Revelation of John 4

John duruk wonong arigam

Mel imi menaram, se ko udagi mu “Aya!” ani duruk wonong te songkuring kaigam aniram se arigem. Se kuring bo motam motam ani biugel iwita ikiem, mu akingtala aga auram, ale aga maonam, “Ewela tai basu se ani mel udagi aratukko wore ka kausekko,” mam. Se tairate Korang Bur biyala aga ira muram, se duruk wonong te ani king ko daiga kuwim biya bo arigem, mu Kari bo awete dagiwaram se arigem.
Rev 4:2-8 Isaiah betela King Biya ko daiga kuwim biya arigam: Isa 6:1-4.
Noko ariga mu manga jasper se manga diriyam carnelian masan mu iwitatala. Se magulep bo, ko ariga manga maramarak emerald masan mu ko turan, mu daiga kuwim biya mu taluru gurugam bagakaso.

Se daiga kuwim 24 tala mu daiga kuwim biya mu taluru guruguman ale anikasan. Se kari supuling 24 daiga kuwim mu te dagi namaman ale bagakasan, nunga guang siraram mu naguman, ale nusupuling te mu crown gold te nunga mu tugu gilingiman.

Se daiga kuwim biya kusumuri mu te pure biliwilik makaso ale pagakaso ale dung gururung makaso. Se daiga kuwim biya mu koma dugu te mu galep 7 kaniwakasan, mu Kaem ko Korang Bur 7. Se betelatala daiga kuwim biya koma dugu te mu mel bo gagi malin kau kam iwita, bare nikitang nunguningkiri.

Se mel marak anira 4
Rev 4:6 Ezekiel mel marak anira 4 mu nungarkam: Eze 1:5-10.
mu kusumuri daiga kuwim biya mu taluru guruguman ale bagakasan. Ale nunga nungumik te, nomoke ko, se nubiring ko, mu nomotam sor te ariga mu suen biya.
Se mel umutang 4 mu ningi, bo mu lion iwita, se bo mu bulmakau kari iwita, se bo mu ko koma motam kari ko koma motam turan, se bo mu inanganang taraga bungeso wore iwita. Se mel ari 4 umutang suwan suwan nunga nuluman mu 6, 6. Se nunga nungumik guang awete mu nomotam suen biya, se nuluman bowa ningi mu nomotam agotala. Se tom suen biya, turom woremkalal, nuna Kaem nup patowasan ale iwita balsan:

“Kari Biya Kaem, Sokel Karogo,
nu kako, kako, kako biya.
Nu girakala bagakaso, aitak bagoso, ale udagi te bagurukko.”
Mel 4 umutang mu uwutata Kari marak pempem bagoso ko daiga kuwim biya te dagiwoso wore ko amilmil bita se, nup patawu se, amilmil tui se bagasan. 10 Se nuna uwutata betesan mu kari supuling 24 mu agotala koma dugu te dagulasan ale ko nup patowasan. Nuna nunga nusupuling te crown gold mu kututuwu daiga kuwim biya mu duap te awusan, ale balsan:

“Kari Biya, ni nanga Kaem!
Ni kariimet suen biya ni ko ko amilmilomon,
nip patawomon, ale ka sokel bowa ningi bagomonko mu ni la terong maem.
Mu awuk, ni mel suen biya beterem,
mu nika ikia se ka gemang te la beterem se bagasan.”
11 

Copyright information for `WSK