Psalms 63

Kari Kaem ilak bagurukko gomang tawun biya aniso se ngatangaruwoso ko den

(Devit ko wur bo)

(Devit naguram ale Judiya ningi sor garagarayam mu te yumuram baga se ngatangara ko den imi batogam.)

O Kaem, ni aninga Kaem,

ani nikarak bagirikko kaeya lagasam.

Ali tuwik mena se garagara ma kaposo se tuwik kapurukko kimi bita lagoso iwitata,

ani adera angimik guang likilim la ni ko ko nia lagasam.

Ani nika kuwim kako nunguning mu ningi kasu nagurik ale ka nikinang, ka sokel arigekko ko angamang biyala aniso.

Ani ali imi te marak bagasam mu yawarakala tala, bare nika gemang lila ani aisisam mu am yawarakala nunguningkiri.

Se mu ko ani ni nip patawirikko.

Ani marak bagasam imitang te la amilmil kisu se bagirikko.

Ale ka nip te agiting patawirik ale ka aru manikko.

Se aninga adera mu kari inang ningo ningo naso ale kumik terong maso iwitata, terong maukko.

Se ani amilmil ago la wur ilu se nip patawirikko.

Aninga anira kuwim te taga anisam mu ani ni ko ko angamin tugu lagasam,

turom luan maiya ani ni ko ko angamin tugu lagasam,

mu awuk, ni tom suen biya aninga sangorsam.

Ani nika luman bowa ningi baga se wur ilusam.

Ani nikarak kapetasam,

se ni yawarakala aga bitarsam.

Kari aninga momon se kuerikko ago kaesan, mu kari kuera nunga nuguwim te kapa nagumonko.

10 Nuna kager ningi kuemon mu

nunga nungumik guang mu kausik diwang taimon namonko.

11 Bare king mu Kaem ko amilmilarukko.

Kariimet Kaem nup te den nunguning balsan mu ko amilmilomonko.

Bare kariimet kawelasan mu nuguring sisirokko.

Copyright information for `WSK