Proverbs 26

Ikia ningo mena se gagor ko kilek te me baganakko

Ais muguri gotektek kowar ko kam te taiti kuali kaposo, mu ana ari iki paguwusan.
Se aking na yoposo se gia ko kam te tuwik taiso kaposo mu betelatala ana ari paguwusan.
Uwutatala, kari ikia ningo bo nukote mena wore nup biya taso,
mu ko ikia me terong tala.

Ni kilek memek bo me beterem agi,
bare kari bo ni ko ko gomang maguruk se Kaem am nika maguwurokko ma baluk,
bare noko den balam mu nunguning me kapurukko.
Den umutang mu inanganang am binga lagoso ale kuwim bo te me dagi arigiso wore turan.
Ni horse mayang te mosam se aolak iluso;
ale ni donkey mu ain kuring te betesam ale te lage kasursam.
Uwutatala, ni kari ikia ningo bo nukote mena mu moa lilumur asele kiring karukko.

Kari bo isa ngualara kisok, mu koma diram me balu tuiko.
Ni kari nika isarso nukung turantala aratu bore ko!
Se kari bo isa ngualara kisok, mu koma ngualara tala am balu tuiko.
Ni ko koma diram la balu tui se nu numi baluk nu ikia biya ago ma baluk bore ko!

Ni kari bo ikia ningo nukote mena ka den tui,
ale karogo nama kari bo manukko manaru,
mu ni keta nimi memek te bitarko.
Mu ni batir taem ale keta ka siwik batagem iwitata,
agi ni yu no kuera mu naem iwita.
Kari bo ikia ningo nukote mena,
mu nu den sinar imi bo balukko mu nu me terong mam;
mu nu kari suwik bo tilital memek se aolak iluwokko me terong wore turan.
Ni manga panak te ilukuawusam se manga aratukko me terong,
mu ni kari ngualara!
Uwutatala, ni kari bo ikia ningo bo nukote mena mu nup patowasam,
mu ni kari sinar mena tala!
Kari bo ikia ningo bo nukote mena wore nu den sinar imi bo balso,
mu nu yu nana ngualara kari mayang kore ago iluso se kota ko kuting atumuso wore iwitata.
10 Bitua kari nu kari ikia ningo nongote mena agi am ipi nama taiwasan wore nunga giso ale ura te nunga awuso,
mu nu kari bo daga wol te tutu ngual ngual tagiso se aratoso ale kariimet suen biya nunga gangarso wore iwitata.
11 Kausik na naso mu ago nama kapi beteso ale geraga laga aking peleso taiso ale naso mu turantala,
kari ikia ningo nukote mena, mu noko ikia memek ngualara girakala bita lagaram wore aking beteso.
12 Kari bo ikia ningo nukote mena, mu am sangornak se ikia ningo taukko.
Bare kari bo nu numi balso mel ikia kasik biya iki saparam maso,
mu ana nu sangornakko ura kowar.

13 Gagor kari mu nu pempem la ura mena kawam ningi baga lagoso,
ale iwita ko balso, “Kausik daong kuruwim bo lage te bagoso, se ani me ta aratikkowo!” maso.
Pro 26:13-16 Gagorara ko kilek: reference saki mu Proverbs 6:6 te aniso.

14 Kawam ko songkuring sapasam se kuwim te la namoso taiso wore turan,
gagor kari mu nu ko anira kuwim te la diram numi gurugu patawu se bagoso.
15 Gagor kari kuting taiwir te beteso,
bare na patawuruk kuring te bitirukko gagorso.
16 Gagor kari nu ikiso noko ikia mu kari 7 tala nunga ikia ningo baluwasan wore nunga ikia kiaram, iwita ko ikiso.

17 Kari ilagala nunumi ining tuiwasan se bo namoso ining mu ningi ago sanamoso,
mu kari mu kota numi memek te beteso.
Mu nu kari kausik giriso namoso se kowom karoso ilak namoso ale dogowa te iluso wore turan.

Ikia se den nunguning te la nainimi ago munakanakko

18 Kari bo, ko bo kula den manarso, ale udagi te balso, “Ani den kolara ka manem pa,” maso,
mu kari umutang kari bo ngualoso ale gatu agi tama kaniwara mu giso ngual ngual warso wore turan.
20 Tam tama te me awumon, mu tama mu me kanirukko.
Uwutatala, nina ninimi nibiring ko den me balal, mu ining munak menarukko.
21 Tam kower te tama biyala kaniso.
Se turantala, ining munak ko kariimet nungumik te kager barasoso.
22 Kari bo saki alo nubiring ko den balu gurugu lagoso,
mu ko den umutang mu na ningo welang yawara iwita, se kariimet tairate no lakusan.
23 Kari kawel alo mu munak welang yawara te ikia memek nongomang ningi aniso mu kaluwu gilingisan,
bare nuna mu kani ali yam te nungurman ale ko kumik te garek se dora yawara yawara te bala tuman wore iwita.
24 Kari bo ko saki alo me nunga kueso,
mu nuna te ikimon ale nu nunga kueso ma balmonko nu munak welang yawara nunga manarso,
bare ko gomang ningi kawel biya aniso.
25 Kari uwuta mu ko den ni ikiko mu degewa welang ninguru tairukko,
bare ni noko den mu ko me gemang ningi nunguning arukko.
Mu awuk, ikia munan memek suen biya gomang ningi aniso.
26 Nu saki alo nunga iki maguwura ko kiwem mu am kaluwurokko,
bare noko betera kaora mu te kariimet ko sinar amonko.

27 Kari bo saki alo te ningi dagulomonko mutim ilu beteso,
bare mu kota aking ningi daguloso.
Turantala, kari bo manga diruwuso se ko saki alo nunga irokko namoso,
bare manga mu aking peleso girigirik taiso ale nu ira parasuwuso.

Kari kuamili kawel ago mu ko sikisaki me nunga kueso,
gomang motam ningi nunga iki maguwu se,
bare kuring guang te nunga kuluru se nunga maguwu lagoso.
Se kari den welang nunguning mena te saki alo nunup patawoso,
mu nu betelatala nunga maguwuso.
28 

Copyright information for `WSK