Proverbs 19

Ikia sinar ago bagara mu kiwem ningo nunguningkiri

Kari kumik mel mena bare ko bagara diram,
mu nu kariimet ikia ningo nongote mena, nungamili kawel ago, mu nunga kiaram.
Ni mel ko duap ninguru me ikia, bare bitarko wuli kelagasam, mu munan mu me terong.
Ale betelatala ura bo bitarko wore ninguru me ko ikia tasam, am wuli ago tasam, mu ni supusam.
Kariimet sang nongota ngualara kilek betesan ale te nunumi maguwusan,
bare KARI BIYA ko nongomang ikuwuso se sarang tusan.

Kariimet nungumik manga mel ago, mu nokotam suen biya.
Bare kariimet nunup mena se nungumik manga mel mena, mu nungumik nokotam mena tala.
Kari bo den ariga kuwim te kaweluruk,
mu kari mu am ipi betemon se me namurukko, mu koma memek taukko.
Kariimet suen biya tala kari supuling bibiya te nunga kuemonko nongomang kulukursan.
Aking suen biya tala kariimet meltutuk saki alo nungaru gilingisan mu arungu launuria betemonko karogo kaesan.
Kari bo kumik mel mena, mu ko launuria ta wore me ko kuemonko, nubiring tumonko.
Se noko singsang betelatala dulursan, ale nubiring tusan.
Nu sangarmonko nogowom karuk, bare me sangarmonko.

Kariimet awiriya ikia nunguning taso, mu nu kota ko dora kumik sangarso.
Ale awiriya ikia nunguning tam mu ninguru ilukuawuso, mu yawarakala bagurukko.
Kari ko bo te sangukko den kawel balso, mu ipi betemon se me namuruk, bare nu karogo memek taukko.
Awiriya kawela lagoso mu betela ko koma memek taukko.

10 Kari bo ikia sinar mena, bare kawam se meltutuk terong la wore awete bagoso,
mu kariimet ari paguwusan.
Uwutatala, ura dungan kari ko kari bibiya mu nunga kiaso ale nunga kualala bagoso,
mu kariimet betelatala ari paguwusan nunguningkiri.
11 Kariimet ikia ago, mu nuna tairatela me nongomang magoso.
Se kari saki nunga bita maguwusan bare nuna me ko balsan,
mu te nuna munan yawarakala betesan ale nup ningo tasan.
12 King gomang magoso mu nu lion daongurukko niaso wore turan.
Bare tom nu gomang motam kariimet nungarso,
mu nu tuwik taiso ale ningam yu tuso se inang nunguning ninguru kaposo wore iwitata.

13 Kuriang ikia ningo nukote mena, se kilek memek bita lagoso,
mu kuriang umutang noko nuet ikup duap duap tuso.
Turantala, kari bo ko nuwus nu tom suen biya ininga munaka lagoso,
mu noko kilek mu yu pok pok kapa lagoso wore iwita.
14 Nika niamniet kawam se manga mel suen biya am kisimonko.
Bare KARI BIYA kota suwanta ni imet ningo nuam kisokko terong mam.
15 Kariimet gagor kuruwim mu tom suen biya anira la lagasan,
mutang nuna gagor ko koma mu na ko kuemonko.

16 Ni KARI BIYA ko munan den karo tui, mu ni kam maiya biya bagerko.
Bare ni munan den mu biring tui, mu ni kuarko.
17 Ni kariimet kituwura guat nunga sangaru ale meltutuk nungaru,
mu ko ikia ni KARI BIYA mel tusam iwitata.
Se udagi te nu koma kisokko.
18 Nika kuriang mu gotektek anisan la, te giris palagomonko nodogowa iluwa ko den nunga manaru sagerko.
Ni node me tasam, mu ni nuna te nama memek aringimonko nunga sangorsam.
19 Kari ko gomang magara tairate, mu ko koma am memek taukko.
Ni nu sangaru, mu nu udagi ikup bo arigok mu ni akingtala sangaruko ka manukko.
20 Ni munan den toko kutek me, ale ikia toko kuar,
mu ni udagi te kari ikia ningo ago ko aratuko.

21 Kariimet mel suen biya betemonko ko ikia duap duap nungursan,
bare mu KARI BIYA ko ikia mu la diram aratukko.
22 Saki alo nunga kuera ko munan mu mel gira nunguningkiri.
Kimik mel mena bagerko mu terong tala. Bare kawel kiwem te meltutuk giko mu memek.
23 KARI BIYA kuring bowa ningi bager, mu ni kam maiya biya ali imi te bagerko.
Ni amilmil te la bagerko, ale memek bo me arikko.

24 Kari gagor kuruwim, mu nu kuting na taiwir ago mu ningi beteso.
Bare na patawuruk kuring ningi bitirukko mu kuting ikup biya.
25 Ni kari supuling lagara mu moar,
mu kariimet saki ikia mena mu karkomon ale umutang te ikimon nu kumik te aringimon ale asele ikia ningo tamonko.
Ni kari ikia sinar ago mu due ilup, mu te nu eng ikia ningo mu biyala taukko.
26 Kari kulak bo ko nuet bita maguwuso,
agi ko nuam karoso se kawam beteso tagi taso,
mu nu kuriang memek, nukote nguangara dolara bo mena.
27 Aga kuriang, ni ikia sang ago toko me kuar,
mu ni anapeya ikia taem mu sapar ale tairatela kari ikia mena mu nunga turan aratuko.
28 Kawel kari mu kari bo ko den ikup te sangukko ilak aratoso,
mu nu ko den kawel umu te den nunguning menawurokko me nguangoso.
Kari umutang mu kilek memek mu noko inang iwita.
29 Kariimet nunumi patowasan ale saki alo nunga gusia den balu lagasan, mu koma memek tamonko.
Ale kariimet kilek ngualara betesan, mu nunga lilumomonko.
Copyright information for `WSK