Revelation of John 21

Ali iru se taiti iru se Jerusalem iru

Asele ani ali iru se taiti iru mu arigem. Ali motam motam, se taiti motam motam, mu menaman. Se gagi agotala menaram.
Rev 21:1-2 Ali iru se taiti iru: 2 Peter 3:10-13. Wonong iru: Heb 11:16; 12:22; Rev 3:12.
Se ani Wonong Kako nunguningkiri, Jerusalem iru, mu Kaem kote duruk wonong beteram ale tai kapawaram se arigem. Mu ko ariga yawarakala nunguningkiri, imet kari taukko se numi nungurso, guang ningo naguso, ale bala beteso wore iwita.

Se ani kuring bo daiga kuwim biya mu te biyala balam se ikiem, mu iwita balam, “Arigalko! Kaem kariimet nunga ningi bagoso! Nu nongorak baguruk se nuna noko kariimet bagomonko. Kaem kota diram arungak baga se nu nunga Kaem ko bagurukko. Nu suen la nunga nomotam te nunga nomononge siwu sapurukko. Nuna udagi me kuemon, yaman ikup bo me tamon, ale me mamon niamonko. Mu awuk, ulengkala ko ikia munan mu mena sapurukko.”

Se Kari daiga kuwim biya te dagiwaram mu balam, “Ikialko, ani aitak mel suen la iru nunguruwasam bo!” mam. Ale nu aga maonam, “Den imi bataguruko. Mu awuk, den imi den nunguning, se ko nengemang ningi nunguning arukko.” Ale nu aga maonam, “Bita kutuwu saperem,” mam.

  • “Ani agata Alpha se Omega, Duap se Nukum. Awiriya yu ko kueruk, mu ani yu mutim ningi marak ago te aratuwoso mu utu tuek se naukko, ko diara bo mena.
Kariimet sokel ago sanamiwomon, mu ani marak ningo ningo la imi nungarikko. Ale ani nononga Kaem ko bagirik, se nuna aninga kuriang ko bagomonko.
  • Bare arikaya nguangasan ale nagusan, ale kariimet nongomang ningi nunguning mena, ale kariimet kilek memek duap duap betesan, ale kari mora se kuera ko kari, ale kari imet arungu saman katagot betesan, ale kariimet dawur kalosan, ale kariimet kaem kawel nunup patowasan, ale kawel kariimet, mu nuna mutim biya tama sulphur ago kaniwoso mu ningi kuwim nungarikko. Umutang kuera number 2.”

Jerusalem iru

Se engel 7 mu taiwir 7 tala mel memek kariimet nunga maguwurokko mu iluwa warman, mu nunga ningi bo tairam ale aga maonam, “Tair se ani Sipsip Gotek ko imet taukko wore ka kausek se arikko,” mam. 10 Se Korang Bur sail ago aga ira muram, se engel aga giam agarak duruk biya bo kalel biya mu te agarak nama tarigiram, ale Wonong Kako Jerusalem, Kaem kote duruk wonong beteram ale tai kapawaram, mu aga kausam se arigem.

11 Kaem ko nikitang biya wonong mu te kapawakaso. Se wonong mu ko nikim mu manga jasper ko koma kalel biya mu ko nikinang turan, nikim biya glass crystal mu iwita. 12 Wonong mu ko kar mu kalel biya, se ko songkuring mu 12, se engel 12 songkuring mu te sanami namaman ale bagakasan. Se songkuring mu awete, mu Israel nunga taleng girigir 12 mu nunga nunup te anikaso.
Rev 21:12 Ezekiel wonong bo arigam tala, mu gotek nuam, bare ko songkuring 12 tala: 48:30-35.
13 Songkuring ilagala suwan koma worem te bausa mu te, se ilagala suwan tala koma worem te nama kapara mu te, se ilagala suwan tala koma north mu te, se ilagala suwan tala koma south mu te. 14 Wonong mu ko kar mu manga bibiya 12 ali lakiman ale awete kaloman. Se manga mu nungumik te mu Sipsip Gotek mu ko apostle 12 mu nunga nunup awete anikaso.

15 Se engel ani agarak munakaram mu sikir bo gold te nunga mu iluwakaso. Ko sikir mu wonong mu se, ko songkuring, se ko kar nunga maiya, nunga ulal te taukko. 16 Wonong mu bewelak ilagala ilagala, se ko maiya ulal mu am koma suwanta. Se engel mu ko sikir mu te wonong mu ko maiya ulal tam, mu iwita: ko maiya mu 12,000 stadia, mu 2,200 kilometre iwita, se ko ulal se ko kalel mu ko maiya turan. 17 Nu kar mu ko kalel awilaya mu ago tam, mu 144 cubit (65 metre iwita)
Rev 21:16-17 Ali imi te kawam sel ningi kuwim kako nunguningkiri anikaso, mu wonong iru imitang ko ulal se ko kalel se ko maiya turan tala, bare gotektir.
. Engel mu kariimet mel ko maiya se ko tukunang ko tom tasan ale metre masan iwita, mu nu bitakaso.

18 Wonong mu ko kar mu manga jasper te nungurman, se wonong mu gold te la nungurman, se wonong glass iwita nikitang kapakaso. 19 Se wonong mu ko kar ko duap mu manga duap duap ko koma kalel biya wore te bala tuman. Manga giriman beteman mu jasper, mu glass ko ariga iwita. Se ko udagi 2 mu sapphire, mu taiti ko ariga iwita. Se ko udagi 3 mu agate, mu siraram. Se ko kowom kaora 4 mu emerald, mu maramarak. 20 Se ko kowom kaora 5 mu sardonyx, mu diriyam se siraram. Se ko kowom kaora 6 mu cornelian, mu diriyam. Se ko kowom kaora 7 mu chrysolite, mu aringiyam, gold ko ariga iwita. Se ko kowom kaora 8 mu beryl, mu maramarak, gagi ko ariga iwita. Se ko kowom kaora 9 mu topaz, mu aringiyam. Se ko kowom kaora 10 mu chrysoprase, mu maramarak se aringiyam. Se ko kowom kaora 11 mu jacinth, mu blue. Se ko kowom kaora 12 mu amethyst, mu purple.
Rev 21:19-20 Manga duap duap te bala tuman: Exodus 28; Isaiah 54:11-12.


21 Se songkuring 12 mu pearl, mel nikitang garagar. Songkuring suwan suwan am pearl suwanta te la nunguru nunguru ago namaman. Se wonong mu ko lage mu suen la gold te la nunga, glass nikitang biya wore turan.

22 Ani temple bo wonong mu ningi bagaram se me arigem. Mena. Kari Biya Kaem Sokel Karogo mu se, Sipsip Gotek umutang wonong mu ko temple bagakasan. 23 Se wonong mu te worem sige ko nikim bo me kapakaso. Mu awuk, Kaem ko nikim la te kapawakaso, se Sipsip Gotek mu wonong mu ko galep ko bagakaso.
Rev 21:23 Isaiah 60:19-20 arikko.
24 Ali sor lilim la ko kariimet mu wonong mu ko nikitang te aolak ilu nama tai se bagomonko. Se ali sor supuling mu nunga mel ningo ningo gimon ago wonong mu ningi taimonko. 25 Se wonong mu ko songkuring mu woremkalal butata nganga se lagurukko. Nuna me bagumonko, mu awuk, mu te turom bo mena. 26 Ali sor ko kariimet mu nunga bala mel ningo ningo gimon wonong mu ningi ago namomonko. Bare mel karur karogo, se kariimet kilek memek dolara karogo mu betesan, ale kawel kari, mu wonong mu ningi me ta kasu nagumonko. Mena. Mu kariimet nunga nunup Sipsip Gotek mu ko batoga mu ningi aniso umutang la wonong mu ningi kasu nagumon ale tom suen biya ilak bagomonko.

27 

Copyright information for `WSK