Proverbs 6

Munan saki KARI BIYA me ko kueso nunguningkiri

Aga kuriang, kari bo ko ikup kari saki nongote aniso se ni nu manem, “Ka sangik ale ikup mu kerak kutuwurikko,” ma balem,
mu ni keta ka den umutang dagarok iwita ka taliparam se bagasam.
Se aga kuriang, ni me nguanger dolerko,
am tairatela kari mu kote namar ale
dagarok ka taliparam se bagasam iwita mu nu manaru se
nu tairatela ka kutuwurok se aratuko.
Ni anir ale ukirok se bares kote namarko me kimi bitarko. Mena.
Ni nio buruk dagarok gulia betesan ale tagasan nagusan iwita,
ni kote namar ale nimi kutuwu to ale nagurko.

Se nina gagor kari alo,
nina namaral ale madidir sukankan nunga kilek arigal ale nongote ikia talko!
Pro 6:6 Ura kowar tata se gagorara ko kilek: Pro 6:6-11; 10:4-5,26; 12:11,24,27; 13:4; 14:23; 15:19; 18:9; 19:15,24; 20:4,13; 21:25; 22:13; 24:30-34; 26:13-16; 28:19.

Nuna nungumik nunga kari supuling mena.
Bare nuna na inang tom te mu girisan na inang bolala awusan,
se na inang mena ko tom te mu nuna na ago terong la bagasan.
Ni gagor kuruwim, ni awuk se suwutata ani lagasam a?
Amaru te ni marager ale baresko ya?
10 Ni balu, “Ani katirta anirek ale aeman sapirik ale aking barasikko,” ma balu,
11 bare tom ni aniwasam mu te,
nika meltutuk tere kari gimon iwitata, nika mel suen la menaruk,
se kari kimik mel mena iwita bagerkowo.

12 Kariimet memek mu den kawel munaka munaka geragasan.
13 Nuna ni te ka kulurmonko nomotam nusupuling se nuguting nodeleng te ago la munakomonko.
14 Bare nononga nongomang tuagu ningi mu ikia memek memek betemonko iki gurugu se anisan.
Ale kariimet saki nongomang atumusan se nunga singsang arungu kagersan.
15 Bare kariimet uwutata mu ikup yaman tairatela nongote aratukko,
se lage bo nuna te aking yawarakala aratomonko mu mena,
nuna am maga namomonko.

16 Munan 1 nama 7 imitang mu KARI BIYA me ko kueso nunguningkiri:
17 nimi patowara kualala biya namara,
kamili kawel,
kari nungumik den mena nunga mora,
18 ikia memek duap duap bitarko ikia ka moa lagara,
siwik guyak la kilek memek betera ko aolak iluwa,
19 den kawel sokel tua ko den aora garagar bala,
saki alo nongomang atuma se nunga singsang arungu kagerara ko munan,
munan 1 tai 7 imitang mu KARI BIYA me ko kueso nunguningkiri.

Niamniet nunga den ningo nuam mu wosagam kisok se lage luan imet gemang me namonko

20 Aga kuriang, ikiko, ni ka niet ko kuring karo tuiko,
ale ka niam ko munan den me biring tuiko.
21 Den umutang gemang motam ningi bitar ale tom suen biya karo se lagerko.
Kulolo yawara iwita degetak te tugum se tom suen biya keka sagurukko.
22 Tom ni aolak ilup, mu den imitang ka diruwurok se aolak ilupko.
Ale tom ni taga anir, mu den imitang ka sinar taukko.
Ale tom ni bares, mu den imitang ikia kisokko.
23 Mu awuk, nunga munan den imitang galep iwita nikinang kisokko.
Ale de iluwa ko den ka manorsan mu kilek ningo te aolak ilupko mu ka kausokko.

24 Niam niet nunga bala ningo mu ka sanguk se lage luan imet mu me ka iluwokko.
Ale kari bo ko nuwus kuring te gemang kulukua ko den welang ka manuk, mu me ikiko.
25 Noko ariga yawara mu ni me ko dagulko.
Ale ni te gemang barasukko motam wuli te karki kuawuruk, mu me arikko.
26 Mu awuk, lage luan imet kerak tere naso mu noko manga ura beteso.
Se imet kuari ago wore kerak tere naso, mu
nu ni memek toko lage te kerak namoso.

27 E ni tama kosopat ago ilup,
mu ka kimik guang me kaniruk i?
28 Ale ni tama ko kaok awete aolak ilup,
mu siwik tuagu me kaniruk i?
29 Se koma suwanta tala, ni kari bo ko nuwus ilak tere no,
mu ni yam ipi me namarko, ni memek tokowo.

30 Kari bo na ko ninguru kueso ale inang tere naso,
mu kariimet me tawun biya balu maguwusan.
31 Bare nuna nu ilumon, mu nu mel giam mu koma biyala nunguningkiri kutuwurokko,
ale mel suen biya ko kawam te am menawu sapurukko.
32 Bare kari bo imet kuari ago mu ilak tere naso, mu nu ikia mena biya nunguningkiri.
Nu kota ko kumik guang, ko dora maguwuso.
33 Mu kari sang nu moa maguwumon ale dolara tumon,
se tom suen biya dola se lagurukko.
34 Mu awuk, kari bo ko nuwus bare kari bo tairuk ale ilak tere aniruk,
mu ko gomang ninguru magoso.
Se nu koma kutuwurokko mu nguangara bo mena.
Se manga mel te gomang kulukuokko tuok,
bare nu manga mel mu me iluwokko,
manga mel biya tala agi wore nu me ta iluwokko.
35 
Copyright information for `WSK