 4:1 Israel kariimet girakala sor garagarayam mu te aolak ilu se, Kaem ko kuring bataguru se gomang maguwukasan: Heb 3:8-9. Bare tom Satan sor garagarayam mu te Jesus ira arigam mu, Jesus Kaem ko kuring diram la karo tuam: Heb 2:18; 4:15.
Se Jesus woremkalal 40 se turom 40 tala na bo me nam ale na ko ninguru kueram. Se Satan kote tairam ale iwita balam, “Ni Kaem ko Namar agi mu, manga imi balu se na inang ko geragomon se noko,” mam.

Bare Jesus den koma iwita balam, “Kaem ko batoga te iwita balso: ‘Kariimet na inang te la marak me bagasan, bare Kaem ko den singir la te marak bagasan.’”
Mat 4:4,6,7,10 Old Testament ko den: Deut 8:3; Psa 91:11-12; Deut 6:16; Deut 6:13, Exo 17:2,7.


Asele Satan Jesus tam ilak wonong kako Jerusalem mu te namaram, nama temple ko gul kalel biya mu te ilak tarigi beteram ale maonam, “Ni Kaem ko Namar agi mu, ting palage nama aliti kaparko. Mu awuk, Kaem ko batoga mu iwita balam:

‘Kaem ko engel alo nunga manuk se,
taimon nuguting te ka sangarmon kerak kapomon se
deleng manga te me maguwurko,’ mam.”
Bare Jesus nu maonam, “Bare Kaem ko batoga te iwita aniso tala, ‘Ni Kari Biya me ira arikko, mu awuk, nu nika Kaem.’”

Se aking Satan Jesus tam ilak nama duruk bo kalel biya wore te tarigiman. Ale ali ewere ko sor suen biya se ko mel yawara yawara karogo mu nu kasuru kasuru ago namaram. Ale maonam, “Ni aninga adeleng duap ningi bugura kulukuru ale aip patawur mu asele ani mel suen la imi ni kisekko,” mam.

10 Bare Jesus iwita nu maonam, “Satan, tagi toko!” mam. “Kaem ko batoga te iwita aniso, ‘Ni Kari Biya la nup patawur ale kuring karo tuiko. Nu nika Kaem.’ “

11 Asele Satan nu beteram. Se engel alo taiman sangaru gilingiman.

Jesus Galilee sor te ura duap beteram

(Mark 1:14-15; Luke 4:14-15)

12 Se John talipaman mu ko den Jesus ikiam mu nu peleram Galilee namaram. 13 Bare nu Nazareth me bagakaso, nu Capernaum namaram ale bagakaso. Capernaum wonong mu Yu Galilee duap te, Zebulun se Naphtali sor wore te. 14 Mu te prophet Isaiah ko den imi ko nunguning aratam. Nu iwita balam:

15 “O Zebulun sor, se Naphtali sor,
koma gagi tua mu te, Yu Jordan komasang te,
Galilee sor, kariimet Kaem ko me ikia wore te anisan:
16 Kariimet tiromorom ningi bagaman sumu nikinang biya aringiman.
Se kariimet kua ko iwita tiromorom ningi bagaman mu nikinang nongote kaparam.”
Mat 4:15-16 Isaiah 9:1-2.

17 Tom umutang te Jesus den apura duap beteram ale iwita balukaso, “Giris palagalko! Mu awuk, duruk wonong ko kingdom tairukko pingi aram.”

Jesus kari saki nunga auram se kowom karoman

(Mark 1:16-20; Luke 5:1-11)

18 Se Jesus Yu Galilee norogen te aolak iluwam namawa Simon, ko nup bo Peter, se ko uria Andrew ilak pote sapawaman se nungarkam. Nuna ilagala wal tata kari. 19 Se nu nunga maonam, “Nina tairal ani agowom kaoral se ani kariimet nunga gia ko munan ninga kausekko,” mam. 20 Se nuna den ikiman mu te la nunga pote mel awuman ale ilak namaman.

21 Se Jesus namawa launuria ilagala James John ilak, Zebedee ko kuriangari, mu nungarkam. Ilagala mu nunga nonet Zebedee ilak dal ningi baga se nunga pote kulingaman se Jesus nungarkam ale nunga auram. 22 Se den ikiman mu te la nunga nonet se dal melmasak ago beteman, ale Jesus ilak namaman.

Jesus kariimet kuera ikes ago mu suen biya nunga nungam

(Luke 6:17-19)

23 Jesus Galilee sor te geraga se, kariimet kuera ikes duap duap karogo mu nunga nunguru se, synagogue
Mat 4:23 Synagogue mu Juda alo nunga biguwura kawam ko nup, ningi ngatanga se, Kaem nup patawu se, ko den kaukasan ale nunumi manarukasan.
ningi Kaem ko den nunga kasuru se, Kaem ko kingdom ko den balukaso.
24 Se noko dugu duap pagam ale Syria sor lilim ningi geragam. Se kariimet nononga saki kuera ikes duap duap karogo - kuera yaman bibiya, se bur memek nungumik ningi anira, se aliti dagula ale nogore kapetara ale ngisuk nuguring bagu se anira, se nusuwik nuguting tilital, mu nunga gikasan ale arungak kote taikasan, se nu suen la nunga nunguru sapakaso. Kariimet motam bibiya Galilee ko, Decapolis sor ko, Jerusalem ko, Judea ko, se sor Yu Jordan komasang ko, mu ninguru taikasan ale kowom karokasan.

25 

Copyright information for `WSK