Revelation of John 9

Engel bo 5 mu ko biugel itugumam

Se engel bo 5 mu ko biugel itugumam, se ani baras bo taiti kuali wore tai ali te dagulam se arigem. Se nuna mutim du biya ko songkuring te kaoga ko mu ko bugu tuman. Mutim mu ko kuring kirikimik gotek, bare du biya nunguningkiri, ko nukum me arikko. Se nu bugu mu tam ale mutim nukung ko kuring kaogam, se tama bur biyala aratam, tama biya bo ko bur aratoso wore iwitata aratam, ale taiti bowa lilim la se worem karogo kaluwuram se sor tiromorom pagam.

Se mel kutuwurek iwita mu tama bur ningi arataman ale ali awete kapaman. Ale nuna sokel taman, mu maruwan nulis nunga daong se nunga sokel mu turan. Se nuna den taman mu iwita: “Nina sirsir tam mel mel me maguwuralko. Mena. Nina kariimet Kaem ko kiwol nomoke sail te me aniso, mu la nunga maguwuralko. Nina sige 5 ningi yaman nungaralko. Bare me nunga moral se kuemonko.” Se mel kutuwurek iwita mu den mu taman. Nuna maruwan nulis kakirip usiso se yaman biyala ikiso wore iwitata, kariimet yaman nungarmonko. Se sige 5 mu ko naung ningi nuna te kuemonko lage ko loagomon, bare me aringimonko.

Kutuwurek nukung mu nunga ariga mu horse kager ko namomonko nunga nungursan se bagasan mu nunga turan. Nunga nusupuling te mu mel, crown gold te nunga wore iwita, mu tugu gilingiman. Se nunga nomoke mu kakirip nunga nomoke turan. Nunga nomone mu imet nunga nomone iwita, se nunga nogore mu lion nunga nogore iwita. Se nunga nokosopat mu ain te lakira iwita, ale nunga nuluman nirung mu horse karis tagisan ale kager ko nagusan mu ko nirung iwitata. 10 Nunga nomom luan mu dinak agotala, maruwan nulis nunga iwita, kari te momonko. Se nomom umutang te nuna sige 5 ningi kariimet yaman nungarmonko terong. 11 Nunga supuling biya mu engel bo, nu mutim du biya umutang bitarso. Noko nup Hebrew den te mu Abaddon, se Greek den te mu Apollyon.
Rev 9:11 Nup umutang ko nunguning mu “Mel Suen la Maguwura ko Kari”.


12 Se taraga ko kuring te ikup ilagala suwan aratukko balam mu bo eta aratam ale menaram. Se ikup ilagala am aniso.

Engel bo 6 mu ko biugel itugumam

13 Se engel bo 6 mu ko biugel itugumam, se altar gold te nunga, Kaem koma dugu te aniso, mu ko kinikan mu te kuring bo aratam se ikiem. 14 Se kuring mu engel 6 biugel iluwaram mu iwita maonam, “Engel ilagala ilagala Yu Euphrates duap te nunga talipaman se anisan mu nunga awur se namomonko!”
Rev 9:14 Engel imitang mu Satan ko engel saki.
15 Se nu engel 4 mu nunga awuram se kariimet suen biya (1/3) mu nunga momonko arataman. Engel mu yar, sige, tom, hour ewerta ko nunga balman se sinar ago bagaman. 16 Se kager kari horse te dagiman mu nunga number 200 million mu ani ikiem.

17 Ani ipingira te kariimet horse te mu iwita ko nungarkem: Nunga ain nokokosa te mu diriyam, se sang tam sil ko muguri iwita, se sang aringiyam. Se horse nunga nusupuling mu lion nunga nusupuling iwita, se nuguring te tama, se tama bur, se sulphur ago aratukaso. Se mel memek ilagala suwan umutang te kariimet suen biya (1/3) mu kua gilingiman. 19 Horse nunga nosokelel te daongakasan mu nuguring te, se nomom te. Mu awuk, horse nunga nomom mu ma urer iwita, kopa te nusupuling ago. Se nuna mel mu te kariimet nunga moa maguwukasan.

20 Bare kariimet ikup umutang te me kua gilingiman, mu nuna nunga kaem kawel nuguting te nungurman mu nubiring me tuman, ale me giris palagaman. Nuna bur memek nunup patowara me bita tokasan, am patawuwakasan. Ale kaem kawel nunga nodora gold, silver, brass, manga, se tam te nungurman, wore nunup patawukasan. Mel mu me loagomon, den me ikimon, me aolak ilumonko tala, wore nunup patawuwakasan. Se betela, nuna nunga kilek memek, kari mora se kuera, dawur, kariimet ago saman katagot betera, se mel tere nana, mu me nubiring tuikasan, ale me giris palagakasan.
Rev 9:20-21 Nuna me giris palagaman: Rev 16:9, 11.


21 

Copyright information for `WSK