Revelation of John 2

Den Ephesus Kris alo nongote namaram

“Den imi bataguru Ephesus Kris alo nunga engel tuiko:

  • Imi Kari baras 7 ko kuting sengam mu te ilu se, galep gold 7 mu nunga ningi geragawoso wore ko den:
  • Ani nika betera kaora ninguru ko ikisam.
    Rev 2:1 Jesus balso ale “ni” maso, mu nu bitua kari mu la ko me balso, mu nu Kaem ko kariimet likilim la karogo nunga iramurso ale balso “ni” maso.
    Mu ni ura kowar tokasam, ale ikup gikasam wore te sokel ago sanamikasam mu ani ko ikisam. Ni kariimet memek me ta nunga kuesam mu ani ko ikisam tala. Mu kari saki nunumi balsan ana apostle masan, bare nuna apostle mena, mu ni mungkala nunga ira arigem ale nunga kawel arigem ko ikiem.
Ale ni ani aip ko ikup gikasam, bare me aga bitakasam, am sokel ago bagakasam mu ani ko ikisam tala.
  • Bare ani nika munan me ko kuesam mu iwita: Ulengkala ni ninguru aga kuakasam, bare aitak mu ni ninguru me aga kuesam.
Ni ninguru dagulem wore ko kamin tugumko! Giris palage ale munan ulengkala bitakasam wore bitarko. Ni me giris palage, mu ani kete tairik, ale ka galep ko kuwim te aniso mu taik ago tagi taikko. Bare munan ningo imi mu am nikate aniso, ni munan memek Nicolas ko kariimet ago bitawasan mu mesam, se ani ago mesam tala.
Rev 2:6,15 Kari Nicolas iwita balukaso, Kris kariimet mu nongota nunga ikia duap duap am karo tumon, ale nunumi karogo saman katagot ko munan am betemonko ma balukaso.
  • Awiriya dogowa ago, mu den imi Korang Bur Kris alo nunga manaruwoso mu ninguru ikiokko! Kariimet sokel ago sanamiwomon, mu ani balik se marak sokel ago tom suen biya te bagara ko tam, Kaem ko ningam yawara
    Rev 2:7 Kaem ko ningam yawara masan mu ko nup bo Paradise, kuwim Kaem te bagoso wore.
    mu ningi sanamiwoso, mu ko nunguning am namonko.

Den Smyrna Kris alo nongote namaram

“Den imi bataguru Smyrna Kris alo nunga engel tuiko:

  • Imi Kari Duap se nama Nukum wore ko den, nu kueram bare aking barasam bagoso.
  • Ani ni ikup memek kete aratoso, se kimik mel mena bagasam mu ko ani ikisam. Bare ni kimik mel ago! Ani Juda saki nunumi balsan Kaem ko kari ma balsan, ale ni kimik ko den memek balu lagasan, mu ani ko ikisam. Bare mu nuna Juda nunguning mena, nuna Satan ko kari!
    Rev 2:9 Kari Juda ko gue te, bare nuna Kristus ko nongomang ningi nunguning mena mu, nuna Juda nunguning mena: John 8:39-44; Rom 2:25-29; Rev 3:9.
10 Ni ikup memek arikko tom pingi aram, bare mu ko me nguangerko. Ikiko! Satan ka ira arigok, se ka kariimet saki talipara ningi kapomonko. Ni tom 10 ningi yaman ikup giko. Bare ni biring me aisuko, kuarko agi wore am aga ilukuawurko, mu ko koma ani marak sokel yawara kisekko. 11 
  • Awiriya dogowa ago, mu den imi Korang Bur Kris alo nunga manaruwoso mu ninguru ikiokko! Kariimet sokel ago sanamiwomon, mu kuera udagi (number 2) mu te me sarenga namomonko. Mena. Nuna tom suen biya yawarakala bagomonko.
    Rev 2:11 Kuera udagi (number 2): Rev 20:14; 21:8.

Den Pergamum Kris alo nongote namaram

12 “Den imi bataguru Pergamum Kris alo nunga engel tuiko:

  • Imi Kari batir, koma singsang kore wuli kapawara, mu ago bagoso wore ko den:
13 
  • Ani kuwim ni te bagasam mu ko ikisam, kuwim mu Satan supuling te bagoso. Bare ni aninga aip ilukuawukasam, ale ka gemang ningi nunguning me patawu sapakasam. Ale tom nuna nika wonong te, wonong Satan te bagoso mu te, aninga dugu duap bala ko kari yawara Antipas moman se kueram, mu betelatala, ni aninga aip me kaluwukasam.
14 
  • Bare ani nika munan me ko kuesam mu iwita: Nika kariimet saki girakala ko prophet Balaam mu ko munan karo tusan.
    Rev 2:14 Balaam: Numbers 31:16, 25.
    Balaam mu nu kari Balak ikia kausam, nu Israel kariimet nunga nongomang kulukuok nunga tagirok, se na inang kaem kawel te tama tusan mu namon, ale kilek memek kariimet nunumi karogo anira barasa wore am te bita sagomonko mu ko ikia kausam.
15 Se aking nika kariimet saki nuna Nicolas ko kariimet ago nunga munan memek se ikia kawel karo tusan. 16 Buta se ni giris palageko! E mena mu, ani tairate nikate tairik, ale batir agiring te aniso mu te kariimet memek betesan mu nunga morikkowo. 17 
  • Awiriya dogowa ago, mu den imi Korang Bur Kris alo nunga manaruwoso mu ninguru ikiokko. Kariimet sokel ago sanamiwomon, mu ani duruk wonong ko na inang mu sang nungarikko. Ale ani manga siraram, nup iru bo te batagem se aniso, mu suwan suwan mu nungarikko. Nup mu awiriya me ko ikiso, bare kari manga mu taso mu la nup mu ko ikiokko!

Den Thyatira Kris alo nongote namaram

18 “Den imi bataguru Thyatira Kris alo nunga engel tuiko:

  • Imi Kaem ko Namar, noko motam tama kuamili iwita, se ko suwik brass iwita nikitang ago, wore ko den:
19 
  • Ani nika betera kaora ninguru ko ikisam. Ani ikisam ni gemang ningi nunguning bagasam, ale kariimet nunga kuesam, ale saonga ura ninguru betesam, ale ikup gisam mu ni sail ago bagasam. Ale ni munan ningo aitak tom imi te betesam, mu ulengkala munan bitakasam mu kiaram.
20 
  • Bare ani nika munan me ko kuesam mu iwita: Ni imet Jezebel, nu numi balso prophet maso, mu me karem, am motam la ariwasam.
    Rev 2:20 Jezebel mu King Ahab ko nuwus. Nu Israel kariimet kaem kawel Baal wore ko nup patawomonko kaeyakaso: 1 Kings 16:29-31; 18:4,19; 2 Kings 9:22.
    Se nu ikia munan memek aninga ura kari nunga kasurso, ale nunga tagiso se imet arungu tere nasan, ale na inang saki alo kaem kawel te tama tuman mu nasan. Bare umu ko, ni nu me karosam.
21 Ani imet umu tom tuem, ko kilek memek wore buring tuok ale giris palagukko, bare nu giris palagukko me kaeso. 22 Buta se ani kuera yaman biyala nu tuekko. Se kariimet noko ikia karo tusan ale kilek memek betesan, mu nuna noko ikia me nubiring tumon ale me giris palagomon, mu betelatala, ani yaman ikup biyala nungarikko tala. 23 Ko kuriang mu ani nunga morik se kuemonko. Umutang te Kris alo singir la te ikimon, ani mu kariimet suen la nunga ikia nongomang ariwasam ko kari ani, ma balmonko. Ale ani nina suwan suwan ninga betera kaora ko koma ningaru ningaru ago namirikko. 24 
  • Bare nina saki Thyatira bagasan mu Jezebel ko ikia kawel memek mu me karo tusan, ale ‘Satan ko ikia yumura te’ masan mu me ko ikiman.
    Rev 2:24 Kausa kariimet kawel nunumi balukasan nuna nunga ikia bibiya se ikia yumura te mu ago ko ikisan makasan, bare ikia nuna nongote taikaso mu Satan kote wore.
    Se ani iwita ninga manorsam: ani ikup bo agota ningimik te me bitirikko.
25 Bare aninga angamang nina den nunguning taman ale munan nunguning te bagasan umutang la te bagaral se ani pelerik tairikko. 26 
  • Kariimet sokel ago sanami se, aninga ikia munan karo tumon ale nama tom nukum te, mu ani balik se ali sor bitarmonko, mu ani nup biya sokel ago Ba kote taem se batoga te ani ago ko bataguru beteman se aniso iwitata: ‘Nu sikir ain iluwok, ale te kariimet nunga bituok arungu nama, kani kausan se papak masan iwitata, nunga kaurok se papak mamon katir katir kapomonko.’
    Rev 2:27-28 Nu sikir ain iluwokko: Psalm 2:8-9. Baras biya ukira karogo basuso: Rev 22:16.
28 Ale ani baras biya ukira karogo basuso mu ago nungarikko. 29 Awiriya dogowa ago, mu den imi Korang Bur Kris alo nunga manaruwoso mu ninguru ikiokko!
Copyright information for `WSK