Proverbs 12

Kilek diram la ka bo kumik te bitarko

Kariimet ikia nunguning tamonko kuesan, mu tom node iluwa ko den nunga manorsan mu iki gilingisan.
Bare kari bo due iluwa ko den manorsan se me ikiso, mu kari ngualara, ikia ningo nukote mena.
Kariimet ningo mu KARI BIYA nunga kueso ale nunga sangarso.
Bare kariimet saki alo nunga kulursan, mu KARI BIYA memek tamonko balso.
Awiriya kilek memek beteso, mu daiga bagara sokel ago me arigokko.
Bare awiriya munan ningo diram beteso, mu nu tam yager ali ningi kaposo se kariimet belemonko me terong, wore turan.

Imet bo kilek ningo la beteso mu te noko kuari nup yawara taso.
Pro 12:4 Imet nunga den: Pro 12:4; 18:22; 19:13-14; 21:9,19; 25:24; 31:10-31.

Bare imet kilek dolara ago mu beteso, mu nu dolara tagi ko kuari kumik te beteso, se kuera yaman iwitata kumik sail ningi yaman tuso.
Kariimet ningo mu munan diram la kerak betemonko, ale me ka kulurmonko.
Bare kariimet memek mu den kawel wore ikia nunguning iwita balmon ale te ka kulurmonko.
Kariimet memek nunga den mu te ka momon se kuarko.
Bare kariimet ningo nunga den mu ikup te ka sangukko.
Pro 12:6 Anananga munak munakasan: Pro 12:6,14,16-19,22; Pro 17:27.

Kariimet memek mu memek arigisan ale eng mena namasan.
Bare kariimet ningo nunga kuriang arungu sokel ago la bagomonko.

Ni ikia ningo kete aniruk, mu kariimet nip patawomonko.
Bare nika ikia ngualara, mu kariimet ka balu maguwumonko.
Ni kari yam nup mena iwita bager,
bare saonga kari suwanta iwita kerak baguruk, mu yawarakala.
Ni kari kota numi ikiso kari nup biya ago iwita, bare nu kumik na inang karogo me bagoso, mu ni kari umutang kiarem.

10 Awiriya ko munan ningo diram mu nu ko buruk tarak kausik nunga kueso ale nunga sinar taso.
Bare kari memek mu nu ko buruk kausik tarak me nunga sinar taso, am nunga bita maguwuso.
11 Awiriya ko ningam ninguru ko sinar taso, mu nu na inang suen biya giokko.
Bare awiriya ura se ikia sang nu me sangukko wore karo tuso, mu nu ikia mena.
Pro 12:11-12 Ura kowar tata se gagorara ko kilek: Pro 12:24,27. Den saki tala nunga reference mu Pro 6:6 te aniso.

12 Tere nana kari mu nunga saki alo mel gisan wore ko nongomang motam barasoso ale betelatala betemonko ikia nunga moso.
Bare kariimet ningo diram mu nongota nunga ura kowar te mel yager betesan se ko nunguning kaposo.
13 Kari memek mu kota ko munak balso mu dagarok iwita nu talipurukko.
Bare kari ningo diram mu ikup kote aratukko mu ilu kiarukko.
14 Nika munak yawarakala munaker, mu ka sanguk se yawarakala bagerko.
Ale keta ka kiting te ura kowar bitar, mu ko koma yawara toko.

15 Kariimet ikia ningo nongote mena mu nuna nongota nunga ikia te sanamasan ale ningo ko balsan.
Bare kariimet sinar, mu bo ko bala ningo ko nodogowa tagisan.
16 Kariimet ikia diram nongote mena, mu tairatela nongomang magoso.
Bare kariimet sinar, mu kari bo nunga balu maguwuso mu nuna me ko balsan, am nubiring tusan.
17 Kari diram kawel bo mena, mu den ariga kam te den nunguning la balso.
Bare kawel kari mu den kawel balso.

18 Kari bo noko munak ko me sinar taso, sail karogo am saposo,
mu batir iwita kariimet ko ikia gomang batagarso.
Bare kari ikia sinar ago den balso,
mu noko den mu kariimet gomang motam nungurso burangoso.
19 Den kawel mu ko tom tukunangta.
Bare den nunguning mu ko tom am maiya biya nunguningkiri.
20 Kariimet kilek memek betemonko ikia tasan,
mu nongomang motam ningi kawel biyala aniso.
Bare kariimet nuna kariimet ningi bagara ningo lila mu ko ura betesan,
mu nuna amilmilomonko.

21 Kariimet diram mu memek bo me arigisan.
Bare kariimet memek mu memek suen biya arigisan.
22 Kariimet den kawel balu lagasan, mu KARI BIYA me nunga kueso.
Bare nu kariimet den nunguning balsan ale karo tusan mu nunga amilmiloso.
23 Kariimet ikia ningo nongote ago, mu nuna anapeya ikia nuna ikisan mu te nunumi me patowasan.
Bare kariimet ikia ningo nongote mena, mu nuna den ngual ngual am balu lagasan.

24 Ni ura aora garagar ilup, umutang ni kari sang nunga bitua kari ko aratuko.
Bare gagora lager mu ni ura dungan kari ko aratuko.

25 Mel sang ko ikia tawun biya ka moruk mu nika amilmil kapurukko.
Bare den welang yawara ka manarmon, mu ni aking amilmilerko.

26 Kariimet diram mu nunga saki alo lage ningo nunga kasursan.
Pro 12:26 Bala bo mu iwita: “Kari diram tiran bo ilak launuria bitirukko, mu ninguru ko ikiwa se butata beteso.”

Bare kariimet memek mu nuna lage ningo nuam mu kiasan ale nama nguala gilingisan.
27 Kari gagor kuruwim giarum ningi nio buruk ilumonko namasan, mu bo me ilusan.
Bare ura kowar tata ko kari mu nungumik mel ago bagomonko.
28 Ni munan ningo diram la karo tui, mu ni marak yawara ko lage te bagasam.
Bare lage bo tala aniso, se ni mu te namar mu ni kuarkowo.
Copyright information for `WSK