Psalms 22

Kari ikup karogo ko aira (ves 1-21), se aking Kaem nup patowara ko den (ves 22-31)

(Devit ko wur bo)

Aga Kaem, aga Kaem, ni awuk se biring ani aisem?

Ni awuk se aninga aira me ikisam, ale awuk se ani me aga sangorsam?

O aga Kaem, ani woremkalal ka arusam, bare ni ani agiring me ilusam.

Aking turom ai lagasam, aeman me sapasam.

Bare ni king, keta kako nunguningkiri,

ana Isrel suen la ni nip patowasan.

Nanga taleng girigir ni ko ko nongomang ningi nunguning aram,

se ni memek ningi nunga sangem ale nunga giem.

Nuna nikate niaman, se ni nunga sangem,

nuna ni ko ko nongomang ningi nunguning aram,

se ni me nunga bita tokasam, am nunga sangarukasam, ale nunga giem.

Bare ani kariimet iwita mena, ani ali ko malolok iwita.

Kariimet suen la ani agarki maguwusan ale aga gusirsan.

Ale suen la agarkasan mu gusia den aga manorsan,

ale nusumulak daleluwu sapasan ale nusupuling sapagilingisan,

ale aga manorsan, “Ni Kaem ko gemang ningi nunguning masam, bare awuk se me ka sangarso?

E Kaem nika kueso, mu awuk se me ka sangarso?” iwita aga balugilingisan.

O Kaem, ni keta ani ayam tuagu ningi yawarakala aga sinar taem se bilangerem, ale tom ani amin nowakasam mu ni ninguru aga sinar beterem.

10 Ani bilanga se la, ni ko ko angamang ningi nunguning aram, se ni aninga Kaem bagerem tai aitak.

11 Ani ikup aga iram, se ni ani me aga bitarko!

Ani kariimet ito aga sangukko mena.

12 Kari memek suen biya bulmakau kari daong daong karogo ware turan aga talulurugilingiman.

Ale nuna sokel ago nunguningkiri, Basan wonong ko bulmakau turan.

13 Nuna layen mel bo moa naukko se ngang maso ale niaso iwitata, aga momon maguwumonko bagagilingisan.

14 Se yu ali awete kaposo ale palenga namoso iwitata, ani asokel mena saparam.

Ani angimik sokel kutukutuk ma saparam,

ale aeman sisi kaparam.

Kandel ko gris kani pupurut paga namoso iwitata, angamang tuagu sokel menaram.

15 Ani adogotak garagara mam,

ale angamili tarigi gek mam.

Ni ani kuerikko aga bita taem, se ani kuesam.

16 Kari memek aga taluluru guruguman, ale tai pingi aman.

Nuna aga asiwik agiting moman.

17 Se aninga angimik sokel suen la mu ko iki sapasam.

Kariimet ani agarki kuawuwasan,

ale “terong memek taem” ma balsan.

18 Nuna aninga angimik guang kututuwu giman ale nunumi tuman,

ale aga guang bo kolomon ale awiriya taukko mu ko kolagilingiman.

19 Bare ni aninga Kari Biya, ni awar biya me bagerko!

Ni aninga Saonga Kari, tairatela tair ale aga sangaruko!

20 Batir kore ningi aga sangaru toko!

Kausik nogore ningi ni aga sangaru toko!

21 Layen nuguring ningi aga bataguru toko!

Bulmakau diwang nunga dinak te aga sangaru toko!

22 Ani ka nip, ka dugu duap aga singsang nunga manik se ikimonko.

Ale biguwura ningi ka nip patawirikko.

23 Ale nunga manik, nina arikaya Kaem kuring bowa ningi bagasan mu ko nup patowaralko!

Nina Jekop ko taleng girigir, nup biya tualko!

Nina Isrel ko taleng girigir, nguanga se nup patowaralko!

24 Mu awuk, ani ikup memek arigem, bare nu ani me agarki pateram, ale koma me agarkukko iwita motam gurugu kigilik me beteram,

ale biring me aisam. Mena.

Nu aninga aira ikiam, ale aga saongam.

25 Biguwura biya te ani ka nip patawirikko,

ale anapeya munan bita kisekko ka manem mu kariimet nika kiring bowa ningi bagasan mu nomokete bita kisekko.

26 Se kariimet nunup mena kituwura guat mu na namon nungumik ago terong maukko,

kariimet ni ko ko kuesan mu nika nip patawomonko.

O Kari Biya, marak nungaru se tom suen biya amilmil ago la bagomonko!

27 Ali koma suen la te kariimet Kari Biya ko ikimon ale

giris palagomon ale kote taimonko.

Kariimet nungumik kirker suen la nup patawomonko.

28 Mu awuk, Kari Biya nu King,

nu ali sor suen la nunga bitarso.

29 Kari bibiya nongota nunup patawuwara mu suen la nu koma te taromon ale nup patawomonko,

kariimet suen la tom tukunangta baga kuesan mu nu koma te taromon ale nup patawomonko.

30 Se kariimet udagi aratomon mu noko ura ilumonko,

ale nunga kuriang iru aratomonko mu Kari Biya ko dugu duap nunga manarmonko.

31 Kariimet o udagi biya nunguningkiri, aitak me bilangasan, mu ko dugu duap ago la nunga manaru se balmon, “Kaem ko kariimet nunga sangaru tam bo,” mamonkowo.

Copyright information for `WSK