Proverbs 5

Nimi sapar ale saman katagot me bitarko

Aga kuriang, de gurugu ale ikia ningo nuam ani balikko mu ninguru ikiko.
Se ni te munan ningo memek wetang te ko ikiko,
ale ni den ningo diram mu la baluko.
Mu awuk, lage luan imet mu nunga den bala mu welang garagar, se kaemak ko yaman iwita.
Bare ni ko munak mu karo tui,
mu udagi te ni mel bo kiti seselak ago ni naem iwita,
se bainat iwita ka atumokko.
Noko lage karoso umutang kuera ko lage.
Se ka tagirok kuera ko kuwim te kerak namurukko.
Nu lage ningo, marak yawara te ta ko mu kiaso,
ale lage memek te namoso wore nu me ko ikiso.

Aga kuriang alo, ikialko.
Ani den ninga manorsam mu me ningamili sapurukko.
Imet uwuta mu nongote pingi me namaralko.
Ale nunga kawam kuring te me nama sanamaralko.
Nina uwutata beteral, mu ninip ningo nuam nengete aniso mu saparalko.
Ale me ningimik garuk aruk, kulak la kueralkowo.
Mu awuk, imet umutang nunga nugari nongomang maguruk se
ninga momon se kueralko.
10 Ale mel ningo ningo nina ko sail tagi lagaman,
mu kari sang nuguting te namomonko.
11 Kuera ninga iluwok se ningimik sokelel aratuk,
se kueralko tom pingi aruk se ninguru niaralko.
12 Ale balalko, “Ani agata ikia nunguning abiring tuem!
Ale ade ilumonko den balukasan mu abiring tuikasam!
13 Ale aga kausa kari alo den aga manarukasan mu ani ikiekko miakasam,
ale me karo nungarukasam.
14 Se umutang te aitak ani kariimet suen la nomotam te dolara tasam.”

15 Ni keta ka yu nowasam borta la diram noko.
Ale kari bo ko yu nowoso mu ni nama me noko.
Pro 5:15 Uwutatala ni keta ka imet nunguning la diram ilak bagerko, ale nika gemang motam biyala mu nu la diram tuiko.

16 Yu bo awar kapawoso se imet kigilik naso wore iwita, me ko nama nimi saparko.
17 Ni ka yu kapawoso mu ni ka niwus ilak nengeta ninga,
kariimet kelemak nunga mena.
18 Nina kulak la baga se ninimi giman iwitata,
eng amilmila se, yu ningo nuam kaposo se nasan iwita lagaralko.
19 Ka imet ko ariga mu deer gotek bo ningo nuam iwita, nu ninguru ka kueso.
Se nu mu nika ikia gemang motam tagirokko,
se ni mu noko ninguru kuarko.
20 Se aga kuriang, ni imet awuk bore mena se kari sang nunga imes arungak gerageko ya? Mu nika ago.

21 Ikiko. KARI BIYA munan suen biya kari bitawoso mu nu ariwoso.
Ale ko namara pelera suen la nu arikuawuwoso.
22 Kari ikia memek bita lagoso,
mu kota ko ikia memek borta dagarok iwita nu kutiso ale taliposo.
23 Kari umutang kueso mu ko duap iwita,
nu kota ko ikia ninguru me ko sinar taso.
Ale nguala sipa laga kueso mutim ningi namoso.
Copyright information for `WSK