Revelation of John 14

Sipsip Gotek ko kariimet arungu Duruk Zion awete sanamaram

Se ani loagerem mu Sipsip Gotek Duruk Zion mu awete sanamiwaram se arigem! Se kariimet 144,000 mu nu ilak sanamingaman. Sipsip Gotek ko nup se ko Nuet nup mu nunga nomoke sail te bataguru beteman se anikaso.
Rev 14:1 Duruk Zion: Joel 2:32.
Se ani nirung bo duruk wonong te taikaso se ikiem, mu yu biyala garap luan te tai suragoso mu ko nirung iwita, se pure biyala pagoso wore ko nirung iwitatala. Se ani nirung mu ikiem, mu kari gita musik te kolasan mu turan. Ale nuna Kaem ko daiga kuwim biya duap te, mel marak anira 4 mu se, supuling alo 24 mu nongoma te sanamaman, ale wur iru bo ilukasan. Kariimet 144,000 Kaem ali imi ko kariimet nunga ningi nunga giam umutang la wur mu ko ikimon ale ilumonko terong.

Nuna kako nunguningkiri, saman katagot me bitawara. Se Sipsip Gotek wonong awukaya mu te namurukko mu nuna ilak la kowom karosan. Kaem ali imi ko kariimet mu nunga ningi nunga dia tam, nuna noko kariimet bagomonko, se Sipsip Gotek ko kariimet bagomonko. Nuna den kawel bo me balukasan. Nuna memek bo mena, am yawarakala bagakasan.

Engel ilagala suwan den balman

Se ani engel bo kualala bungiawaram se arigem, mu den gilalong yawara tom suen biya anirukko mu karogo tairam, ale ali imi ko kariimet nunga manukko: ali sor suen la ko kariimet nunga den kirker, se nungumik guang kirker, mu suen la den imi nunga manukko tairam. Nu biyala airam ale balam, “Nina Kaem ko nguangaral ale ko nup patowaralko. Mu awuk, tom nu kariimet nunga tuterukko mu tai aratam. Nu taiti ali se gagi yu beteram borta nup patowaralko.”

Se engel bo engel giram tairam wore kowom kaoram ale balam, “Wonong biya nup ago Babylon mu magaram bo! Nu maga saparam! Nu ali sor suen la ko kariimet nongomang kulukurukaso, se noko munan memek saman katagot mu ilak bita gilingikasan, mu waen aora nungarukaso se nokasan iwitata.”
Rev 14:8 Babylon: Isa 21:9; Jer 51:7; Rev 18:1-24. Girakala Babylon wonong mu wonong biya, sokel ago, nup ago. Se ko kariimet sang mel ningo ningo ago bagakasan. Wonong mu ningi munan saki memek memek bitakasan tala. Babylon supuling alo mu Kaem ko kariimet nunga bita maguwukasan. Se John den imi batogam mu, tom mu te Rome ko munan mu uwutata, se nu den iram ale Babylon mam. Koma suwanta tala, aitak ali sor se wonong awukaya nunga munan uwutatala, mu ana Babylon ma nunga balsan. Babylon mu lage luan imet iwita: Rev 17:5. Mu awuk, nu ali imi ko mel ningo ningo se ko munan duap duap te kariimet nunga tagiso, se Kaem nubiring tusan ale munan memek memek te la namasan: James 4:4.


Se engel bo engel ilagala umutang nogowom kaoram ale sail ago airam balam, “Awiriya mel diwang se ko koma tata kuar kisiman mu nup patawuruk, ale ko kiwol mu kuting te, agi moke sail te tauk, 10 mu nu betela waen aora bo Kaem nunguru beteram se bagunang ago aniso mu naukko, umutang Kaem ko gomang magara. Se waen umu mu Kaem yu karogo me gurugam. Kari mu engel kako nomotam te, se Sipsip Gotek motam te, sulphur kaniwuruk mu te yaman biyala taukkowo. 11 Se tama biya, kariimet uwuta yaman nungarukko, mu ko bur mu tom suen biya ko tarigi lagurukko. Se arikaya mel diwang mu se, ko kuar mu nup patawomon, ale ko nup ko kiwol nungumik te tamon, mu tom suen biya turom woremkalal butata am memek biya bagomonko.” Engel mu butata balam.
Rev 14:9-11 Nungumik te kiwola beteman ko den: Rev 13:11-17; 19:20; 20:10,15; 21:8.


12 Buta se Kaem ko kariimet arikaya noko den karo tusan, ale nunga nongomang ningi nunguning Jesus ko mu ilukuawusan, mu nuna umutang ko ikimon ale sokel ago sanamomonko.

13 Se ani kuring bo duruk wonong te mu iwita balam se ikiem, “Den iwita bataguruko: Kariimet aitak se tom udagi ko, Kari Biya ko nongomang ningi nunguning baga kuesan, mu amilmilomonko!”

Se Korang Bur betela balso, “Nunguningta! Nuna udagi bo karogo ura kowar me tamonko, mu nuna nonoman sapomonko. Mu awuk, nunga munan ningo bita lagaman mu ago namomonko.”

Aliti ali lilim la te inang gia ko tom

14 Ani loagerem mu taiti nuwi bo siraram mu arigem, ale taiti nuwi mu awete mu kari bo ko ariga kari nunguning iwita mu dagiwaram se arigem. Nu crown gold mu supuling te anikaso, se batir patunga kore wuli kapawara mu kuting te iluwakaso. 15 Aking engel bo temple ningi baga aratam, ale sail karogo kari taiti nuwi te dagiwaram mu auram, ale maonam, “Ka batir to ale na inang garukaram aniso mu batutumurko. Inang gia ko tom tai aratam. Ali lilim la te na inang garuka muruwuram aniso.”
Rev 14:15 Inang gia ko tom: Mat 13:36-43.
16 Se kari taiti nuwi te dagiwaram mu ko batir ali te sisupuram, ale ali te na inang garukaram mu batutumuram.

17 Aking engel bo tala duruk wonong te temple ningi baga aratam. Nu betela batir patunga kore wuli kapawara mu iluwaram. 18 Aking engel bo tama kuwim biya bitaruwara mu altar beteram ale tairam, ale engel nu batir kore wuli kapawara mu iluwaram mu sail karogo auram, ale maonam, “Ka batir to ale ali te waen ko nunguning yoparam mu batutumur ale bolala awurko,” mam. “Mu ko nunguning suen biya garukaram,” mam. 19 Se engel mu ko batir ali te sisupuram ale waen nunguning mu batutumuram. Ale giam ago nama kuwim biya waen te nungursan mu ningi waram. Kuwim umutang mu Kaem ko gomang magara ko balso.
Rev 14:20 Jesus mu waen nunguning suwik te ita parasuwurokko: Rev 19:15.
Kuwim mu wonong buring ko anikaso. Se nuna te waen nunguning irakasan pungurukasan, se ko yu kapakaso mu gue, se lom iwita 300 kilometre, mu 1600 stadia namakaso, se ko kalel mu ain horse nuguring te betesan se aniso mu te tarigikaso.

20 

Copyright information for `WSK