Proverbs 8

Ikia Nunguning kariimet nunga aruso

Ikia Nunguning diram mu me aiwoso e?
Nu aiwoso!
Nu lage norogen te, duruk dopang te sanamoso ale aiso,
lage kusumuri, se wonong biya ko tuang kuringi sanamoso,
ale aiso ale balso:
“Nina kariimet, ani ninga arusam!
Ani ali lilim la ko kariimet ninga arusam.
Nina kariimet ikia mena, mu ikia talko.
Nina kariimet ninga ikia tukunangta, mu ninga ikia kunasaralko.
Ikialko, ani den ningo ninga manikko.
Ani den diram la balsam.
Aninga agiring te den suen biya aratoso mu nunguningta.
Ani den kawel bo balikko me ko kuesam.
Den suen biya ani balsam mu nunguningta.
Bo ta kawel mena.
Kariimet ikia diram nunguning nongote ago,
mu den suen la ani balsam mu nuna ko nunguning ko ikisan,
ale den mu diram nunguningkiri mu nuna ko ikisan.
10 Ikia munan ani ninga manorsam imitang ninguru ko kueralko,
ale gold silver me ko kueralko, mu awuk,
ikia munan imitang mu gold silver ninguru kiaram.
11 Ale manga gotektek ko koma kalel biya mu ninguru kiaram tala.
Ale anapeya nina ko ninguru kuesan bare aninga ikia munan imi karogo me terong mam.

12 “Ani Ikia Nunguning. Se ikia munan aguwaya mu ko dugu duap ani ikisam.
Ikia suen la aningate, se ikia munan aguwaya mu ani tutera ikisam.
13 Kariimet KARI BIYA bowa ningi bagasan, mu nuna ikia memek suen la mesan ale nubiring tusan.
Ani nusupuling lagara ko munan se nunumi patowara ko munan mu mesam.
Ale kilek memek betera se den kawel bala mu ani mesam tala.
14 Ani ikia sinar karogo se kariimet am nunga kiti gurugekko.
Ikia se sokel suen la mu aningate.
15 Ani king se ali supuling nunga ali sor te bitarmonko ikia ningo te nunga sangorsam.
Ale nunga kariimet te munan diram la betemonko mu ko ikia nunga kasursam
se munan den yawarakala nungursan.

17 “Kariimet aninga kuesan, mu ani betela nunga kuesam.
Ale arikaya aninga loagasan, mu ani agarkasan.
18 Ani kariimet nunga sangik se nup biya tamon ale nungumik mel suen biya gimonko terong maem.
Ale nunga sangik se anapeya mel betesan mu yawarakala aratukko terong maem.
19 Mel suen biya ani nungarik mu silver se gold nunguningkiri mu nunga kiasan.
20 Ani tom suen biya munan diram la karo tusam.
21 Kariimet ani ninguru aga kuesan mu ani mel suen biya nungarsam
se nunga kawam tugusan.

22 “Girakala nunguningkiri, tom Kaem Biya ura saki saki me betera la, nu giram aninga beteram.
23 Girakala biya, tom ali imi me betera la, nu giram aninga beteram.
24 Tom gagi se yu me arata la, ani girem aratem.
25 Ale betela tala duruk bibiya se duruk motongar gotektek me kuwim gi gi namaman la, ani girem aratem.
26 Ale nu ali lilim la me nungurukaso
se tam manga mel awete me anikaso la,
ani girem aratem.

27 Se ani nu ilak bagakasam se nu gagi ko awete mu taiti kuwim tuam.
28 Ale bowa ningi taiti nuwi awu awu ago namaram.
Ale balam se gagi bowa ningi yu bibiya kuwim tuam.
29 Ale yu gagi ko tom beteram, ale balam ali me mituwurokko mam.
Ale ali ko kuwim aora garagar tala tuam.

30 Tom nu mel suen la imi nunguruwakaso,
mu ani nu beta dugu te ilak bagakasam,
nu ani mel suen la nunga ko kari ko aga beteram.
Ale ani tom suen biya amilmil te bagakasam, mu awuk,
ani nu ilak bagakasam mu ko ninguru amilmilakasam.
31 Ale ali mel suen la nu nungam mu ko ninguru amilmilakasam,
ale kariimet agotala nunga amilmilakasam.

32 “Se aga kuriang alo, aninga den ninguru ikialko!
Ani balsam turan beteral, mu amilmilaralko.
33 Aninga munan den ikial ale kariimet ikia ago ko aratalko.
Me nibiring tualko.
34 Kariimet aninga den ikisan mu amilmilomonko!
Nuna taisan aninga kawam kuringi sanamiwasan se ani den nunga manorsam, mu amilmilomonko!
35 Mu awuk, kariimet aninga kupusan ale agarkasan, mu marak yawara tasan.
Se KARI BIYA nogo ko amilmiloso.
36 Bare kariimet ani me aga kupusan ale agarkasan, mu nongota nunumi memek te betesan.
Arikaya ani me aga kuesan, mu kuemonko lage te bagasan.”
Copyright information for `WSK