Psalms 66

Kaem amilmil tua ko wur bo

Ali sor lilim ko kariimet,

amilmil kelagal ale Kaem nup patowaralko!

Wur iluwal, nup biya tual, ale noko nup kualala biya patowaralko!

Ale Kaem maonal, “Kilek suen biya ni betesam mu am yawarakala nunguningkiri.

Nika sokel am biya nunguning,

se kari nikarak kagersan mu ni ko ko ninguru nguangasan.

Se ali kariimet suen biyala nikate tai biguwusan, ale wur ilusan, ale ni nip patowasan.” Uwutata Kaem manaru se nup patowaralko.

Tairal ale Kaem kilek kasa beteram bare arigalko!

Kariimet ningi mel bibiya beteram bare arigalko!

Nu balam se gagi kuring kauram se ali saun aratam se, anananga taleng girigir nosowek te aolak iluman kasu kapaman, ale nu kilek beteram mu ko amilmilaman.

Nu ko sokel karogo nunguningkiri mu te ali sor bitaru se sor sor ko kariimet ikia munan betesan mu noko ari ikiwoso.

Se nina kuring batoga ko kariimet alo, nina nu ilak nisipiling me lagurukko!

Nina sor suen la ko kariimet anananga Kaem nup patowaralko!

Nigiring paogal ale ko nup biyala patowaralko!

Nu ikup ningi nanga sangaru tam se

ana ikup mu te me dagulaman.

10 O Kaem, ni nanga ira arigem,

kari silva tama te kaisan se ko karur menaso ale nikim pagoso iwitata, ni nanga ira arigem.

11 Ni dagarok te nanga iluwem ale ikup biyala nangarem.

12 Ale am nangarkiwerem se nanga kager kari nanga bita maguwukasan.

Se ana tama ningi, se yu lom ningi aolak iluman,

bare aitak ni wonong yawara te nangarak tairem.

13 Ani ikup gi se iwita balem, ani ni tama bita kisekko maem.

Ale den balem mu karo tuek ale tempel ningi sipsip mel nungumik yawara yawara mu ago tairik ale tama bita kisekko.

Sipsip anumang se, kao anumang mu se, meme buta,

se mel mutang kaiyek se siring yawara ikiko.

16 Nina kariimet Kaem kuring bowa ningi bagasan mu tairal

se ani Kaem aguwaya aga saongam mu ko dugu duap ninga manik se ikialko.

17 Ani nu aga sangukko niarem,

ale nup patawirikko wur iluwem.

Se nu aga saongam.

18 E ani aga ikup memek abiring me tuem ale mu,

Kari Biya aninga agiring me iluwa ikiam ale.

19 Bare nu aninga agiring iluwam ale aga saongam.

20 Se ani Kaem nup biya tuekko.

Mu awuk, nu aninga aira me biring tuam,

nu gomang am aisam ale aga saongam.

Se mu ko nup biyala patawirikkowo.

Copyright information for `WSK