Romans 12

Munan suen la te Kaem tama tunakko

Buta se aga singsang, Kaem ko gomang nangaram ale yawarakala nanga saongam, se ani mu ko iki se ninga manorsam: nina ninimi laili awural ale munan Kaem ko amilmilurukko mu la bita se, marak bagara la ninga ningimik guang lilim la Kaem tualko, tama bita tua iwita, se noko la anirukko. Umutang mu Kaem nup patowara ko munan nunguningkiri. Nina ali imi ko kariimet aolak ilusan iwita me aolak iluwalko. Mena. Ninga ikia iru aratukko, umutang te ninga munan iru agotala aratukko. Umutang te nina Kaem ko gomang motam, ko ikia ko ikialko, ale munan awuk bore ningo nunguningkiri, nu ago terong mam, mu ko ikialko.

Kaem ikia munan ani aisam, se mu te ani nina suen la ninga manorsam, ni keta nimi ko iki kualala biya me ale, keta nimi me patawurko. Mena. Ka ikia ZZZ OK? amakin ira kutuwur, ale ikia gemang ningi nunguning ko tom te Kaem kisam mu te nimi ikiko. Ani nangimik guang te balikko. Nangimik guang suwanta, bare ko nuamur tutuk suen biya. Se nuamur tutuk umutang ura suwanta me ilusan, nunga ura kirker. Se butatala, ana kariimet suen biya, bare Kristus te, mu ana am suwanta iwita bagasan. Ale ana launuria nunguning iwita bagasan.

Kaem munan sokel kirker kirker ura te betenakko nangaram. Se ni Kaem ko kuring baluko kari agi mu, nika gemang ningi nunguning te kisiso se ikiwasam turan te la baluko. Se ni saki nunga sangaruko kari agi mu, ninguru nunga sangaruko. Se ni saki den nunga kasuruko kari agi mu, eng kausa ura diram bitarko. Se ni saki nongomang sokel tua ko kari agi mu, eng sokel tua ura mu diram bitarko. Se ni saki alo mel nungaruko kari agi mu, mel terongtala nungaruko. Se ni ura bo ko supuling bagasam agi mu, ura mu ninguru bitarko. Se ni saki ikup ago mu nunga sangaruko kari agi mu, ni amilmil ago la nunga sangaruko.
Rom 12:3-8 Ana Kris kariimet biguwura suwanta bare nanga ura kirker: 1 Cor 12:4-12; 1 Peter 4:10-11.


Saki alo ninguru nunga kueralko, nigiring guang te la mena. Ikia memek nibiring tual ale ikia ningo ilukuawuralko. 10 Launuria nunumi ko kuesan iwitata, nina Kris alo ninimi ko kueralko. Saki alo kualala nunga awural ale nina nunga bowa ningi bagaralko. 11 Kari Biya ko ura ko sail tagiral ale sokel ago iluwalko, me gagoraralko. 12 Tom yawara udagi taiwoso mu ko iki se amilmil te bagaralko. Ikup gial mu sokel ago sanamaralko. Ale tom suen biya ngatanga se bagaralko. 13 Kaem ko kariimet mel ko tukunang amon agi mu, am nunga saongalko. Wonong saki ko kariimet ninga uningi taimon, mu nunga aural se taimon se ninguru nunga sinar talko.

14 Kariimet saki ninga bita maguwusan, mu Kaem nunga sangukko am aru maonalko. Nina marak den la nungaralko, me nunga balu maguwuralko. 15 Awiriya amilmilawoso, mu ilak amilmilaralko. Awiriya mo niawoso, mu am ilak mal niaralko. 16 Ale saki arungu nengemang suwanta bagaralko. Ninimi me patowaralko, kariimet kituwura nunup mena wore am arungu nal gialko.
Rom 12:16 Bala bo mu iwita:
Nengeta la ikia nuam ma me ninimi balalko.

17 Awiriya ninga bita maguwurok, mu nina koma ko me bita maguwuralko. Munan kariimet aringimon ale diram mamonko mu la diram beteralko. 18 Saki nengerak betemon agi wore, nina mu am kariimet suen la te arungak lila te bagaralko sail tagiralko.

19 Aga singsang, nina ningimik te memek betemon agi mu, nengeta koma me kutuwuralko. Mu am beteral se Kaem kota kutuwurokko. Batoga bo te Kari Biya iwita balam, “Memek koma kutuwura mu aninga mel, mu ani agata bitirikko.”
Rom 12:17-21 Memek koma kutuwura: Deut 32:35; Prov 25:21-22; Mat 5:39; Heb 10:30.
20 Se nina nengeta koma me kutuwuralko. Mena.

“Nika kager kari na ko kueruk, mu na am tuiko, yu ko kueruk mu yu tuiko.
Mu ni uwuta bitar se noko munan ni kimik te bitakaso mu ko dolurukko.
Mu awuk, ni uwuta betesam, mu tama kuwuning ni nu supuling te betesam se kaniwoso iwita, se dolurukko.”
Buta se nina munan memek me am ariwaral se ninga kiarukko. Mena. Munan ningo beteral ale munan memek te menawuralko.

21 

Copyright information for `WSK