Romans 13

Ana ali sor supuling nuguring bowa ningi baganakko

Ana suen la ali sor supuling nanga bitaruwasan mu nunga nuguring bowa ningi baganakko. Mu awuk, ali imi ko supuling nongota me supuling ko arataman. Kaem nunga balam se arataman anisan.
Rom 13:1-2 Ana ali ko supuling nuguring bowa ningi baganakko: John 19:1; 1 Peter 2:13-14.
Buta se awiriya ali imi ko supuling nuguring batagarso, mu nu Kaem kuring agotala batagarso. Se kari uwuta beteso, mu nu kota ikup tagi kumik te beteso.

Kariimet munan diram bitawasan, mu nuna supuling nunga me nguangasan. Kariimet memek bitawasan mu asele supuling nunga nguangasan. Se ni kari supuling bagoso mu ko me nguangerko agi mu, ni munan diram betesam mu la bitar se ni nip patawurukko. Mu awuk, nu Kaem ko ura kari, ni te yawarakala bagerko ko ura iluwoso. Bare ni kilek memek bitar, mu ni nguangerko. Nu batir yam ipi ko me iluwoso. Nu Kaem ko ura kari, nu awiriya memek beteso bare ko koma memek tuokko kari.

Buta se nina supuling nuguring bowa ningi bagaralko. Bare Kaem ko gomang magara mu ko la mena. Nina iwita ikialko, supuling nuguring bowa ningi bagara mu munan diram. Umutang ko nina ali imi ko supuling agotala takis manga nungarsan. Mu awuk, ali imi ko supuling ura towasan mu Kaem ko ura iluwasan. Buta se mel kasik la ko munan te la beteralko. Manga tata ko kari mu nina manga nungaralko. Kari supuling, kari bibiya mu nunga nuguring bowa ningi baga se nunup patowaralko.

Ana nainimi ko kuenakko

Bo kote ikup ago se me kutuwura ko munan nenenga ningi me ta anirukko. Munan suwanta nainimi ko kuenakko mu la tom suen biya anirukko. Mu awuk, kari awiriya saki alo nunga kueso, mu nu munan den karo kutuwuso. Munan den e ta imitang: “nuwus-kuari ko munan me maguwurko, kari bo me moar se kuerukko, me tere noko, bo ko mel arik ale me ko gemang barasukko,” se munan saki agotala, mu biguwuram ale munan den imi te balam: “Ni keta nimi ko kuesam iwitatala, ka bo ko kuarko.” 10 Ni bo ko kuesam, mu ni munan memek nu kumik te me bitarko. Ni bo ko kuesam, mu ni munan den suen biya karo tusam.
Rom 13:8-10 Nainimi ko kuera ko munan: Mat 22:39-40; 1 Cor 13:4-7.


11 Nina munan uwutata beteralko. Mu awuk, tom aitakta te bagasan mu nina ko ikisan: aitak nina anira beteral ale barasalko tom. Tom ana nangamang ningi nunguning aram tom te, mu tom Kaem ana te nanga giokko mu awar nuam aniram, bare aitak mu pingi aram. 12 Turom menarukko pingi aram, se sor ukirokko pingita. Buta se ana tiromorom ko kilek sapanak, ale nanga kager ko mel nikim te kagernakko mu nagunakko. 13 Ana kariimet woremkalal bagasan iwitatala ana diram la baganakko. Ana biguwunak yu nanak ngualanak ale kilek memek ngualara me betenakko. Ale nainimi karogo tere nana, ale nainimi karogo ngual ngual anira barasa kilek mu me betenakko. Ana nangamang magara ining singi te me baganakko, ale bo ko mel ko me nangamang barasukko. Mena. Ana Kari Biya Jesus Kristus tanak ale karem ko kitinakko. Ale nangamang ningi ikia memek aniso mu me karo tunakko.

14 

Copyright information for `WSK