Revelation of John 5

John batoga bo bataguru patunguru beteman mu arigam

Se aking ani batoga patunga bo mu Kari daiga kuwim biya mu te dagiwaram mu ko kuting sengam mu te iluwaram se arigem. Se awete koma singsang mu den sika te batagorman se anikaso. Ale tam kiri te gek maukko mu tom 7 ko te ilu ilu karogo namaman.
Rev 5:1 Ezekiel scroll bo arigam tala: Eze 2:9-10.
Se ani engel bo sokel ago nunguningkiri mu arigem, mu nu sail te iwita airam se ikiem, “Awiri diram laili se batoga patunga ewere ko tam kiri te gek maukko iluman mu kututuwu ago namuruk ale ulalawurokko ya?” mam. Bare kari bo duruk wonong te, se ali imi te, se ali bowa ningi, wore bo batoga imi urukumon ale ningi loagomonko me terong. Se ani ninguru niakasam. Mu awuk, kari ningo nuam bo batoga mu urukuok ale ningi loagurukko mu mena.

Bare kari supuling nunga ningi bo aga maonam, “Me nierko!” mam. “Arikko! Judah ko gue te Lion aratam, David ko Miri ko Gurek mu sokel ago aratam, ale kager te sail ago sanamaram. Nu batoga mu ko tam kiri 7 mu kututuwurok ale ulalawurokko mu terong mam!”
Rev 5:5 Lion ko den: Gen 49:9. David ko Miri ko Gurek: Isa 11:10; Rev 22:16.


John Sipsip Gotek arigam

Se ani Sipsip Gotek bo, ko ariga maingkala mora se kuera iwita, wore daiga kuwim biya mu ko koma dugu te sanamiwaram se arigem. Nu mel marak anira 4 mu se, kari supuling 24 mu nunga kusumuri sanamiwakaso. Noko dinak 7, se ko motam 7. Motam umutang mu Kaem ko Korang Bur 7, ali sor lilim la te nunga awuram se namaman.
Rev 5:6 Sipsip Gotek: John 1:29. Ko motam 7: Zech 4:10. Jesus se Korang Bur mel suen la ariwasan ko ikiwasan.
Se nu namaram Kari daiga kuwim biya te dagiwaram mu ko kuting sengam mu te tam gawa batoga patunga iluwaram umutang tam. Se umutang te mel marak anira 4 mu se, kari supuling 24 mu noko koma dugu te dagulaman. Supuling suwan suwan nunga kolara mel gita iwita mu se, taiwir gold te nunga mu ilukasan. Tam kiri siring yawara mu taiwir mu suen la ningi terong mam, umutang Kaem ko kariimet nunga aira ngatangara. Ale nuna wur bo iru iwita ilukasan:

“Ni laili diram se batoga to ale ko tam kiri kututuwurko terong maem.
Mu awuk, nuna nika moman se kuerem,
ale ka gue te, ali sor lilim la ningi,
kariimet nunga den kirker, nunga nungumik aguwaya wore nunga diarem.
10 Ni ka kingdom ningi nunga awurem,
ale anananga Kaem ko priest ko nunga awurem,
nuna ko ura ilu se ko nup patawomonko.
Ale nuna ali sor bitarmonko.”
11 Se ani akingtala loagerem, mu engel alo, suen biya nunguningkiri, nunga kaura koma mena, mu nuguring ikiem. Nuna daiga kuwim biya mu se, mel marak anira 4 mu se, kari supuling supuling buta nunga taluru guruguman, 12 ale sail karogo wur ilukasan:

“Sipsip Gotek moman se kueram imi mu nup biya, mel ningo ningo, ikia yawara, se sokel biya taukko!
Kariimet noko nup patawomon, nu ko ko amilmilomon, ale amilmil tumonko, mu nu la terong mam!”
13 Aking ani mel suen biya Kaem nungam se aniso, duruk wonong te, ali te, ali bowa ningi, se gagi ningi, mu suen la wur iwita ilukasan se ikiem:

“Ana Kari daiga kuwim biya te dagiwoso,
ale Sipsip Gotek mu buta ana tom suen biya nunga nunup patowanakkowo!
Nuna nunup biya, nikitang, sail karogo, pempem la, nunguning!”
Se mel marak anira 4 mu balman, “Nunguning!” maman. Se supuling alo mu dagulaman ale Kari daiga kuwim biya mu te dagiwakaso se Sipsip Gotek nu ilak bagaram mu nunup patawukasan.

14 

Copyright information for `WSK