Psalms 5

Kari Kaem sangukko ko ngatonga den

(Devit ko wur bo)

O Kari Biya, ni aninga aira ikiko,

de gurugu ale angamang niara ikiko!

Ni aga King, aga Kaem, aga aira iki ale aga sangaruko.

O Biya, ani ni la ka aru manorsam.

Ni turomola suen biya ani agiring ikisam.

Worem basuso mu ani ka arusam,

ale ko koma ko ade betesam.

Kaem, ni munan memek mu ko me amilmilasam.

Kari memek alo mu nikarak me bagomonko.

Numi patowara kari ni kema te me sanamomonko.

Mu awuk, kari memek betesan mu ni me nunga kuesam.

Ni kawel kari suen la nunga maguwusam.

Ale kari nuguting gue ago se kari kawel mu me ta nunga kuesam.

Bare ni ninguru aga kuesam.

Se ani nika tempel kako ningi nagurik ale

nguanga se abagura kulukuek ale nip patawirikko.

Kari Biya, aninga kager kari suen biya anisan!

Bare ni munan nuam, se ni la aga sangaru ale lage aga kasuruko.

Aninga kager kari den nunguning bo me balsan.

Nuna yam maguwura ko la ko nungamin tugusan.

Nunga nodogotak nuguring mu kuera mutim iwita,

se nunga nungamili den kawel te balsan.

10 Kari Biya, ni koma memek nungaruko!

Nunga ikia memek tasan bare ni balu se nuna te dagulomonko.

Nunga memek suen biya koma ko nunga karoko,

mu awuk, nuna ni kiring batogarman ko moke.

11 Bare kariimet ni nunga sangaruko kete namasan, mu ni nunga bitaru se amilmilomonko.

Kariimet ni ko ko kuesan, mu ni nunga ira muru se ko ko amilmilomonko, ale tom suen biya nip te wur ilu se bagomonko.

12 O Kari Biya, ni kariimet diram mu marak nungarsam.

Ni nunga kuesam, ale nunga karem iwita nunga kaluwusam.

Copyright information for `WSK