Psalms 2

Kaem Biya se ko kari King ko bagurukko balam, mutang Jesus Kristus, bare ko den

(Aposel 4:25-26; 13:33; Hibru 1:5; 5:5)

Awuk se ali sor ko kariimet nongomang magoso?

Ale anape ko kariimet ikia memek duap duap tasan?

Mu betemonko, bare nunguning mena.

Ali ko supuling kagermonko nongomang suwan awuman, ale ararem te la sanami muruwuman,

Kaem Biya se ko Kari King ko bagurukko balam mu buta arungu kagermon ale nunga menawumonko bolala awuman.

Ale nuna balsan, “Ana nuguring bowa ningi me baganakkowo, nunga betenak ale tagi tanakkowo.”

Bare Kari Biya duruk wonong te daigam baga se nunga gusiram ale nunga gusirso.

Ale gomang maga se ining nungarso,

gomang maga se nguangara nungarso, ale balso,

“Kari ani King ko bagurukko balem mu aninga duruk kako nunguningkiri Saion mu te beterem se bagoso.”

Se king mu balso: “Ani den Kari Biya Kaem aisam mu balikko. Nu iwita aga maonam,

‘Ni aninga Kuriang mam,

se aitak ani nika Niet, ma balam.

Ni aninga isaru se mam, ani ali lilim la, se ko kariimet ago la kisek se nika la mam.

Se ni sikir aora mu ilu se te nunga bitaruko mam, ale kani iwita nunga pakakur se katir katir kapomonko,’ ma iwita aga maonam.”

10 Umutang ko nina king alo, ninguru ikialko,

nina ali sor supuling, ninguru sinar talko.

11 Nina Kari Biya ko nguangaral, ale kuring bowa ningi bagaralko.

12 Uririkiral ale koma dugu te nebagura kulukualko.

Mena mu, noko gomang magara tama kuamili iwita buluk palaguk se nina tairate memek tal bare ko.

Bare nina kariimet arikaya nu ninga sinar taukko kote namasan, mu nina amilmilaralko.

Copyright information for `WSK