Psalms 7

Kari ikup karogo ko ngatang den

(Devit ko wur bo)

Bensamin kari Kus mu Devit nup balu maguwuram, se umutang ko Devit gomang ikup biya nunguningkiri, se wur imi ilu se Kaem ngatangaram.

O Kari Biya, aninga Kaem, kari aga momonko aga karowasan,

se ni aga bataguru toko kete tairem.

Ni aga sangaruko.

Mena mu, nuna layen mel iluso ale guratoso,

ilak kuwim yumura te mu te namoso ale batutumuso se katir katir kaposo iwitata,

aga ilumon agarak namomon ale aga maguwumon bare ko.

Se mu te kariimet bo ani me aga sangukkowo.

O Kari Biya, aninga Kaem, ani kari bo memek kumik te bitirik agi,

aninga bo ko kager alo nuguting te bitirik agi,

aninga kager alo memek bo angimik te me betemon bare ani am nunga bita maguwurik agi mu sesele,

am aga bitar se, aga kager kari am aga karomon aga ilumon, ale aga moa maguwumon se kuerik se

aga sapomon se gege ningi dagulik ale ani se bagirikko!

Bare Kari Biya, ani kilek memek bo uwutata me beterem. Mena.

Nuna memek beteman mu ko nogo ko gemang maguruk se bares ale ani ago ko ara bitarko!

Kager kari agarak bita maguwuwasan mu nunga maguwurko!

Ni munan diram bare la ko kuesam.

Se mu ko ni kariimet suen la kimik duap te nunga bolala awur ale nunga bitaruko!

Ni mu kariimet suen la nunga Tutera Kari.

Se ani munan diram bitakasam mu ko ni aninga sangaruko!

O Kaem, ni diram nunguningkiri. Ni kari suwan suwan nunga ikia, nunga nongomang ninguru ko iki sapasam.

Se kari memek alo ikia memek betesan mu nongoma kalo ale

kari ningo mu koma ningo nungaruko.

10 Kaem nu aninga karem.

Nu kariimet nongomang diram mu nunga sangaru taso.

11 Nu tutera ura diram la beteso.

Ale pempem kari memek betesan mu nogo ko gomang magoso.

12 Nuna me giris palagomon, mu Kaem ko batir kore iluwok

ale ko daga wol ago mu tagirok ale sinar ago bagurukko.

13 Nu ko daga gotektek tama karogo mu maingkala nungam se aniso,

ale gatu mel te nunga morukko maingkala nungam se aniso.

14 Arikko. Kari memek alo ikia memek betemonko ko ikia tasan, kawel betemonko ko den nungursan,

15 ale kari saki te ningi dagulomonko mutim isan,

bare mu aking nongota ningi dagulasan.

16 Nuna nongota nunga ikia memek betesan mutang te memek togilingisan.

Ale nongota kager daong betesan mu aking peleso nongota nunga moso.

17 Kaem diram nunguningkiri, se ani amilmil tuekko.

Kaem kualala biya, se wur iluwek nup patawirikko. Nunguning.

Copyright information for `WSK