Revelation of John 18

Babylon magaram

Mel imi menaram se ko udagi mu ani engel bo duruk wonong beteram tai kapawaram se arigem. Nu nup biya sokel karogo. Se noko kumik nikitang mu ali lilim la nikitang tuam. Nu biyala airam ale balam:

“Wonong biya Babylon mu magaram!
Am magaram nunguningkiri!
Wonong mu aitak bur memek duap duap nunga kuwim,
se inanganang memek nunguningkiri agotala te anisan.
Mu awuk, nu saman katagot ko munan mu waen iwita
ali lilim la ko kariimet nungaram se naman ale ngualaman.
Ali sor supuling alo mu nu ilak saman katagot bita gilingikasan.
Se ali sor suen la ko diara guruga kari alo mu
nu ilak mel ninguru diakasan ale te manga biyala tokasan.
Mu awuk, nu mel ningo ningo awete bagurukko ninguru ko kuakaso.”

Se ani duruk wonong te kuring bo akingtala balam se ikiem:

“Aninga kariimet, nina sor sumu beteral ale tai aratalko!
Nina noko memek beteso sowore ago beteral bore ko!
Ale ko koma memek tauk wore nina karogo tal bore ko!
Rev 18:4 Kaem ko kariimet mu Babylon ko munan me ko kuemonko: Isa 52:11; 1 Cor 6:14-18; John 17:15-17; 1 John 2:15-17.

Mu awuk, noko munan memek bita lagaram mu
duruk iwita tarigiram ale kalel biya nunguningkiri,
se Kaem ko ikiam.
Nu saki alo nunga bita maguwu lagakaso turantala, aking nina nu bita maguwuralko.
Bare am ninguru tala bita maguwuralko.
Nu waen aora saki alo nungarukaso se nokasan iwitatala,
nu waen aora nunguningkiri mu gira udagi am tualko.
Nu mel ningo ningo ninguru gikaso,
ale kota numi patawukaso,
ale kualala biya namakaso.
Se mu iwitatala, nina iral ilak kaparal ale yaman se ma niara biyala tualko.
Nu gomang ningi balso:
‘Ani ali lilim la ko supuling imet ani,
se aga daiga kuwim biya te dagiwasam.
Ani imet kuari kuera se gerewa bagara iwita mena.
Ikup bo aningate me aratuk se me maik niarikkowo,’ maso.
Nu uwutata balso.
Se umutang ko, worem suwanta te mel memek duap duap nu irokkowo,
kuera, ma niara, se karak biya nu irokkowo!
Nu tama te kani malilirukko,
mu awuk, Kari Biya Kaem sokel ago nunguning wore noko bagara tuteram ale memek tuokko.

“Se ali sor ko supuling alo nu ilak saman katagot bitakasan, ale nunumi patawu patawu ilak geragakasan, mu nuna nu kaniwuruk se ko tama bur aringimon ale ko mamon niamonko. 10 Nuna noko yaman towuruk mu ko nguangomon, ale awar sanami se balmon:

“ ‘Ayo Babylon! wonong biya yo! wonong sokel ago yo!
Tairatela memek biyala ka iram!’ mamonko.
11 “Se mel diara guruga ko kari alo mu noko ko mamon niamonko. Mu awuk, kari ito nononga mel tutuk diamonko mu mena se. 12 Nunga meltutuk diara ko mu, gold, silver, manga gotektek nikitang ago ningo ningo, se manga gotektek siraram palepalengam, umutang dia gilingikasan. Se guang ningo ningo, sang siraram, sang diriyam, sang gue muguri iwita, sang wulekuru kalilok tuar. Se tam duap duap siring yawara. Se mel duap duap elephant kuwas te, se tam ko koma kalel biya mu te, se brass, ain, se manga aora marble masan mu te kisira nunga mu se, 13 sinamon se karati mel mel na karogo kamara ko mu se, tam kiri bur siring yawara kaiya ko mu se, gureng siring yawara yawara. Se waen, se olive ko yu welang, se wheat flour ningo, se wheat muguri. Se bulmakau sipsip, se horse karis ago, se ura dungan kariimet agotala nunga awukasan, kariimet nunga dia gimon ale aguwaya te nunga betemonko mu te nunga betemonko. Bare aitak awiri nononga mel tutuk imitang diaruk i? Mu mena.

14 “Ni Babylon, ikiko!

Mel ningo ningo ni ago bagerko mu ka bita muruwuman!
Nika manga mel se ka bala yawara yawara mu menaman,
udagi me giko!

15 “Diara guruga kari alo mel umutang nu ilak diakasan, ale nukote manga biya tokasan, mu nuna nu ko yaman towuruk mu ko nguangomon, ale awar sanamomon, ale ari se ko mamon niamon, 16 ale balmon:

“ ‘Ayo, wonong biya yo!
Ni guang ningo ningo guaram, se gue muguri iwita mu nagukasam.
Ale gold se, manga gotektek nikitang ago ningo ningo,
se manga gotektek siraram palepalengam mu te nimi bala tuikasam.
17 Ale aitak aking tom tukunangta ningi,
ni ka manga se ka melmasak magaman ale ka bita sapaman!’
“Se dal kotam kotam, se dal ko diruwura kari alo, se ko ura kari, mu awar sanamomon,
18 ale nu kaniwoso mu ko tama bur aringimon ale balmon, ‘Wonong bo, wonong biya Babylon imi ko turan mena!’ ma balmonko. 19 Ale ali gege kupkup bila nusupuling te warmon, ale ko mo nia se balmonko:

“ ‘Ayo, wonong biya yo!
Nu kota ko manga mel te,
dal gagi ningi geragasan mu nunga kotam kotam nungumik mel ago ko aratu muruwuman!
Ale aking tom tukunangta ningi mel suen la nu bita taman!’

20 “Duruk wonong, nina amilmilaralko!
Kaem ko kariimet, se apostle se prophet alo, nina amilmilaralko!
Nu ninga bita maguwu lagaram mu ko, Kaem nu bita maguwuram! ”

21 Den imi menaram se, engel bo sokel ago mu manga aromemek bo, tawenangam, wheat te etesan iwita, mu patowaram, ale gagi ningi sapa se balam:

“Nuna uwutata wonong biya Babylon patawomon ale
sail ago sapomon se nama dagulok se udagi bo ago me aringimonkowo.
22 O Babylon, ka gita nirung, se mel duap duap nirung welang yawara, se birak duap nirung, biugel nirung, mu udagi bo ago me ikimonkowo.
Nuguting kiwol kari bo se ura duap duap ko kari mu nika ningi me aringimonko.
Se wheat ita ko manga nirung bo me ikimonko.
23 Ka ningi galep bo kaniruk ale nikitang me kapurukkowo.
Imet kari iru numi gia ko amilmil nirung bo kapuruk se me ikimonkowo.
Mu awuk, ka diara guruga kari alo mu ali imi ko kari bibiya bagakasan,
se ni ka kilek kawel te ali lilim la ko kariimet nunga kulem.
Ni wonong imi ka ningi kariimet nunga gue biyala kaparam:
prophet alo nunga gue, se Kaem ko kariimet nunga gue, se kariimet suen la ali imi te nunga moman se kueman, wore nunga gue agotala.”
Rev 18:24 Jesus uwutatala Pharisee alo nunga kawel ko, den te nunga atumam: Mat 23:35.

24 
Copyright information for `WSK