Revelation of John 13

Mel diwang gagi ningi baga aratam

Se ani mel diwang bo gagi ningi aratuwaram mu arigem.
Rev 13:1 Mel diwang gagi ningi baga aratam: Mat 24:15; 2 Thes 2:1-12; 1 John 2:18.
Mu ko supuling mu 7, se ko dinak 10. Se ko dinak suwan suwan awete mu crown ago la. Se ko supuling suwan suwan awete mu nup memek memek anikaso, nup mu ko nunguning mu nu kota numi patowara ale Kaem kiara iwitata numi bitakaso.
Mel diwang mu ko ariga mu leopard iwita. Bare ko sowek mu bear ko sowek iwita. Se ko kuring mu lion ko kuring turan. Se dragon nu mel diwang mu sokel tuam, ale supuling biya ko beteram, ale nup biya tuam.

Mel diwang mu ko supuling bo mu ko ariga maingkala mora se kuera iwita, batir te moman se kueram bare aking maragaram iwita, se lot supuling te mu auram se aking nungeram. Se kariimet suen la biririkiman ale mel diwang mu kowom karokasan. Nuna dragon nup patawukasan. Mu awuk, nu ko sokel mel diwang mu tuam se. Ale nuna mel diwang betelatala nup patawukasan ale balukasan, “Awiri ta mel diwang umu turan a?” makasan. “Se awiri nu ilak kagerurukko terong mam a?” ma balukasan.

Sige 42 ningi Kaem mel diwang mu am ari karo tuam, se sokel ago baga se numi patowara ko den balukaso, ale Kaem kumik ko den memek memek balukaso. Nu kuring paogam ale Kaem nup balu maguwukaso, ale ko nup se ko kuwim te bagoso mu se, ko kariimet ilak duruk wonong te bagasan, mu ago nunga balu maguwukaso. Kaem am ariwaram se nu Kaem ko kariimet arungu kageraram ale nunga kiaram. Ale nu ko sokel te ali sor suen biya ko kariimet, nunga nungumik kirker se nunga den kirker, mu te nunga bitarukaso. Se ali imi ko kariimet suen la ko nup patawomonko. Bare arikaya tom suen biya Kaem ilak bagomonko se nunga nunup Sipsip Gotek moman se kueram mu ko batoga te aniso, mu asele nuna mel diwang ko nup me patawomonko. Mu Kaem ali imi me nungurukaso la, nunga nunup giram ale batoga mu te awuram se anikaso.
Rev 13:8 Sipsip Gotek ko Batoga: Rev 3:5; 17:8. Verse imitang ko den guruga ko lage ilagala, se bala bo mu iwita: “Mu Kaem ali imi me nungurukaso la, nu giram ikiam Sipsip Gotek kariimet nogo ko kuerukko mu ikiam.”


Awiriya dogowa ago mu den imi ninguru ikiokko!

10 Awiriya talipara ningi namurukko, mu talipara ningi namurukko.
Awiriya batir te kuerukko, mu batir te kuerukko.
Se munan umutang ko, Kaem ko kariimet nunga nongomang ningi nunguning ilukuawumon ale sokel ago sanamomonko.
Rev 13:10 Jeremiah 15:2; 43:11.


Mel diwang ali ningi baga aratam

11 Asele ani aking mel diwang bo tala ali ningi aratuwaram se arigem.
Rev 13:11 Mel diwang imitang mu ko nup bo mu prophet kawel: Rev 16:13; 19:20. Kristus Nuet kote sokel tam iwitata (Mat 11:27), mel diwang gagi ningi baga aratam mu dragon kote sokel taso (Rev 13:4). Se aking Kaem ko Korang Bur Kristus nup biya tuso iwitata (John 16:14), prophet kawel mu mel diwang gagi ningi baga aratam mu nup biya tuso (Rev 13:12).  
Mu ko dinak ilagala, sipsip gotek ko dinak iwitata, bare nu dragon munakoso iwita munakakaso.
12 Noko sokel mu mel diwang giram aratam wore ko sokel turantala. Se nu mel diwang giram wore ko ura sangaruwakaso, ale ali ko kariimet suen la nunga manarukaso ale balukaso, nuna mel diwang, batir te moman se kueram iwita bare aking maragaram, mu ko nup patawomonko makaso.

13 Ale nu kilek bibiya duap duap bitakaso. Ale kariimet nomotam te balam se tama taiti kuali tai tai kapakaso.
Rev 13:13 Prophet kawel mu kilek bibiya te kariimet nunga kulokko: Mat 24:24; 2 Thes 2:9.
14 Kaem mu am ariwakaso, se nu mel diwang giram aratam mu te sangukko kilek kilek mu am bitawakaso. Ale kilek mu te ali kariimet nunga nongomang kulukurukaso.

Ale nu nunga maonam se nuna mel diwang batir te moman se lot memek tam bare aking nungeram, wore ko nup te patawomonko, manga te kuar bo nu ko turantala kalo nunguru bangaru beteman.
Rev 13:14 Munan uwutata Daniel ko tom te aratam: Dan 3:4-6. Ana mel uwutata nup me patowanakko: Deut 13:1-4.
15 Se Kaem am ariwakaso, se nu mel diwang giram aratam mu ko dora kuar mu bur marak tuam se munakakaso. Se kariimet mel diwang giram mu ko nup patawomonko miakasan, mu dora kuar mu balukaso se nunga moakasan se kuakasan.

16 Se betelatala mel diwang udagi aratam mu balam, se kariimet nunup ago se nunup mena, nungumik mel ago se nungumik mel mena, ura dungan se ura dungan mena, mu suen la nunga nuguting sengam mu te, agi nomoke sail te kiwol nungarukasan. 17 Kiwol umutang mu mel diwang giram aratam ko nup te, agi ko nup ko number, umutang nungarukasan. Se awiriya kiwol umu mena, mu nu mel saki me diaruk gurugokko. Mena.

Ana mel mu ko ninguru ikinakko. Mel diwang ko number mu 666. Umutang mu kari bo ko nup wore ko koma tata number te aniso. Kari ko ikia karogo, mu nu mel diwang ko number ko nunguning ikiokko.
Rev 13:16-18 Number 7 mu Kaem ko number: 3:1; 5:6. Se 666 mu mel diwang ko number. Nu Kaem ilak me terong; noko munan memek nunguningkiri. Buta se ana Kaem ko kariimet mu ko kilek memek me ta karo tunakko; ale ko kiwol nangimik guang te me bita nangarmonko: Rev 14:9-12.


18 

Copyright information for `WSK