Psalms 6

Kari ikup ago se Kari Biya sangukko aruso ko den

(Devit ko wur bo)

Kari Biya, ani ago ko me gemang maguruk se me aga biriruwurko,

ka gemang maguruk se memek te me aga bitarko!

Ani angimik sokel mena kaparam.

Ago ko neman bataguk se gemang aisuko!

Angimik sokel yaman iki se aniso.

Se ni sokel iru aisuko!

Ani angamang tuagu ikup biya.

Se ni tom amaru te aninga sangaruko?

O Kari Biya, tair ale aga sangaruko!

Gemang aisu ale kuera lage te mu aga sangaruko!

Mu awuk, kari maingkala kuagilingisan mu ni ko ko me nungamin tugusan.

Se kuwim nuna te anisan mu kari bo ta ni nip me patowasan.

Ani niara te angimik sokel mena saparam.

Turom suen biya aninga amononge kapa lagoso,

se aninga anira kuwim amononge te pupurut pagoso.

Ani angimik ko kager kari suen biya, se ani nia mo lagasam,

ale amatam kui laga muruwuram, se ani sor arigekko me terong.

Nina kari memek, tagi talko!

Kari Biya aninga niara ikiam,

Ani nu aga sangukko aurem,

se ikiam ale agiring iluwokkowo.

10 Se kari ani agarak kagersan mu ani nunga kiarik mu ko nguangomon dolomon, ale tairate la nagumonko.

Copyright information for `WSK