Proverbs 16

Kaem baluk mu asele mel aratukko

Ana nanga ura mel sang betenakko nanga ikia balu tuati ago namanak,
bare KARI BIYA nu ago ningi baguruk ale baluk mu asele ko nunguning aratukko.
Ana ikisan anananga munan suen la betesan mu diram masan.
Bare KARI BIYA kota anananga ikia nangamang aguwaya mu tutia tutia ariwoso.
Nika ura mel suen la bitarko, mu gir KARI BIYA kuting te bitarko.
Asele ka ura mel bitarko mu yawarakala aratu sapurukko.

KARI BIYA noko ikia giram beteram se aniso se te karowoso.
Ale kariimet memek betesan mu ikup yaman tamonko mu ko nu ago giram ikiwoso.
Nunumi patowara ko kariimet mu KARI BIYA me nunga kueso.
Se bo ta yam me namuruk, am memek to sapomonko.
Ni KARI BIYA ko ninguru kuar ale tom suen biya ilak pingi bager, mu nika memek siwu kisokko.
kuring bowa ningi Ni KARI BIYA ko kuruwer ale ko bowa ningi bager, mu ikia memek tairuk mu ka kiarukko.
Ni KARI BIYA ko kuar ale munan nu ko kueso mu la bitawer,
mu nu ka sanguk se kariimet sang ni ko ko nongomang magawoso mu am arungu yawarakala no giko.
Ni munan diram te ura iluwem ale ko koma manga gotek iluwem,
mu ni kari awiriya kawel te manga bibiya giman mu nunga kiarem.

Kari kota ko ikia te lage karukko mu ko ikia taso,
bare KARI BIYA noko aolak mu ko wosagam iluwoso.
Pro 16:9 Kaem mel suen la bitaruwoso: Pro 16:1, 9; 19:21; 20:24; Luke 12:16-21; James 4:15; Rev 3:7.

10 Kari king ko bagoso wore den balso,
mu noko den sokel ago se aora biya.
Buta se nu munan diram mu te kariimet nunga den arigokko.
11 KARI BIYA ko gomang diara guruga ko ura mu am diram la namurukko,
kawel bo ta ningi me anirukko.
12 Ali sor supuling alo kilek memek me ko kuesan,
mu awuk, munan diram mu te nononga ura sokel ago anirukko.
13 King nunga nongomang mu kariimet den nunguning la balmonko,
se nuna karogo ko amilmilomonko.
14 King gomang maguruk mu baluk se kari bo am momon se kuerukko.
Se kari ikia sinar mu king ko gomang ira murok se lila te bagurukko.
15 King ko koma motam amilmil ago loagoso,
mu tuwik musiring kariimet nungumik kuali kapara iwita marak nungarso.

16 Ni ikia nunguning toko mu yawarakala, mu gold kiaram.
Uwutatala, ni ikia ningo tuterko mu yawarakala, mu silver kiaram.
17 Kariimet diram mu kilek memek nubiring tusan ale diram aolak ilusan.
Arikaya nunga bagara aolak ko sinar tasan, mu yawarakala bagomonko.
18 Keta nimi patowara ale kualala namara ko munan mu ka sapuruk se dagul memek toko!
19 Ni ka bagara aolak nimi ira kutuwusam ale sang nungumik mel mena mu arungu bagasam,
mu ni saki alo nunga nosokel te mel biyala gisan ale te nunumi patowasan mu nunga kiarem.
20 Ikia ka kasursan mu ninguru iki ale karo tui,
mu ni daiga bagara yawara arikko.
Se betelatala KARI BIYA ko gemang ningi nunguning aruk, mu ni amilmilerko.
21 Kariimet ikia sinar mu saki alo nunga ikisan nuna ikia ningo nongote ago.
Uwutatala kariimet den ningo welang yawarakala balsan,
mu saki alo ikimon ale karo tumonko kuesan.
22 Kariimet ikia ningo ago, mu ikia umutang yu marak kapa nungaruwara wore turan nongote aniso.
Bare kariimet ikia ningo nongote mena, mu nuna kilek memek betesan,
ale umutang te nongota nunumi maguwu gilingisan.
23 Kariimet ikia ningo ago, mu ikia ninguru tasan ale asele den balsan.
Se kariimet nunga den ikimon ale karo tumonko kuesan.

24 Den ningo welang ago yawarakala, mu honey iwita, yaman nuam nunguningkiri,
se kariimet ikisan mu nungumik sokel iru tuso.
25 Kariimet sang ikisan nuna munan lage karo tusan mu diram la ma balsan.
Bare mena. Nuna karosan nama eng memek arigisan ale kua namasan.
26 Ura kari ikisan nuna ura me ilumon, mu na me gimon namonko.
Umutang ko nuna ura kowar ilusan.

27 Kari memek mu nu kariimet te nunga maguwurokko lage kupuso.
Se noko munak munakoso ta wore mu tama iwita mel te kaiyuk menawurokko terong mam.
Pro 16:27-28 Saki alo nubiring ko den bala: Pro 11:13; 16:27-28; 18:8; 20:19; 26:20.

28 Kari memek kawel kuruwim mu saki alo nongomang atumuso se nunumi karogo den tagisan.
Se saki alo nubiring ko den bala ko kari, mu nu launuria yawara mu nongomang atumuso se nunumi pagaru kirker betesan.
29 Kari daong kager ko kari mu ko bo gomang kulukurso ale ilak lage memek umutang te namoso.
30 Kari bo motam te se sumulak te ko bo ilak nunumi gi sapomon, mu ni iwita ikiko,
nuna memek betemonko se ko nunumi manaruwasan.
31 Kariimet garukasan ale nomone sirar maso, mu nup biya nungarso iwita.
Mu awuk, nuna kam maiya biya munan ningo karo tui lagakasan umutang ko nononga nomone yak maso ale sirar maso.
32 Kager kari sokel ago kagerso ale wonong bo bataguru taso mu nu terong kageraram.
Bare kari awiriya nu gomang magurukko kari mena, kota ko gomang motam bituokko terong mam, mu nu kager kari mu kiaram.
Kariimet manga palepalengam sapasan, awiriya ura ko sanamurukko agi, wore te ikia ko.
Se koma kaposo mu kari mu mena, koma tarigiso mu kari boronga.
Bare KARI BIYA kota kari ningo nuam mu giram ikiwoso.
Pro 16:33 Israel alo nunga munan bo: Pro 18:18; Acts 1:23-26.

33 

Copyright information for `WSK