Matthew 8

Jesus kari bo kumik laera posara mu nungam

(Mark 1:40-44; Luke 5:12-14; 13:25-27)

Jesus duruk motongar te baga tai kaparam ale aolak ilukaso se kariimet motam biya nu kowom karokasan. Se kari bo kumik laera posara karogo mu nu kote tairam, koma dugu te bugura kulukuam ale balam, “Kari Biya, ni ka gemang buta aniruk agi mu, ni aga nunguruko terong maem.”

Se Jesus kuting garukuam kari mu kumik awete beteram ale balam, “Ani angamang butata. Ni nungerko!’ mam. Se tom mu te la kari mu ko kuera laera posara mu menaram. Se Jesus nu maonam, “Ikiko,” mam, “ni kari bo mel imi manaru se me ikiokko. Bare dirme ale priest kote namar ale kimik kasuru se arigokko. Asele Moses balam butata, ni tama bita Kaem tui, se kariimet te ka ikimon ni aitak kimik nungeram ma balmonko.”

Jesus Rome kager kari supuling bo ko ura kari nungam

(Luke 7:1-10)

Se Jesus Capernaum wonong ningi kasu naguram mu Rome kager supuling bo kote tairam, ale nu sangukko isuam, ale balam, “Kari Biya, aninga ura kari kuera ago kawam te aniwoso. Nu katir me pitiga arigiso, am yaman aromemek karogo bagoso,” mam. Se Jesus nu maonam, “Ani namirik nungekko,” mam.

Bare kager kari supuling mu aking iwita balam, “Kari Biya, ani kari yawara se ni aninga kawam ningi kasu nagurko iwita mena. Bare ni am den la balu se aninga ura kari nungerukko. Se ani betela aga biya nuam bowa ningi bagasam, ale ani agata aga kager kari sang abowa ningi bagasan mu karogotala. Se ani bo manorsam, ‘Namarko!’ masam, se nu namoso. Se bo manorsam, ‘Tairko!’ masam, se nu taiso. Se aking aga ura kari manorsam, ‘Ni ura ewere bitarko!’ masam, se nu beteso.”

10 Se Jesus den mu ikiam biririkiram ale kariimet kowom karowaman wore nunga maonam, “Ani nunguningta ninga manorsam, ani Israel ningi kari bo kari imi turan, ko gomang ningi nunguning sail karogo, mu me ta arigem. 11 Ani ninga manorsam, udagi kariimet suen biya koma worem te basuso, aking koma te nama kaposo, wore te taimon duruk wonong ko kingdom ningi kasu nagumon ale Abraham Isaac Jacob arungu na biya kapuruk mu no se bagomonko. 12 Bare kariimet sang kari umu nunga gue te, kingdom mu ningi bagomonko Kaem balam, bare suen biya tala Kaem nunga karuk matangi nunga awurok, se tiromorom ningi baga se, mo nia se, nogore gik gek ma se bagomonko.”
Mat 8:10-12 Kaem Israel kariimet nongomang ningi nunguning mena mu nunga karukko: Acts 13:44-46; Rom 9:27-28; 10:16; 11:20.


13 Jesus buta balam asele kager kari supuling mu maonam, “Buta se namarko. Mel ni ko gemang ningi nunguning aram mu uwutata aratukkowo,” mam. Se noko ura kari tom mu te la kumik nungeram.

Jesus kariimet kuera ikes karogo mu suen biya nunga nungam

(Mark 1:29-34; Luke 4:38-41)

14 Se Jesus Peter ko kawam te namaram, ale Peter ko nome kuera kumik kowar biyala karogo aniwaram se arigam. 15 Ale nu noko kuting iluwam se kuera kowar kumik ningi aniram mu menaram. Se nu barasam ale na yu te nu bitarukaso.

16 Se sor baingam taikaso mu nuna saki alo bur memek nungumik ningi anira mu nunga diruwuman arungak nukote taikasan. Se nu den la balukaso se bur memek tagi tokasan. Se kariimet kuera ikes karogo mu suen la nunga nungurukaso. 17 Se umutang te prophet Isaiah ko den iwita ko balam bare ko nunguning aratam:

“Nu anananga kuera ikes kututuwu waram,
ale anananga kuera duap duap mu nu giam.”
Mat 8:17 Isaiah 53:4.

Kari sang Jesus kowom karomonko balukasan

(Luke 9: 57-62)

18 Jesus kariimet motam biya nunguningkiri nu taluru guruguman se nungarkam, ale ko olekem nunga maonam, “Dal te aragal se ana yu batoga komasang te kasu kapanakko.” 19 Se Law Den ko kausa kari bo tairam ale balam, “Kausa kari,” mam, “ni sor apareyate namarko bare ani yam kerak tala namirikko pa!” ma balam.

20 Se Jesus iwita nu maonam, “Kausik diwang mu nunga garap gogong karogo. Se inanganang mu nunga singir karogo. Bare Kari ko Kuriang mu kuwim ito te bagurukko mu mena.”
Mat 8:20,22 Jesus kumik mel mena bagaram: 2 Cor 8:9. Kariimet kuera iwita bagasan: Eph 2:1; 1 John 5:12.


21 Aking ko olekem nunga ningi bo iwita nu maonam, “Kari Biya,” mam, “ni aing me se ani namirik ale aga ait kueram wore mutim tugumek asele tairik ni kewom karikko,” mam.

22 Bare Jesus nu maonam, “Ni tair ale ani agowom karoko. Kari kuera mu nongota nunumi mutim tugu se bagomonko.”

Jesus gagi daula nunga maonam se kawus maman

(Mark 4:36-41; Luke 8:22-25)

23 Jesus dal te aragam se ko olekem ilak aragaman ale ilak namakasan. 24 Se namawa daula biya urukuam se gagi biyala barasam ale dal mituwurokko negakaso. Bare Jesus mu aniwakaso. 25 Se ko olekem alo namaman mumurman ale balman, “Kari Biya, ana sarengasan pa!” makasan. “Nanga sangaruko!”

26 Se nu iwita nunga maonam, “Nina anape ko nguangasan a? Nenenga nengemang ningi nunguning mu katirta agila pa!” mam. Asele nu barasam ale daula gagi biya barasuwaman mu den sail ago la nunga maonam se kutek ma sapaman se malin biya kauram.

27 Se olekem alo nungamin yenaram se balman, “Kari ewere kari awuk nunguningkiri se daula gagi barasuwaman mu nu kuring ikiman ale kawus maman a?”
Mat 8:27 Kari Biya Jesus sokel karogo: Psalm 93:3-4.


Jesus kari ilagala bur memek karogo wore nunga nungam

(Mark 5:1-17; Luke 8:26-37)

28 Se Jesus dal te nama Gadara nunga ali sor te, yu batoga Galilee komasang te aratam. Se kari ilagala garap gogong kari kuera wore ningi tugukasan owore ningi baga arataman kote taiman. Nuna bur memek nungumik ningi anira, se kari diwang iwita memek nunguningkiri. Se kariimet nunga nguangakasan ale lage uwuta namara mu te me namakasan.

29 Se ilagala tai sanamaman ale sail te aikasan balukasan, “Kaem ko Kuriang, ni awuk nanga bitarko ya? Anananga memek tanakko tom aitak pa!” makasan. “Se ni awuk se girem anananga nangimik yaman tuiko ewerete tairem a?” ma balukasan.

30 Se kuwim mu te ko pingi nuam mu buruk motam biya na no gi se animan. 31 Se bur memek kari ilagala umutang nungumik ningi animan mu Jesus manorman, “Ni anananga karoko mu nanga karo se nama buruk owore nungumik ningi kapanakko,” maman.

32 Se Jesus nunga maonam, “Namaralko!” mam. Se nuna kari ilagala umutang nunga beteman ale nama buruk nungumik ningi kasu naguman. Se buruk umu suen la sail karogo naguman nama gamung bo ita kulukua mu ko norogen la naguman nama yu ningi kapaman ale kueman.

33 Se buruk ko bitua kari naguman nama wonong te arataman ale mel aratam mu ko dugu duap singir la balman. Ale kari ilagala bur memek nungumik ningi anira mu karogotala nunga dugu duap balman. Se wonong mu ko kariimet suen la Jesus aringimonko namaman. Ale ari gilingiman mu, den sokel agotala manarukasan, nu nunga wonong bitiruk ale sor bo kilimik mu te namurukko manarukasan.

34 

Copyright information for `WSK