Revelation of John 7

Israel kariimet 144,000 Kaem ko kiwol nomoke sail te nungaru gilingiman

Mel imi menaram se ko udagi ani engel 4, ali ko kinikan 4 tala, mu te sanami namaman se nungarkem. Nuna ali ko daula 4 mu iluman tala, se daula bo ta ali, gagi, se tam bo me itugukaso. Asele ani engel bo koma worem bausa mu te basuwaram se arigem, nu mel bo iluwakaso, mu Kaem marak bagoso wore ko kariimet nomoke sail te kiwola bitirukko mu iluwakaso. Nu engel 4, Kaem maingkala ali gagi te maguwumonko ko sokel nungaram, mu sail te nunga auram ale balam: “Nina ali, gagi, se tam me maguwuralko. Ana nanga Kaem ko kiwol noko ura kariimet nomoke sail te awu awu ago namanak ale asele,” mam. Se ura mu uwutata beteman. Asele ani kariimet awilaya Kaem ko kiwol mu nomoke sail te taman, mu nunga tom balman se ikiem, mu Israel kariimet suen la nunga ningi mu 144,000 mu ikiem.

  • Judah ko gue te mu 12,000 mak mu taman.
  • Se Reuben ko gue te mu 12,000.
  • Se Gad ko gue te mu 12,000.
  • Se Asher ko gue te mu 12,000.
  • Se Naphtali ko gue te mu 12,000.
  • Se Manasseh ko gue te mu 12,000.
  • Se Simeon ko gue te mu 12,000.
  • Se Levi ko gue te mu 12,000.
  • Se Issachar ko gue te mu 12,000.
  • Se Zebulun ko gue te mu 12,000. Se Joseph ko gue te mu 12,000. Se Benjamin ko gue te mu 12,000. Se nunga biguwuman mu 144,000 kariimet Kaem ko kiwol mu to gilingiman. Rev 7:1-8 Kaem noko kariimet nunga sinar taukko. Ezekiel 9:3-6 ago arikko.

    Kariimet motam biya Kaem nup patawukasan

    Mel imi menaram se ko udagi ani loagerem ale “Aya,” ani kariimet motam biya nungarkem! Umu kari bo nunga kaurok ale nunga tom awilaya mu ikiokko me terong. Kariimet mu ali sor suen la ko kariimet, se nungumik kirker ko, se den kirker ko. Nuna guang sirar mu nagu muruwuman, ale naur gawa ilu se, daiga kuwim biya mu koma dugu te Sipsip Gotek motam te sanamaman, 10 ale sail karogo balukasan:

    “Anananga Kaem ko daiga kuwim biya te dagiwoso mu se,
    Sipsip Gotek buta nago ko sail tagiman ale nuna gira biya!”
    11 Se engel alo suen la mu nuna daiga kuwim biya mu se, kari supuling 24 mu se, mel marak anira 4, mu buta nunga taluru guruguman ale sanamiwakasan. Ale nuna daiga kuwim biya koma dugu te dagulaman ale nomoke kaparam, se Kaem nup patawukasan, 12 ale balukasan:

    “Nunguningta nunguning!
    Amilmil, se nikitang, se amilmil tua,
    mu am anananga Kaem ko la.
    Nu la ikia biya, nup biya,
    sokel biya, kualala biya nunguning,
    tom suen biya te, nunguning!”
    13 Se supuling bo aninga isuam, “Kariimet guang siraram naguman imi arika? Se aparete taiman a?”

    14 Se ani nu manem, “Aninga biya, ani me ko ikisam. Bare ni ko ikisam.”

    Se nu aga maonam, “Kariimet imi tom memek ningi taiwa aratu gilingiman. Nuna nunga guang Sipsip Gotek ko gue te anuman se sirarmam.
    Rev 7:14 Tom memek: Mat 24:21-22; John 16:33. Kristus ko gue nanga sangarso: 1 Cor 6:11; Heb 9:14.


    15 Buta se nuna Kaem ko daiga kuwim biya mu koma dugu te bagasan,
    ale turom woremkalal noko temple ningi ko nup patawu se anisan.
    Se Kari daiga kuwim biya te dagiwoso mu arungak baga se nunga sinar taukko.
    16 Nuna udagi na ko me kuemon, yu ko me kuemonkowo.
    Worem ko kowar kapuruk ale me nunga kanirukko,
    mel kowar bo nungumik guang me kanirukkowo.
    Mu awuk, Sipsip Gotek daiga kuwim biya mu koma dugu te bagoso mu
    nunga bitua kari ko bagurukko,
    ale nunga sinar taukko.
    Nu nunga diruwurok arungu namuruk se yu yawara marak nungarukko kapawoso mu namonko.
    Se nomononge nunga nomotam te aniso mu Kaem suen la siwu warukko.”
    17 

    Copyright information for `WSK