Psalms 105

Kaem ko kariimet Isrel arungu bagoso ko den

(1 Kronikel 16:8-22)

Kari Biya amilmil tual ale

noko nup biyala patowaralko.

Noko munan beteram bare sor suen la ko kariimet nunga maonal se ikimonko.

Wur iluwal ale nup patowaralko,

mel bibiya beteram mu ko balalko.

Nina noko kariimet bagasan mu ko se nina noko amilmilaralko.

Nina ko nup patowasan mu amilmil kelagalko.

Kari Biya ninga sangukko kote namaral ale

tom suen biya pingi ilak bagaralko.

Nina Kaem ko ura kari Ebraham ko taleng girigir, nina noko kari Jekop ko taleng girigir,

nina Kaem kilek bibiya ningo ningo beteram mu ko ningamin tugumalko,

ale nu kari memek alo memek nungaram mu ko ikialko.

Nu anananga Kari Biya, anananga Kaem.

Nu ali lilim la bitarso.

Noko munan den mu ali lilim la karo tunakko aniso.

Noko den Ebraham ilak nungam mu tom suen biya anirukko,

Aisak ilak nungam mu betela nu me ko kuamili sapurukko.

Mena. Mu den mu am tom suen biya anirukko.

10 Akingtala Kari Biya Jekop ilak den mu nungam,

ale den mu tom suen biya anirukko mam.

11 Nu Jekop iwita maonam, “Ani ali sor Kenan mu ni kisek se nika anirukkowo,” mam.

12 Tom mu te Kaem ko kariimet mu suen biya mena, ilagalata,

se nuna kariimet awar tai ko iwita Kenan sor te bagakasan.

13 Ale nuna kuwim suwanta me bagakasan,

ali saki te geragakasan ale bagakasan.

14 Bare Kari Biya nunga bitaruwakaso se

sor sang ko kariimet me nunga bita maguwukasan.

Nu king saki ining nungaram ale balam,

15 “Nina aninga kari me nunga bita maguwuralko, aninga profet me nunga bita maguwuralko,” mam.

16 Udagi nu balam se karak biya nunga sor te aratam,

ale nunga inang suen la mena saparam.

17 Bare Kaem maingkala ikia bo giram beteram,

mu Josep ura dungan kari iwita ko diaman ale

ilak Isip namaman se bagakaso.

18 Se ko sowek sen te kaloman,

ain biya mu dogotak tuguman,

se yaman kua se bagakaso.

19 Nama mel nu ko giram balam mu aratu saparam,

nu Kaem kuring tam balam mu aratu saparam.

20 Mu te Isip ko king mu ko kari bo maonam,

se namaram Josep talipara kawam ningi bagaram mu ilak tairam,

kariimet motam saki nunga king biya umutang Josep kutuwu tam.

21 Ale nu Josep mu noko bowa ningi kari biya ko beteram se

Isip ningi mel suen biya bitarukaso.

22 Ale king ko ura kari bibiya, se king ikia tua ko kari suen la nunga bitaru se ikia nungarukaso.

23 Se aking Jekop Isip namaram, ale nu sor mutang te kari awar taira iwita bagakaso.

24 Se Kaem balam se noko kariimet suen biya arataman,

ale nunga nosokel mu nunga kager alo nunga nosokel kiaman.

25 Nu balam se Isip alo noko kariimet nogo ko nongomang magakaso,

se noko ura kariimet kawel te ninguru nunga bita maguwukasan.

26 Se udagi te Kaem Biya ko ura kari Moses Eron ilak nunga balam,

27 se barasaman Isip ningi Kaem ko sokel te kilek kilek duap duap nunguningkiri bitakasan se aratukaso.

28 Kaem Isip sor te tiromorom beteram se aratam,

bare Isip kariimet noko kuring me karo tuman.

29 Se nu balam se yu suen la gue ko geragam,

se wal suen la kuagilingiman.

30 Se gorogoro suen biya nunguningkiri arataman ale Isip sor terong ma sapaman,

ale king ko kawam ningi mu gorogoro karogo la terong mam.

31 Se aking balam se kuwuling ursik kasim karogo la arataman ale

sor mu lilim la terong ma saparam.

32 Nu balam se sor lilim la te tuwik mu ais muguri ko kapakaso,

se pure biliwilik makaso ale pagakaso.

33 Se nunga tam waen se nunga tam fik mu maguwu saparam,

ale tam suen la kulukumu biagi saparam.

34 Nu balam se kutuwurek suen biya nunguningkiri, kaura ko koma mena, mu taiman, Isip wonong sisi kaparam,

35 ale tam gawa, sirsir, se na na gia mel suen la mu no sapaman.

36 Asele nu balam se Isip nunga kuriang amu laun mu suen la kua parangakasan.

37 Asele nu Isip ningi Isrel alo nunga giam ale arungu aratam.

Nuna silva se gol melmasak suen biya giman.

Nunga nungumik guang yawarakala, se sokel ago la arataman.

38 Se Isip alo ninguru nunga nguangakasan.

Se tom nuna namakasan mu Isip kariimet ninguru amilmilakasan.

39 Se Kaem balam se taiti nuwi bo kariimet namakasan mu nunga kualala anikaso.

Ale nu tama turom nikim nungarukko mu agotala kualala bita nungaram.

40 Nuna inang ko isarman, se nu inanganang suen biya nunga awuram se taiman.

Ale nu duruk wonong ko inang nungaram se nokasan.

41 Nu Moses maonam se manga garap kau tam se yu aratukaso.

Se yu mu yu biya iwita aratukaso ale ali tuagu sawan mu te palengakaso ale namakaso.

42 Mu awuk, nu ko den aora biya ko ura kari Ebraham ilak nungam owore ko iki se nunga bitaruwakaso.

43 Se Kari Biya butata ko kariimet nunga giam ale arungu namakaso,

se amilmil kelaga se namakasan.

44 Kariimet saki nunga ali sor bare nu ko kariimet mu nungaram,

ale ningam kariimet saki ko ura iluman mu agotala nungaram,

45 mu te nuna noko kuring karo tui se ko munan den karo tumonko.

Se Kari Biya nup patowaralko! Aleluya!

Copyright information for `WSK