Psalms 32

Kari bo memek Kaem koma te balso se Kaem noko memek siwuso ko den

(Devit ko wur bo)

Kariimet nunga memek Kaem siwu saparam mu amilmilomonko.

Arikaya nunga ikup Kaem kutuwu saparam mu amilmilomonko.

Kari Biya saki nunga baluk, “Kari ari imitang aitak mu nungumik ikup memek bo mena,” ma baluk, se kari mutang munan kawel me karo tuigilingisan,

mu kari mu amilmilomonko.

Kari Biya, tom aninga memek ni kema te me balukasam, am kaluwukasam, mu tom mu te ani turom woremkalal angamang ningi nia nia lagakasam, ale angimik sokel mena sapakaso.

Turom woremkalal ni aninga memek bita lagerem mu aga kasurukasam, se arikasam ale ko ikup biyala aga moakaso.

Se worem kam te sirsir maraka saposo iwitata, angimik sokel am mena saparam.

Asele ani angamang ningi balem, “Aga ikup me ira kaluwurikko, Kari Biya koma te balikko,” maem,

ale ani ni kema te aga memek balu saperem, ale aga memek bo me ira kaluwurem.

Se ni aga memek suen la siwu saperem.

Se imitang ko ani balsam, nongomang ningi nunguning alo ikup memek bo betemon agi, te soromon agi, mu tairatela nika aru manarmonko.

Nuna butata betemon, mu tom yu lom biya lairuk tarigiruk mu te nuna memek bo me tamonko.

Ni keta suwanta aninga yumura ko kuwim.

Ani ikup arigek mu ni aninga sangaruko.

Se mu ko ani wur iluwek ale nip patawirikko.

Kari Biya iwita nanga manarso: “Ani ikia kisek, ale lage ni te namarko mu ka kausekkowo,” maso.

Se buruk kausik ko bagara manga tam am te me bagerko, donki iwita gemang aora biya me bagerko maso. Mena.

Hos donki nuna ikia mena. Se kariimet ain bilik mayang ago mu nuguring me tugumon, mu lage aguwaya te namomonko nunga diruwumon mu me te namomonko.”

10 Kariimet memek mu ikup yaman tamonko.

Bare kariimet Kari Biya ko nongomang ningi nunguning, mu nu pempem gomang nungarso ale nunga sinar taso.

11 Se nina kariimet diram alo, mu Kari Biya ko amilmilaralko!

Nina noko kuring karo tusan, mu wur iluwal ale amilmil kelagalko!

Copyright information for `WSK