Matthew 7

Ni ka saki alo nunga bagara aolak me tuter ale me te nunga balu maguwurko, ko den

(Luke 6:37-38, 41-42)

“Nina saki alo nunga bagara aolak me tuteralko. Umutang mu Kaem nenenga bagara aolak me tuterukko.
Mat 7:1-6 Ana saki alo nunga bagara ko me nunga balu maguwunakko: Rom 2:1-2; 14:10-13; 1 Cor 4:5; James 2:13; 4:11-12. Bare ana ikia sinar ago baganakko tala (v6): Proverbs 9:8; 23:9; Acts 13:44-46; 1 John 4:1,6.
Mu awuk, ni munan aguwaya te saki alo nunga bagara aolak tutesam, mu Kaem munan umutang te tala nika bagara aolak tuterukko. Ni munan aguwaya saki alo arungu betesam, mu nu munan umutang te tala nikerak bitirukko.

“Ni awuk se tam luan nika motam baguwoso wore me arigisam, bare ni ka bo ko tam buna motam te aniso wore ko balu lagasam? Aking ni awuk se ka bo manorsam, ‘Aga bo, tair se nika motam te tam buna bo aniso sowore to sapirikko’ masam, bare ni keta ka motam te tam luan aniso wore me to saperem a? Ni kawel kari! Ni gir ale ni keta ka motam te tam luan baguwoso mu to sapar ale yawarakala loager ale asele, ka bo ko motam te tam buna aniso mu to saparko.

“Se aking nina mel kako yawara kausik me nungaralko. Mu nuna punga geragomon ale ninga usimon bore ko. Aking nina kulolo yawara buruk nongoma te me saparalko. Nuna nusuwik te eremon kalakomon bore ko.

Kaem aru ngatongal se mel yawara ningarukko, ko den

(Luke 11: 9-13)

“Nina mel ko isal, mu nina mel mu talko. Nina mel ko loagaral, mu nina mel mu arigalko. Nina songkuring bong bong mal, mu songkuring kaiga ningarukko. Mu awuk, kari awiriya mel ko iseso mu taso. Se awiriya mel ko loagoso mu arigiso. Se awiriya songkuring bong bong maso mu songkuring kaiga tuso.

“Ninga kuriang bo inang ko nuet isok, mu nuet manga tauk ale tuok i? Mena. 10 Agi wal ko isok, mu nu ma urer tauk ale tuok i? Mena tala. 11 Nina kariimet memek ta, bare nina nenenga kuriang mel yawara nungara mu ikisan. Buta se nenenga Nenet duruk te bagoso mu ko kuriang awiriya mel ko isok, mu nu mel yawara ninguru tala tuokko!

12 “Nina saki alo munan ninga ningimik te betemonko ko kuesan, mu nina munan bortatala nunga nungumik te beteralko. Imi mu Law Den se prophet alo nononga den ko duap nunguningkiri.

Songkuring kirikimik gotek wore te nama nagura, ko den

(Luke 13:24)

13 “Nina songkuring kirikimik gotek wore te nama naguralko. Mu awuk, songkuring wosasel biya, se ko lage tuagu wosasel biya tala, umutang mu sarenga namara ko sor te namoso. Se kariimet suen biya lage mu te aolak ilusan. 14 Bare songkuring kirikimik gotek, se ko lage tuagu kirikimik gotek tala, umutang mu marak yawara ko sor te namoso. Se kariimet am suwan suwanta lage mu arigisan.
Mat 7:13-14 Jesus mu songkuring se lage: John 10:9; 14:6.


Prophet kawel mu nunga kiwem te la nunga ikia, ko den

(Luke 6:43-46; 13:25-27)

15 “Nina prophet kawel nunga ninguru sinar talko! Nuna sipsip guang nagusan ale nengete taisan. Bare nunga nongomang ningi mu kausik diwang iwita. 16 Bare nina nononga betera kaora mu te nunga ikialko. Tam we ko nunguning mu tam wus mu kuali arigal i? Se takal nunguning mu dikor mayang awete arigal i?
Mat 7:16 Jesus mu grapes se figs, se thorns se thistles te den tuaturum balukaso. Bare anananga den te tam we se tam takal, se tam wus se mayang dikor te balman.
Mena.
17 Tam yawara mu nunguning yawara beteso. Se tam memek mu nunguning memek beteso. 18 Tam yawara mu nunguning memek bitirukko me terong. Se tam memek mu nunguning yawara bitirukko me terong. 19 Se tam aguwaya nunguning yawara me beteso, mu kausan batutumusan ale tama ningi warsan se kaniso. 20 Se prophet kawel agi mu, nunga munan te la nunga ikialko.
Mat 7:15-20 Prophet kawel aratomonko: Acts 20:29-31; 2 Peter 2:1. Nunga betera kaora te nunga ikinakko: Gal 5:19-22.


21 “Kariimet saki aninga arusan, ‘Kari Biya, Kari Biya,’ masan. Bare ani iwita ninga manorsam, kariimet aninga Ait duruk te bagoso wore ko kuring karo tusan umutang la noko kingdom ningi kasu nagumonko. 22 Tutera ko tom te kariimet suen biya aninga arumon, ‘Kari Biya, Kari Biya,' mamon, 'ana ni nip te den balukasan, ale nika nip te bur memek nunga karokasan, ale kilek saki saki sail karogo tala bitakasan!’ ma balmonko. 23 Bare ani iwita nunga manikko, ‘Nina memek betera ko kariimet, tagi talko! Ani me ninga ikisam!’ ma balikko.
Mat 7:21-23 Kari Biya kariimet nunga tuterukko: 2 Cor 5:10. Nu arika noko mu nunga ikiso: 2 Tim 2:19.


Jesus den tuaturum bo kawam kaola ko kari ilagala mu te nunga balam

(Luke 6:47-49)

24 “Buta se kariimet aninga den imi ikisan ale karo tusan, mu nuna kari bo ikia karogo, ko kawam manga awete kaolam wore turan. 25 Se tuwik biya kaparam, ale lom lairam tarigiram, se daula biya sail karogo tairam kawam mu itugumam, bare kawam mu me parasaram dagulam. Mu awuk, kari mu ko kawam mu manga awete kaolam se aora biya.

26 “Bare kariimet aninga den imi ikisan ale me karo tusan, mu nuna kari ngualara bo ko kawam saun te kaolam wore turan. 27 Se tuwik kaparam, ale lom lairam tarigiram, se daula biya tairam kawam mu itugumam se ninguru dagulam ale parasaram.”

28 Se Jesus den suen la imi balu kutuwuram mu kariimet motam biya noko den ikiman tengeman ale ko amilmilakasan. Mu awuk, noko den mu sail karogo la. Nu nunga kasurukaso bare nononga kausa kari alo den nunga kasurukasan wore iwita mena, noko den bur sokel ago.

29 

Copyright information for `WSK