Psalms 62

Kari Kaem ko sinar taukko mu ko gomang ningi nunguning ko den

(Devit ko wur bo)

Ani Kaem kota suwanta aga sangukko mu ko angamang ningi nunguning, se angamang lila te bagasam.

Nu la aninga Saonga Kari.

Nu la aninga manga gek am, nu la aga bitarso, nu la aninga yumura kuwim, se ani memek me taikko.

Kar parasa kapara iwitata, ani asokel mena saparam.

Se nina tom awila nunguningkiri aninga moralko agarak kager la lagasan?

Nina aninga ura nup ago te bagasam bare te aga menawuralko ago kaesan.

Ale den kawel ko ninguru kuesan.

Nina nigiring te ani ago ko den yawarakala balsan,

bare ninga nengemang ningi mu aninga bita maguwuralko.

Ani pempem angamang ningi nunguning Kaem aga sangukko bagasam.

Nu kota diram aninga sinar taso ale aga sangarso.

Nu kota diram aninga kar gek am, se ani memek me taikko.

Kaem kota aninga sangarso, ale kota nup biya aisiso.

Nu aninga Sinar Kari, aninga Lakira Kari sokel ago.

O aga kariimet, tom suen biya Kaem ko nengemang ningi nunguning bagaralko,

ale ninga nengemang, ninga ikia suen la nu manaru saparalko,

mu awuk, nu anananga Bitua Kari Yawara.

Kariimet suen la, nunup ago ta, nunup mena ta, mu mel gotek,

skel te nunga awurokko mu ko ikup mena, guyak gotek,

daula nagiring te aratoso iwitata.

10 Nina tere daong te saki nunga mel gial ale ningimik mel suen arukko mu ko me kaeralko.

Se manga mel suen biya gial se ningimik mel arukko agi, mu mel mu nengemang tawun biya me tualko,

ale mel mu ninga sangukko ma me balalko.

11 Tom suen biya Kaem iwita balso se ani ikisam,

“Ani Kaem, ani sokel karogo,

12 ale ani kariimet ninguru nunga kuesam.”

O Kari Biya, ani ikisam ni ana suen la nanga munan betesan mu te iki se diram la koma nangaruko.

Copyright information for `WSK