Revelation of John 8

Sipsip Gotek batoga patunga ko tam kiri 7 nukum te nunguningkiri bagaram mu kutuwuram

Se Sipsip Gotek batoga patunga ko tam kiri 7 nukum te mu kutuwuram, se duruk wonong te mu sor kutek am biya, nirung bo mena, nama hour suwanta ko komasang iwita.

Se udagi te ani engel 7 Kaem koma dugu te sanamiwasan mu nungarkem, se tom umutang te biugel 7 mu giman.
Rev 8:1-2 Tam kiri 7 nukum kopa te mu ilu kutuwuso mu, biugel 7 mu ko den te duap betesan.
Se engel bo tala taiwir bo gold te nunga mu giam, ale ago tai altar duap te sanamaram. Se nuna tam kiri biyala tuman, nu giok ale ago nama altar gold, Kaem ko daiga kuwim biya mu duap te aniso mu te kaiyuk se kaniruk se siring yawara barasukko. Se nu butata beteram se bur siring yawara mu Kaem ko kariimet nunga ngatang ago Kaem koma te tarigikaso.
Rev 8:3-4 Kariimet nunga ngatang: 1 Peter 3:12; Rev 5:8; 6:9-10.


Asele engel mu ko taiwir mu tam, ale tama altar awete mu giam taiwir awete awuram, ale aliti ali tuagu te waram se tai kaparam. Se pure biliwilik makaso ale pagakaso ale dung gururung makaso, se wanara kapakaso.

Engel 4 nunga biugel ituguman

Se engel 7 mu biugel nongoma nongoma iluman, ale itugumonko sinar ago bagaman.

Se engel motam motam mu ko biugel itugumam. Se tuwik muguri bibiya ais iwita se tama gue ago biguwuman mu tai ali awete kaparam. Se ali komasang (1/3) ko tam, se ko sirsir ago la kaniman.
Rev 8:7-9 Moses ko tom te kilek uwutata aratu aratu namakaso. Mu awuk, Kaem Egypt alo nunga memek koma nungaruk ale kota ko kariimet nunga bataguru taukko mu ko se: Exo 9:23-26; 7:20-21.


Se engel bo 2 mu ko biugel itugumam, mu mel bo duruk aromemek kaniwara mu turan sapaman se nama gagi ningi dagulam. Se gagi komasang (1/3) mu gue ko geragam, se wal melmasak ago la kueman, se dal ago la maga muruwuman.

10 Se engel bo 3 mu ko biugel itugumam, mu baras biya bo, tama galep kaniso dirimaso iwita, mu taiti kuali wore tai yu komasang (1/3), yu bibiya se gotektek wore awete kaparam. 11 Se baras imi ko nup mu “Seselak Ago”. Se yu umutang mu seselak pagam, se kariimet suen biya yu mu nokasan ale kuakasan.

12 Se engel bo 4 mu ko biugel itugumam, se worem, sige, baras nunga ningi sang (1/3) mu tiromorom pagaman, se woremkalal mu 4 hour iwitata nikinang mena, se turom betelatala.

Se ani loagawerem mu taraga bo kualala binga se biyala airam ale balukaso, “Ayo! Ayo! Ayo!” makaso. “Mu awuk, engel ilagala suwan am anisan mu biugel itugumon, mu memek biya nunguningkiri kariimet ali te bagasan mu nunga irokkowo!”
Rev 8:13 Engel ilagala suwan biugel itugumonko: Engel 5 se 6: Rev 9. Engel 7: Rev 11:15.


13 

Copyright information for `WSK