Psalms 36

Kariimet memek nunga kilek memek, bare Kaem ko kilek mu ningo nunguningkiri ko den

(Devit ko wur bo)

Kari memek mu ikia memek gomang ningi aniso ale manarso.

Nu Kaem ko me nguangoso. Mena. Nu Kaem biring tuso.

Nu kota numi ikiso mu nu yawarakala ko numi balso.

Ale ikiso Kaem noko memek me arigiso maso, ale “koma me aisukkowo” ma balso, ale am bitawoso.

Noko kuring te den memek se den kawel la aratoso.

Noko ikia maga saparam se kilek ningo bo me beteso.

Noko anira kuwim te taga aniso, mu nu kilek memek bitirukko ko ikia mu nungurso.

Nu ikia memek me biring tuso, nu am ikia memek borta la bita lagoso.

O Kari Biya, nika gemang nangarsam mu biyala nunguningkiri, taiti kiaram.

Ni me nanga betesam, pempem nanga sinar tasam, mu betelatala am biyala nunguningkiri, taiti nuwi kiaram.

Ni munan ningo la betesam, mu duruk kalel bibiya iwitata.

Nika tutera ura diram la betesam,

mu du biya nunguningkiri, gagi du biya iwitata.

Ni kariimet, se buruk kausik inanganang ago la nunga bitarsam.

Ni gemang nangarsam mu yawarakala nunguningkiri, ana ko kuesan.

Ana nika luman bowa ningi yawarakala bagasan.

Ni na ningo ningo nangarsam se nasan,

ale yu ningo nangarsam se nasan ale amilmilasan,

mu awuk, ni marak sokel ko duap,

se ana nika nikim te nikim ago bagasan.

10 O Kari Biya, kariimet nika ikisan mu tom suen biya nunga sinar toko.

Ale kariimet diram mu munan ningo la nungaruko.

11 Ni kari memek nunumi patowara mu nungarki sager se ani me aga momonko, ale me aga karomon se nagurikko.

12 Arigalko! Kari memek dagulaman, ale udagi me barasomonkowo!

Copyright information for `WSK