Psalms 95

Kaem nup patowara ko wur bo

Tairal se Kari Biya nup patowanakko!

Nanga Bitua Kari Kaem mu ko amilmilanak ale ko wur ilunakko!

Ana nu koma te kasu nagunak ale amilmil tunakko!

Ale wur bawe te nup patawu kualala betenakko!

Mu awuk, Kari Biya mu nu Kaem Biya sokel karogo.

Nu King, nu kaem kawel suen biya nunga kiaram.

Nu ali lilim la bitarso. Sor gomeng du biya tai nama duruk kalel kalel te mu nu la bitaru saposo.

Gagi mu noko, mu nu nungam.

Se ali mu nu kota nungam ale bitarso.

Kari Biya kota nanga beteram se, tairal se koma dugu te nabagura kulukurnak ale nup patowanakko.

Mu awuk, nu anananga Kaem se, ana mu noko kariimet.

Nu noko sipsip iwita nanga bitarso ale nanga sinar taso.

Se aitakta nina ko aira ikial, mu karo tualko.

Nu iwita balso: “Nina nengemang aora biya me bagaralko.

Girakala ninga taleng girigir sor garagarayam te, sor Meriba se Masa mu te baga se bitakasan mu turan te me beteralko.

Nuna ani kilek kilek sokel ago te nunga sangikko beterem mu arigilingiman,

bare aninga ira arikasan, ale angimik ko den duap duap balukasan.

10 Se yar 40 ningi ani kariimet mu nogo ko angamang magakaso se ani nunga balem, “Kariimet imi nunga ikia nongomang kirker namoso.

Nuna aninga agiring karo tumonko miagilingisan.”

11 Se ani angamang magaram se den aora biya balem, “Nuna aninga kuwim mu te utu nagumon me nonoman sapomonkowo,” ma balem.

Copyright information for `WSK