Revelation of John 6

Sipsip Gotek tam gawa batoga patunga ko tam kiri 1 nama 6 kututuwuram
Rev 6:1-17 Jesus mel suen la bitaruwoso. Nu ali imi te baga se ikup saki imitang ko nanga maonam: Mat 24.

Ani loagawerem se Sipsip Gotek mu tam kiri 7 mu nunga ningi bo giram kutuwuram. Se mel marak anira 4 mu nunga ningi bo pure niara iwita munakaram se ikiem. Nu balam, “Tairko!” mam. Se ani loagawerem mu horse bo siraram mu aratam! Se kari horse awete daigam mu daga iluwam. Se nuna crown bo supuling te beteman se nu kager suen la te arungak kageruruk ale nunga kiarukko aratam namaram.

Asele Sipsip Gotek aking tam kiri bo 2 mu kutuwuram. Se mel marak anira mu bo aking iwita balam se ikiem, “Tairko!” mam. Se horse bo tala aratam, mu diriyam. Nuna kari horse awete daigam mu sokel tuman, nu marolila menawurok se kariimet nunumi momonko. Nuna batir bo biya wore tuman.

Asele Sipsip Gotek aking tam kiri bo 3 mu kutuwuram. Se ani mel marak anira mu bo aking iwita balam se ikiem, “Tairko!” mam. Se ani loagawerem mu horse bo kaetam mu aratam! Se kari horse awete daigam mu mel bo melmasak ko ikup te ariga ko (“scales” masan) mu kuting te iluwaram. Se mel marak anira 4 mu nunga ningi nirung bo munakawara iwita mu ikiem, mu iwita balam, “Na inang diara ko koma tarigiram bo!” mam. “Wheat muguri kani gotek imi ningi, mu tom suwanta ko ura koma ko manga mu te diara ko mu terong mam. Se barley muguri kani gotek ilagala suwan imi ningi mu betela tom suwanta ko ura koma ko manga te diamonko tala. Bare ni olive oil se waen me maguwurko!”

Asele Sipsip Gotek aking tam kiri bo 4 mu kutuwuram. Se mel marak anira bo 4 mu iwita balam se ikiem, “Tairko!” mam. Se ani loagawerem mu horse bo kumik kuruguyam mu aratam! Se kari horse awete mu ko nup Kuera i. Se ko bo Hades (Kari Kuera nunga Nuguwim) mu nu pingi kowom karowakaso. Nuna sokel karogo, nuna gatu te, karak te, kuera memek te, mel daong, te ali imi ko kariimet suen biya tala (1/4) nunga momon se kuemonko.

Asele Sipsip Gotek mu tam kiri bo 5 mu kutuwuram. Se ani kuera kariimet sang nunga nodora altar bowa ningi bagaman se nungarkem. Kariimet imitang mu ulengkala Kaem ko den ilukuawukasan ale kariimet saki nunga manarukasan wore ko nunga moman se kueman. 10 Nuna sail ago aiman, ale balman, “O Kari Biya, ni mel suen la ko Biya, ni kako, se ni nunguning. Ni amaru te aliti kari nunga munan tuter ale nuna nanga moman mu ko gue koma kutuwurko?”
Rev 6:10-11 Kaem kariimet imitang nunga aira ikiam / nunga nuguring iluwam: Rev 16:5-7. Rev 7:9, 13-14 ago arikko.
11 Uwuta balman, se nuna guang siraram mu suwan suwan nungaru gurugu karogo namaman, ale iwita nunga manorman, “Nina tom katirta ko kimi tui sagaralko. Nuna nenenga ura suwan, ninga sikisaki, nina ninga moman turantala, nunga momon se kuemon nama, kariimet awilaya nunga momon se kuemonko Kaem ko ikiwoso mu te araguk asele kowo.”

12 Se ani loagawerem se Sipsip Gotek mu tam kiri bo 6 mu kutuwuram, mu wanara biya kaparam. Se worem motam kaetmam, guang belelek mone kaetam te nungursan wore turan aratam. Se sige motam gue iwita dirimam. 13 Se baras kutuktuk maman ali te kapakasan, tam fig ko nunguning me garukoso se daula biya ituguso se piripirik ma ma kaposo wore iwitata kapakasan. 14 Se taiti mu, la gawa te aniwara wore moa betera iwita, kota numi moa irukuam pila nama menaram. Se duruk se tual singir la nunga kuwim bita bita ago namaman.
Rev 6:12-14 Matthew 24:29 ago arikko.


15 Umutang te aliti kari supuling bibiya, kari nunup ago, kager supuling alo, kari nungumik mel karogo, kari sokel karogo, se ura dungan, se kari ura dungan kari mena, mu nuna suen la garap gogong ningi se duruk mutim ningi yumu yumu namaman. 16 Ale duruk manga garap iwita nunga manarukasan, “Papak maral ale kaparal nanga ira muralko,” makasan. “Kari daiga kuwim biya te dagiwoso wore ko motam ko nanga kaluwural, ale Sipsip Gotek ko gomang magara wore ko nanga kaluwuralko! Mu awuk, nononga nongomang magara ko tom biya tai aratam, se awiri te sanamurukko terong mam? Mena biya.”

17 

Copyright information for `WSK