Revelation of John 20

Satan 1000 yar talipara ningi bagurukko

Se ani engel bo duruk wonong beteram ale tai kapawaram se arigem. Nu mutim du biya mu ko songkuring te kaoga ko bugu mu se, mayang aora ikup biya mu ago iluwakaso.
Rev 20:1 Mutim du biya: Rev 9:1.
Ale nu dragon iluwam. Dragon umutang mu girakala ko ma, Satan, nu kariimet den te nunga atumokko kari, se ko nup bo Diabolos, kawel kari. Engel nu iluwam ale mayang te taliparam ale 1000 yar ko talipara ningi beteram. Nu mutim du biya mu ningi saparam ale kuring baguram se gek mam, mu dragon ali imi ko kariimet me nunga kulok ale me nunga maguwurok, am baguruk nama 1000 yar mu menaruk, asele tom tukunangta ko aratukko.

Se ani aking daiga kuwim sang arigem, se kari awete dagi se animan mu kariimet nunga tutemonko Kaem nunga balam. Se kariimet saki nunga nodora ago nungarkem. Kariimet umutang Jesus kowom karo se, ko dugu duap kariimet saki alo nunga manarukasan, ale Kaem ko den balukasan, wore ko nunga moman se kueman. Nuna mel diwang ko nup me patawukasan, ale ko kiwol nomoke sail te se nuguting te mu me to gilingiman. Nuna maragaman barasaman ale Kristus ilak 1000 yar ko ali sor bitarukasan.
Rev 20:4 Kristus ko kariimet maragomon ale nu ilak ali sor bitarmonko: Dan 7:27; 1 Cor 6:2; 2 Tim 2:12.


Imi barasa gira wore.
Rev 20:5-6 Barasa gira se barasa udagi: Dan 12:1-2; Luke 14:14; John 5:24-29; 1 Cor 15:23; 1 Thes 4:14-17; Phil 3:11; Rev 20:12-13. Kuera number 2: Rev 2:11; 20:15; 21:8.
Bare saki alo karogotala kueman mu me barasomon, am bagomon nama 1000 yar menaruk asele barasomonko.
Kariimet barasa gira mu te barasomon, mu nuna amilmil biyala. Nuna Kaem ko kariimet laili bagomonko. Se kuera number 2 mu te, mu nuna me sarenga namomonko. Nuna Kaem Kristus ilak nunga priest bagomonko. Ale nuna Kristus ilak 1000 yar ko ali sor bitarmonko.

Satan memek nunguningkiri tam

Se 1000 yar mu menaruk, mu mutim du biya mu kuring kagarmon se Satan aratuk ale ali lilim la te kariimet, Gog se Magog, nunga kulokko geragukko. Ale nunga tagirok se taimon kager ko bolala awumonko. Nuna ninguru tala aratomonko, nunga tom mu saun langi aniso turantala.
Rev 20:8 Gog se Magog masan mu kari supuling memek se nunga kariimet ago; nuna Kaem ko kariimet nunga menawumonko ago kaesan: Eze 38:2,9,15-16; 39:1.


Nuna awar awar bare tai bolala awuman, ale sor ninguru taman, ale Kaem ko kariimet bolala awuman anisan mu se, wonong Kaem ko ninguru kueso mu ago taluru guruguman.
Rev 20:9 Nuna taimon Kaem ko kariimet se ko wonong taluru gurugumonko: Ezekiel 39:6.
Bare tama duruk wonong te tai kaparam ale nunga menawuram.
10 Se Satan kariimet nunga kuluruwaram mu engel iluman ale sapaman se mutim biya tama sulphur ago mu ningi nama dagulam. Mel diwang se prophet kawel maingkala kuwim mu ningi nunga warman se anikasan. Se nuna ilagala suwan tom suen biya te turom woremkalal butata yaman to se bagomonko.
Rev 20:10 Mutim du biya tama karogo: Mat 25:41; Rev 19:20; 21:8.


Tutera tom biya

11 Se ani daiga kuwim biya bo siraram aromemek mu arigem, se Kari bo te dagiwaram se arigem. Se ali taiti ago nu koma te am mena nama gilingiman. 12 Se ani kariimet kueman, nunup ago ta, nunup mena ta, mu daiga kuwim biya mu koma dugu te sanamingaman se nungarkem. Se Kari daiga kuwim biya te dagiwaram mu batoga saki ulal awuram. Ale batoga bo, kariimet tom suen biya Kaem ilak bagomonko nunga nunup te aniso, mu agotala ulal awuram. Ale nu kariimet kueman mu nunga betera kaora batoga te aguwaya mu kau se nunga tutiakaso. 13 Se kariimet kueman mu saki gagi ningi, se saki Kuera nunga ilukuawuram se Kuera nunga Nuguwim ningi anikasan, mu barasu barasu taikasan, se Tutera Kari mu nu kariimet suwan suwan nunga betera kaora ko iki se te nunga tutiakaso.
Rev 20:11-13 Tutera tom biya: Dan 7:9-10; Mat 25:31-46; Luke 12:47-48; Acts 17:31; 2 Cor 5:10.
Asele nu balam se Kuera, se ko bo Kuera nunga Nuguwim mu nunga iluman ale nunga warman se mutim du biya tama karogo mu ningi nama dagu gilingiman. Se arikaya nunga nunup batoga Kaem ko kariimet nunup te aniso mu ningi mena, mu nu balam, se nuna agotala nunga gi gi mutim tama karogo mu ningi nunga warman se nama dagu gilingiman. Mutim du biya tama karogo mu ningi namasan umutang mu kuera number 2, te sarenga namasan wore.
Rev 20:14-15 Kuera se Kuera nunga Nuguwim: 1 Cor 15:26; Rev 6:8. Kariimet sang memek tamonko: Mat 25:41.


14 

Copyright information for `WSK